20/12/2025
هاك 7 قوانين لازم تحفرهم في راسك اليوم قبل غدوة ..
في الأربعين.. الغالبية الساحقة تقبل بالأمر الواقع يولي يشوف كاش ما يدي دار سوسيال.. يزوجوه لجات... يجيب أولاد ويبقى عايش هكدا نهار بنهار حتى يدي ربي أمانته...
المشكل ماهوش في المكتوب ، المشكل راه في التخمام الغالط لرانا نمشوا بيه.
المشكل الاصلي دار الوالدين في عمر 22 كاين بزاف تصيبه راقد، ماكل، شارب، كونيكسيون كاينة.. هنا غريزة البقاء راهي Désactivé فيدخل في منطقة الراحة السامة يحس بلي الوقت راه طويل.. ويقول مازال الحال.. وهذا أكبر فخ.
تلحق 25 سنة:
تبدأ تشوف صحابك في الانستغرام.. هذاك في دبي، وهذاك دار طوموبيل.. و هذاك خدام يقارن كواليس حياته مع أفضل لقطات حياتهم.. النتيجة؟ اكتئاب، ضغط، وشلل تام. تهرب للتيكتوك باش ينسى فتزيد تغرق.
الحل؟.. لازم تدير Mise à jour في اقرب وقت قبل ما يفوت التران..
من بعد تلحق الثلاثين:
هنا تصيب روحك روطار ماش لاحق مادياً، وكاين لي ماش خدام أصلاً الضغط يولي دوبل أو ثريبل.. صحابك بدأو يتزوجوا تولي انت ثاني حاب تزوج...
هنا تبدأ تخمم كيفاش تصوفي حياتك... البروبلام في هاد المرحلة صعب جداً تقبل فكرة أنك تصبر عامين أو ثلاثة باش تتعلم حرفة جديدة.. تحس روحك ديجا روطار فتحوس غير على افار تصوفيك باش تعوض واش فات وتبين روحك... فتزيد تغرق أكثر...
مانيش حابك توصل ل 40 و تندم و لهذا راح نقولك 7 قوانين لازم تحفرهم في راسك و تمشي بيهم و كل ما تشوف روحك ديفييت ارجع اقراهم:
1. واحد مراح يجي يصوفيك...
الدولة ماراحش تعطيك، باباك لما يكثر يصرف على الدار ، صحابك ممكن يعاونك قيس المصروف مرة على مرة و لكن مكانش لراح يعطيك ملايين باش تدير بروجي و إذا مخدامش اغلب ناس مراحش يسلفولك و إذا كان مدخولك قليل مكانش ليسلف لك دراهم كبار لان علاباله يسلفلك و يحصل...
يعني يبقى الحل بين يديك اتعلم حرف اقرأ اتعلم شوف حاجات مفيدة... لازم توصل لمرحلة الناس تدفعلك دراهم باش يدي رأيك إذا قدرت....
2. افشل بسرعة، تعلم أسرع
في الجزائر نخافو من الفشل ومن واش يقولوا الناس. البروبلام هذا يبدأ من الصغر ما تهدرش... ما تمسش ما تخرجش... في المسيد تغلط تتضرب و عندك نقاط ناقصين...
و هذا ضد الايطار الطبيعي لخلا الإنسان يوصل للتطور لرانا فيه.... ناس جربت آلاف المرات باش وصلت لنتيجة..
شخصيا بزاااف معلومات مكنتش داير غاع حساب راح نعرفهم و جامي خممت فيهم اصلا صبت روحي نعرفهم بينما انا حاصل في المشاكل... و مرات كثيرة وصلت لمرحلة صرفت غاع واش عندي باش نفهم الأمور كيف تمشي و النتيجة! فاهم خوارزميات منصات الفريلانس و نقدر نطلع اي خدمة في اي وقت بإذن الله
علاه الناس ما تخدمش تجارة أو عند روحها لان ببساطة حياتهم المهنية راح ترجع أكثر من 90 ٪ مبنية على المجهول و كل مرة تخرج حاجة في طريقك...
3. الانضباط يغلب التحفيز
واحد ما يكذب عليك و حتى انت ما تكذبش على روحك... المورال الغوسطو أو سمي واش حبيت راه مدخل بزاف ناس في الحيط...
إذا راك تستنى في القوسطو يكون مليح باش تخدم فنقولك عندك ما تستنى...
السر راه في الانضباط و الاستمرارية أنك تدير واش لازم يندار، حتى كي تكون كاره وتعبان. النتائج تجي من الروتين الممل...
دير في بالك لازم تزدم إذا ودمت راح تصيب روحك ماشي في طريق تخليك تعرف أمور باسلوبك ناس آخرين ما يعرفوهمش... لأنهم واقفين في البدية و يستناو شكون يقولهم واش فيها هذك الطريق... و لكن غالبا حتى و يقولهم راح يفشلو لان الدنيا فيها جانب غير منطقي... ابتلاءات... و أقدار... توفيق.. و هذه امور تختلف من شخص إلى آخر و لهذا لازم تمشي طريقك...
4. المحيط تاعك يلعب دور كبيير :
ديما نسمعوا مقولة انت راح تكون كما لخمس أشخاص لديما تفوت معاهم وقت... و غالبا تصيب تخمامك كما تخمامهم... مشاكلك كما مشاكلهم... مستواك المادي كيفهم....
5. تريث مليح و انت تختار شكون تزوج...
الزواج ماهوش فراش برك...و تندم
الانسانة لراح تزوجها هي لتطلعك و هي لتهبطك... اختار بعقلك...
6. تعلم تقول لا لا
دير في حسابك كل ما تقول نعم لحاجة تاع الناس راك تقول لا لحاجة تاعك...
المشكل مراهش في وقتك برك... مرات تصيب روحك تخسر دراهمك و جهدك... في امور ما تعنيكش...
و دير في بالك الناس مراحش يعجبهم الحال لما تقول لا لا و خصوصا معارفك و اقاربك... و كاين لمايعجبوش الحال لأنك أنت تقدر تقول لا بينما هو ما يقذرش يقول لا لغيره...
7. المال أداة وليس هدف
في العشرينات غالبا نحوسو نلمو الدراهم باش نبانو بصح في الأربعين تفيق بلي الدراهم مجرد أداة باش تشري بيها حريتك ووقتك و تعيش الاز...
عادي انت أسعى و اجتهد و لكن ما تقلقش إذا فلان ربي فاتح عليه بمال وفير و انت لا في الاخير هذه الدراهم مجرد وسيلة و ربي يسخر في عباده باش يتوزع هذا الرزق... و هذا الشخص المرفه مجرد تسخير باش يدير مشاريع و ناس تسترزق معاه... و لكن الأهم انك راح تتحاسب على السعي... ماش لازم ديما النتيجة.
و كنصيحة مالية ما تخدمش باش تخبي دراهم لان مع التضخم ديما تنقص قيمتهم أفضل حاجة خدمهم و هلي الناس تسترزق معاك و راح تشوف العجب في حياتك...
و ختاما كاين حاجة اسمها تأجيل المتعة راك حاب تريح في الأربعين؟ لازم تتمرمد بذكاء في العشرينيات
1. اخطيك من العلاقات اخطيك من العلاقات إذا كنت حاب تنجح و توفر وقتك و طاقتك لحاجات اهم... المفيد كل حاجة في وقتها
