14/06/2026
حلوى راقية محشية تذوب في الفم للمناسبات 🌰🍫
_____تحضير العجينة ____________________________
في إناء نحط 125 غ زبده او مارغرين طريه.
مع مغرفه كبيره سكر ناعم و مغرفه صغيره تكون معمره مليح لافاني. نزيد صفار بيضة مع نص تاع بياض.( معنتها بيضة نقص منها النص تاع البياض برك.) ومغرفه كبيره تكون معمره مليح شوكولا لطلي ( شوكولا أتغيتني) ( اذا دوبليتوا المقادير ديرو كلشى زوج مرات والبيض ديرو بيضة كاملة مع صفار.) نخلطهم مليح بالباتور او فويي و نزيد مغرفه كبيره تاع كاكاو مر ونزيد 2 مغارف كبار نوازات ( البندق 🌰) محمصين و ومرحين مع قرصه ملح ( من أفضل ديروهم بالنوازات احسن من كاوكاو من أجل البنة ) ونخلط مليح ونزيد مغرفه كبيره نشأ ونزيد كاس فرينة تدريجيا و مغرفه صغيره خميره كيميائيه. ونبدا نطم العجينه ( بلا ما نعجنها ) ونزيد نصف كاس تاع الفرينة تدريجيا ( يعني دات كاس ونصف فرينة ) حتى نتحصل على عجينة طريه بزاف ( ديروها طريه على عجينه صابلي خاطرش فيها الكاكاو.)
_________تشكيل الحلوى ________________________
نكور العجينة و نحطها في لي مول تاع الحديد او تاع السيليكون أوفال ( بيضوي ) و نضغط عليها ندخلهم الفرن مسخنا مسبقا على 160 درجة يطيبوا من تحت. نعاود نشعلهم من الفوق ونطفي عليهم.
كي يطيبو نخليهم يبردو ونعمرهم بشوكولاطة لطلي بيضاء تاع نوازات ( او مرجان او ديرو حاجة لي تحبوها ) نعمرهم كامل
_____________تزين الحلوى____________________
نذوب 200 غ شوكولاطة بيضاء نزيد عليها شويا شوكولاطة بالحليب ( قطعة ) ( باش يجيني اللون هذاك الباج يشبه للون الحشوة ) نخلطم و نزيد عليهم 2 مغارف كبار زيت نخلط حتى يخفاف الڨلاصاج و نزيد كمية مليحة من نوازات محمصة ومرحية خشين ( اذا متوفرة او ندير كاوكاو محمص ومرحي خشين. ) و نخلطهم
نبدا نقلاصي. في الحلوى ( عمروها مليح. وخبطوا باش ما تجيكمش طبقه خشينه. وراح تنشف تم تم الشوكولاطة البيضاء)
نكمل كامل الحلوى تجيكم 17 حبة ( اذا دتو مارغرين 250 غرام راح تخرج لكم الضعف 34 حبة )
نزينهم بحبيبات نوازات 🌰 في الوسط او وريدات لكن الإختيار
@
