28/12/2025
طريقة التسوية اللي احنا ذكرنا وقت التسوية بتاعها ده بيكون لبيض في درجة حرارة الغرفة و اتحط في مياة بتغلي .. و دي طريقة من طريقتين معظم الناس بيستخدموهم عشان يسلقوا البيض.
الطريقة التانية هي اننا نبدأ بمياة فاترة و نحط فيها البيض و بعد كده نرفعهم ع النار. الطريقة دي بتقلل تشقق البيض و احنا بنسلقه لان الحرارة بتعلى تدريجيا مع البيض, بس الفكرة اننا مبنقدرش نطلع البيض بنتايج ثابتة كل مرة, لأن بيعتمد كل مرة على المياة هتبدأ تغلي امتى, و اخدت وقت قد ايه عشان تغلي .. وده مش بيضمن الحصول على النتايج اللي انتوا عايزينها و كمان ساعات الصفار بيطلع مستوي بزيادة و يتكوّن حواليه حلقات خضرا او رمادي.
طيب نعمل ايه عشان نقلل فرص تشقق البيض في الطريقة الاولانية؟ بننصحكم انكم تطلعوا البيض من التلاجة قبل عملية السلق على الاقل بعشر دقايق, و لما تيجوا تحطوه في المياة اللي بتغلي وطوا النار لدرجة غليان هادية (عشان الغليان القوي ميخليش البيض يخبط في إناء السلق و يتكسر و يتشقق) و نزلوا البيض بمغرفة بالراحة في المياة, و ابتدوا احسبوا فورا الدقايق للحصول على النتيجة اللي بتحبوها.
و من الثوابت ان لازم البيض يطلع على حمام مياة بتلج عشان نوقف عملية التسوية بعد رفعه من على النار لمدة دقيقة لدقيقتين و ده هيمنع ظهور حلقات خضرا او رمادي حوالين الصفار و يديكم نتيجة ثابتة للتسوية في كل مرة.
