13/10/2026
حماتي طلبت مني أسيب بيتي وأروح أقعد عند أمي..
أنا متجوزة بقالي 3 سنين، ومن أول جوازي وأنا بحاول أرضي حماتي على قد ما أقدر، عمري ما منعتها تيجي تزورنا ولا قصّرت معاها في حاجة.
من كام يوم، جت عندنا وأنا كنت تعبانة ومأجلة شغل البيت لبكرة، قامت بصّتلي وقالتلي: «هو ابني اتجوزك عشان يشيل همك وهم البيت كمان؟»!
سكتّ احترامًا ليها، لكن لما جوزي رجع حكتله اللي حصل، لقيته بيقولي: معلش يا حبيبتي، استحملي دي أمي
المشكلة إن تاني يوم حماتي كلمتني وقالتلي: «بصي يا بنتي، إنتِ شكلك مش مرتاحة معانا، روحي اقعدي عند أمك كام يوم لحد ما تهدي»!
ساعتها قولتلها: حاضر يا طنط، المرة دي مردتش أسكت، وقلتلها: طب يا طنط، لو بنت حضرتك مكانّي، كنتِ هترضَي إن حماتها تكلمها بالطريقة دي
قالتلي بعصبية إنتِ قصدك إيه بالكلام ده؟!
قولتلها: قصدي إن كل واحدة فينا ليها كرامتها، وأنا بحترم حضرتك ونفسي تحترميني أنا كمان.
جوزي عرف باللي حصل، وقال لأمه إن أسلوبها معايا غلط، ومن يومها وهي زعلانة منه وبتقوله إنه بقى بيسمع كلام مراته وبس!
بجد عايزة رأيكم.. انا كدا غلطانه ولازم اروح اصالحها ولا هي ال المفروض تيجي تتأسفلي ؟
