09/05/2025
https://www.facebook.com/share/p/19L2PE1dQc/
قصة السمنة والزيت ( السمنة والزبدة )
اللبن الجاموسى أو البقرى عبارة عن مستحلب وكلمة مستحلب يعنى ماء ودهن مع بعض لو أنت سيبت اللبن ساكن ولا حطيته بالتلاجه بيفصل الماء عن الدهن ويطلع اللبن دسمه والحقيقة فيه دراسات كتير خالص بيتنادى الناس ان لا تستخدم إلا اللبن كامل الدسم وانا شرحت ده سابقا عشان الفيتامينات الذوابه بالدهن المهم الدهون بتطلع فوق والماء ومكوناته بتكون تحت و بتطلع القشطه أو كريمة اللبن .
كريمة اللبن أو القشطة بالخض بتتحول لزبدة والزبدة دى يأخوانا عبارة عن ماء وسمنة و شوية بروتين ونشويات بسيطة أمهتنا بيسخنو الزبدة مع الملح عشان يطلعو السمنة صافية ويطلع الباقى المورتة أو عجوزة اللبن ودى مغذية جدا جدا جدا نشويات على بروتين وطعمها مملح ورائع بمعنى الكلمة .
يبقى حضرتك الطبيعى بتاعنا ايه الزبدة butter و السمنة أو ماتسمى الغى ghee و أنا فى الهند الهنود بيعتبرو السمنة البلدى دى هى هدية من السماء وهشرح ليه .
اللى مش طبيعى بقا جت فئة ظالمة وقالت لك طب الناس عاوزين سمنة عشان صناعات المخبوزات و تكون رخيصة بالبيوت فجابو الزيوت النباتية و حولوها كيميائيا بالهيدروجين والنيكل لمصيبة عظيمة اسمها السمنة النباتى المحولة ودى يأخونا سم بمعنى الكلمة دى بتدخل الجسم تترسب ع الشرايين وتعمل بيها التهاب مزمن وخلاص دول العالم كلها بتسن الأن قوانين لمنع استخدام الدهون النباتية المحولة نهائيا وطبعا الفئة الظالمة منستش تعمل المارجرين اللى هيه الزبدة النباتى المحولة أيضا اللى كانت معمولة فى فرنسا كبديل للزبدة عشان يوفرو الفلوس فى أكل عساكر الجيش الفرنسى و عشان عامة الشعب يلاقى حاجة دسمة ياكلها و تكون رخيصة وخلاص لكن الناس الغنية متكلش القرف ده .
المصيبة ان محدش عارف تاريخ المصايب دى خشو اقرو و شوفو بنفسكم .
طيب ايه هيه فوايد السمنة البلدى و مسموح ليا بقد أيه فى اليوم :
١- منجم لفيتامينات الدهون الف لعينك ودال لعظمك وكاف لشرايينك و هاء لكبدك .
٢- علاج غير عادى للإلتهابات و منشط للمناعة و بيديها قوة غير عادية وجرب اما تتحرق تحط حتة سمنة بلدى ع الحرق وهتشوف السحر وياسلام لو السمنة عليها حتت عسل وبعد ماتتعالج من الحرق يبقا هات رغيف عيش وغمس .
٣- لو شعرك جاف ومقصف وضعيف ولا بشرتك جافة يبقى عندك نقص فى السمنة البلدى فى الدم يبقى افتحى كبسولات فيتامين هاء وحطيها على السمنة البلدى و ادهنى شعرك ولا جلدك دا كريم مرطب ومنعم غير عادى شعرك هيبقى حرير حرير .
٤- حمض البيوتريك الموجود فى السمنة بيدعم صحة الجهاز الهضمى ماهى الفلاحين صحتها ضاعت اما سابو السمنة البلدى دول بيطبخو بالنباتين النهاردة .
٥- فى البرد اما مناخيرك تنسد نقطة واحدة من السمنة البلدى دافية مش سخنه فى المناخير تسلك على طول وبلاش النقط اللى بتدمر الأغشية بتاعت الأنف دى .
٦- بتدعم جهازك العصبى دعم فوق الخيال لا رعشة ولا ضعف ولا هزال مفيش الكلام ده دى سمنة يابا .
٧- بص عظمك هيبقى حديد ومش هتخلع سنة من سنانك السمنة فيها فيتامينات العظم كاف ودال.
طيب اخد منها اد ايه فى اليوم واكون فى السليم ؟
معاك لغاية ١٠٪ من سعراتك الحرارية سمنة بلدى بأمان تام يعنى لو انت بتاخد ٣٠٠٠ سعر ليك ٣٠٠ سعر سمنة بلدى حوالى ملعقتين كبار وعيشو حياتكم ياجماعة متخافوش من السمنة البلدى أنا مفيش نقطة كتبتها فى المقال ده الا وليها مرجع اللى بيحذرك من السمنة البلدى والله مايعرف يعنى ايه تغذية .
شيرو لغيركم و عاوزينكو كلكم أقويا وعظمكم قوى وبشعر ناعم زى الحرير .
دمتم بصحة ❤️
الدكتور أحمد أبو النصر
