04/03/2025
❤️ شكرا لدعمكم و حبكم 🥰
في كل ركن في هذا العالم، أم تُفكر في مستقبل أفضل، تتحلى بالصبر والعزيمة، تنعم بدفء البيت الذي تصبه عليه، لم يكن الأمر مجرد صُنع مخبوزات بل لمسة بها مزيج من الحب أيضًا.
أ/ تغريد نموذج للأم الحالمة التي لم تفقد الأمل بعد، لم تر أن الأمر توقف عند كونها أم ربت وعلمت وزوجت أولادها، بل جعلت طبخها وبيعها للمخبوزات ونس أيضًا لها مع ذلك.
أ تغريد تبلغ من العمر تسعة وخمسين عامًا، لديها فتاة وشابين، تخرجت من جامعة طنطا سنة 1987 .
من أبسط الأشياء تُصنع المشاريع.
"أنا بحب أعمل مخبوزات زي مثلًا: قرص بالجبنة، كرواسون، باتيه، ميني بيتزا، حاجات زي دي، وسميت المشروع Tag نسبة لأسمي.
تأتي الفكرة لكن لابد من داعم لها.
"ولادي هما اللي شجعوني أبدأ وأعملها وقالولي إني ناجحة فيها وشاطرة فكملي، وكمان صحابهم بيحبوني وبيحبوا أكلي فبقوا مشجعين ليا."
هل لازم علشان أنجح أبدأ كبير؟
"أنا بدأت من البيت ومخرجتش برا، أنا بدأت بالبيتزا من زمان وكان اسم مختلف عن دا "بالهنا" وكنت بوديها للمحلات من فترة طويلة، بس لظروف صحية إيدي تعبتني وعملت عملية ووقفت ورجعت تاني الفترة دي أعمل."
لابد من عوائق حتى تسير الأمور كما يُرام بعد وقت.
"التسويق هو العائق بالنسبالي حاليًا، لكن بنحاول نوصل عن طريق معارفنا وبرضو السوشيال ميديا وإيمان زوجة ابني هي اللي بتساعدني وهي اللي بتتابع معايا الصفحة وبتصور اللي أعمله وتنزله."
لو رجع الزمن هنتمنى نبدأ من بدري؟
"كنت هختار أبدأ من بدري عن كدا على الأقل وأنا صغيرة وأنا بصحتي، ماكنتش هستنى لدلوقت."
هل في نية إنك تتوسعي وتفتحي مكان مخصص؟
"ليه لا والله، لو المشروع كبر أجيب ناس وأعلمها ونعمل سوا وربنا ييسر".
لكل شيء وقته: بين وقت الأهل والشغل.
"طبعًا باخد بالي من بيتي ونضافته وتحضير الأكل وبحكم إنهم كبار فدا مش مأثر أوي على الشغل، هما اللي بيشجعوني."
لمستنا للشيء هو اللي بيحليه.
"بحب أقلد الوصفات اللي بشوفها بالظبط علشان تطلع مظبوطة ويمكن دا سبب نجاح الوصفة، لكن برضو نَفَسك أنتِ اللي بيختلف، وبحب كل شيء يطلع مظبوط زي ما بعمله لولادي ولبيتي بالظبط."
نصيحة حابة توجهيها لكل أم؟
"ابدأي وإنتِ صغيرة، اوعي تستني أما تكبري وتبقي مش قادرة، يعني حاولي والباقي على ربنا."
لو عايزين تعرفوا أكتر او تطلبوا منهم ممكن تزورهم في صفحتهم:
https://www.facebook.com/profile.php?id=61571387300276
مقابلة: مي عبد الرازق.
