09/10/2026
ODUU AMMEE Itoophiyaan Of-Ittisuu Irraan Kan Hafe Filannoo Biraa Hin Qabdu Dr. Geediyoon Ximotewos
Ministirri Dhimma Alaa Itoophiyaa, Dr. Geediyoon Ximotewos, waraanni Ertiraa daangaa Itoophiyaa cabsuun gara naannoo Tigraay seeneera jechuun Mana Maree Nageenyaa Dhaabbata Mootummoota Gamtoomanii (UNSC) xalayaa barreessaniiru.
Itoophiyaan weerarri irratti raawwatameef of-ittisuu irraa kan hafe filannoo biraa akka hin qabne xalayaa kanaan ibsuu ishee BBC’n gabaaseera.
Akka ibsa xalayaa Dr. Geediyoon keessatti dhiyaateetti, Ertiraan sochii waraanaa ishee cimsuun, humna waraanaa makaanayizdii dabalatee, naannoo Tigraay keessatti godinoota sadii irratti gara keessa Itoophiyaatti fageenya kiiloo meetira 30 hanga 60 seensisteetti jedhameera.
Ministirichi, gochi kun birmadummaa Itoophiyaa fi daangaa ishee kan sarbu ta’uu ibsuun, seera idil-addunyaa fi Heera Dhaabbata Mootummoota Gamtoomanii kan faallessu ta’uu eeraniiru.
Haala kanaan, Itoophiyaan mirga seeraa of-ittisuu isheetti akka fayyadamtu dirqama keessa galuu dandeessi jechuun ibsaniiru.
Dr. Geediyoon, Itoophiyaan dhiibbaa fi tuttuqaa Ertiraa obsaa fi of-qusannaa dheeraan dandamachaa turuu ishee yaadachiisuun, Mana Maree Nageenyaa Dhaabbata Mootummoota Gamtoomanii tarkaanfii of-ittisuu Itoophiyaan fudhachuu dandeessu akka deeggaru fi cinaa ishee akka dhaabbatu gaafatan.
