10/07/2026
Addunyaa kubbaa miilaa, bakka beekamtiin, maallaqni fi qananiin sammuu namaa hatee to'atu kana keessatti, dargaggeessa haala kanaan guutummaatti faallaa ta'ee fi eenyummaa addaa qabutu jira. Taphataa beekamaa fi jabaa garee biyyaalessa Morookoo, maqaan isaa Nuseeyir Mazraawwii jedhamuudha.
Deeggartoota isaa biratti maqaa masoo "Haajii" jedhamuun beekama. Maqaan kun kan kennameef tasgabbii fi amala isaa gaarii qofaaf osoo hin taane, jaalalaa fi hariiroo jabaa inni amantii isaa fi Qur'aana waliin qabuufidha. Inni, ogeessa kubbaa miilaa ta'uu cinaatti, nama jireenya iimaanaatiin dhuunfatameedha.
Kan dhalate bara 1997 biyya Hoolaandi (Netherlands), magaalaa Leiderdorp keessatti maatii godaantota Morookoo irraa yoo ta'u. Nuseeyir, jalqaba irratti barnoota isaa gama saayinsii barnootaatiin (education) itti fufuu yaalee ture. Garuu, yeroo shaakalli kubbaa miilaa fi barnoonni isaa wal jeequ, inni onnee isaa dhaggeeffatee dirree kubbaa miilaatti guutummaatti of kenne.
Imalli ogummaa isaa kan eegale kilabii guddicha Hoolaandi, Aayaaks Amistardaam (Ajax Amsterdam) keessattidha. Dargaggummaan gara kilabichaatti makamee, suuta suutaan of ijaaraa gara garee jalqabaatti (first team) guddachuu danda'e. Inni miseensa dhaloota warqee Aayaaks, warra bara sana Awurooppaa ajaa'ibsiisanii fi hanga walakkaa xumuraa Shaampiyoonsi Liigiitti (Champions League) gahan sanaa ture. Biyya Hoolaandi keessattis waancaa hedduu dhuunfachuu danda'ee jira.
Guddina kana hordofee, bara 2022tti gara kilabii guddicha Jarmanii, Baayern Miwuniik (Bayern Munich) tti ce'e. Achiis muuxannoo haaraa horachaa, bona bara 2024tti kilabii beekamaa Ingiliiz, Maanchisteer Yuunaayitiid (Manchester United) tti dabalame. Dirree irratti, iddoowwan ittisaa (defense) adda addaa irratti taphachuu danda'uun isaa fi dandeettiin teeknikaa inni qabu, kilaboota kana hunda keessatti taphataa murteessaa isa taasiseera.
Dhimmi biyyaalessummaa yeroo ka'u, Nuseeyir murtoo onnee fi hidda dhiiga isaa calaqqisiisu fudhate. Nuseyir taphattoota biroo irraa kan adda taasisu Nama amantii isaa akkaan jabeessuu fi jaallatuudha.
Nuseyir Jaallattootaafi Dinqisiifattoota isaa hedduu biratti akkasumas taphattoota hiriyoota garee isaa biratti maqaa masoo "Haaji" jedhamuun beekkama.
