21/09/2025
කොපි කැට්
"අම්මේ මට ඉක්මනට මැරි කරන්න ඕන." ටවුමට ගිහින් ආපු ගමන් වීණා කිව්ව දේ එකපාරට ශ්රියානිට තේරුණේ නැහැ.
"මොකක්? ඒ පාර මොකද්ද හැදුන පිස්සුව. "
"පිස්සු නෙමේ මට බදින්න ඕන කියල කිවේ. "
" ඔව් මට එක ඇහුණා, මේ හදිස්සියේ මොකද?" ශ්රියානි ටිකක් තිගැස්මෙන් ඇහුවේ. " නෑ... මට හිතුණා. අම්මලට පුළුවන් නේ දුලන්තලගේ අම්මලා එක්ක කතා කරගෙන ඉක්මනට වෙඩින් එක ලෑස්ති කරන්න."
" එකත් හොදයි. කොහොමත් ඕව කල් අරින්න හොද නැ. පහු පහු වෙනකොට කොහු කොහු වෙනවා. කියනවනේ. "
" කොහු කොහු නෙමේ ශුවර් එකට නීලා අක්ක බදින්න ලෑස්ති වෙනවා ඇති. එකයි මෙයාට මේ හදිස්සිය. නීලා අක්කා මොනාද කරන්නේ , මෙයාට ඒක කරන්න ඕන වෙනවා." එහෙම කිව්වේ මෙච්ච්ච්ර වෙලා ටීවී එකේ කතාවක් බල බල හිටපු ශ්රියාණි ගේ පොඩි දුව තමරී.
" අනේ මේ තමුසේ කට වහගන්නවා. නිලා තමුන්ට ලොකු උනාට මට ලොකු නෑ " වීණා කිව්වේ පිපිරෙන තරහින්.
“ඔව් ඔව් මට ලොකු නෑ අනේ කාටද දන්නේ නෑ ලොකු. නීලා අක්ක මොනාද කරන්නේ ඒ ඔක්කොම කරන්න හිතෙන්නේ මට වෙන්න ඇති . නීලා අක්ක ඒ ලෙවල් වලට සයන්ස් කරා . ඔයා බැරි මර ගාතේ සයන්ස් කරන්න ඉහින් ලයිට් කණු 3 ක් ගෙනාවා. ඊට පස්සේ මොකද්ද අර කෝස් එකක් නීලා අක්ක කරනවා කියල එක කරන්න ඕන කියල ලක්ෂ ගාණක් ඉවර කරා. තව මම දෙන්නන් පොඩි කාලෙ ඉදන් ඔයා කරපු මරි වැඩ ලිස්ට් එකක්ම. ඔක්කොම නීලා අක්ක කොපි කරන්න ගිහින්." තමරි කියාගෙන කියාගෙන ගියේ වීණා තවත් තරහ ගස්සවන ගමන්.
" මම කරන්න යන වැඩ ඔක්කොම අවුල් කරන්නේ නීලා තමයි." වීණා කිව්වේ කට ඇද කරගෙන.
" පුහ් .. මෙන්න වැඩක් , තමන්ට කරන්න බැරි වැඩ ඔක්කොම කරලා දැන් ඒවා නීලා අක්ක පිට පටවන්න එපා. එයා යසට ඔය කරන දේවල් පිලිවලට කරගෙන ඉන්නේ." තමරි කතාව නවත්තන්න සුදානමක් නැති නිසා ශ්රියානි ට මැදට පනින්න සිද්ද උනා. " "කටවහගන්න දෙන්නම. මොන වැදගත් දේ කතා කරන්න ගියත් කොහෙන් හරි දෙන්න රණ්ඩුවක් නං පටන් ගන්නවා. "
" ඇති යන්තන් අම්මට මේවා වැදගත් වගේ පේනවා නැත්තන් ඉතින් ඔයාටත් ලොකු නීලා යි සීතා පුංචි නේ " විණා ගස්සාගෙන ගෙට ගියේ ශ්රියානි නිරුත්තර කරමින්.
නීලා කියන්නේ ශ්රියානිගේ එකම නංගිගේ දුව. වීණා යි නීලා යි ඉපදුනේ එකම අවුරුද්දේ. මාස තුනක වෙනසක් තියෙන්නේ. පොඩි කලේ ඉදන් හැදුනේ එකට. එක ලග ගෙවල් නිසා එකම මොන්ටිසෝරියට වගේම දෙන්න ගියේ එකම ඉස්කෝලෙට. පොඩි කලේ එකම විදිහට ඇදුම් ඇදගෙන යනකොට දකින අය හිතුවේ නිවුන්නු කියලා. පහු වෙනකොට නං රුපයෙන් වගේම වැඩ කටයුතු වලිනුත් දෙන්න අතර ලොකු වෙනසක් පේන්න පටන් ගත්ත. කොහොම උනත් නීලා සැහෙන්න ඉදිරියෙන් සිටියදී වීණා නිකන්ම නීලව අනුගමනය කරන කෙනෙක් බවට පත් උනා. මොකද පවුලේ හැමෝම නීලා කරන දේවල් නිතරම අගය කරා. විණා නීලා කරන දේවල් කරන්න ගිහින් එක්කෝ මගදී අත් හැරියා . නැත්තන් පවුලේ අයගේ හිනාවට ලක් උනා. ඒ උනත් නීලා කරන දේම කරන්න උත්සහ කරනවා මිසක් වීණා කිසි දෙයක් තමන්ට කියල හිතලා මේ වෙනතෙක් කරලා නැ. එත් මේ පාර නං එහෙම නැහැ. විණා මේ පාර නීලා ට කලින් කසාද බදින්න යන්නේ.
ඉතින් මේ කසාද බදින්න විණා ගත්ත තීරණය හරිම ප්රෙහෙලිකාවක් උනා . එකක් වීණා යන්තම් අවුරුදු 24 උනා විතරයි. තාම රැකියාවක් කරන්නෙත් නැ. රැකියාවකට යන්න සුදුසුකමක් හදා ගෙනත් නෑ . ඔක්කොටම වඩා දුලන්ත මුණ ගැහිල තාම මාස දෙකක්වත් නෑ. ශ්රියානි ගේ මහත්තය නැවක වැඩ කරන්නේ. ඉතින් මාස 6 කට සැරයක් තමයි ගෙදර එන්නේ. ඒ නිසා ගොඩක් වෙලාවට සීතා නංගි එක්ක කතා බහ කරලා තමයි ශ්රියාණි වැඩ කරන්නේ. " ඔය මුහුදේ දුක් විදින මනුස්සයාගේ ඔලුවට මේ හැම දෙයක්ම දාන්න පුලුවන්ද "කියල ගොඩක් වෙලවට අක්කා නගෝ දෙන්න පවුලේ දේවල් කතා කර ගන්නවා. එත් මේ පාර එකත් බෑ . වීණා ගේ ලොකුම කොන්දේසිය වෙඩින් කාඩ් බෙදනකන් පුන්චිලාට කිසි දෙයක් කියන්න බැ කියන එක. මේ හැම දෙයක්ම වෙන්නේ නුහුරට නිසා ශ්රියානි හිටියේ ලොකු පීඩනයක.
වීණා වෙඩින් එකේ කටයුතු එයාට ඕනි විදිහට කරන්න පටන් ගත්තම ශ්රියාණි ගේ ඔලුව තව විකාර උනා . සමහර දේවල් වලට කරන වියදම් වැඩි නැද්ද අහන්න ගිහින් අන්තිමට ගෙදර එකම කාලගෝට්ටියක් උනා. මේ මොනවත් ගැන කිසිම ගාණක් තිබ්බේ නැත්තේ වෙන්න බෑණා දුලන්ත ට විතරමයි. එයා මේ ඔක්කොම මැද්දෙ ක්රිකට් මැච් බැලිල්ලයි යාලුවෝ එක්ක අතන මෙතන යන එකයි නං ගානට කරගෙන ගියා. ශ්රියාණිලගේ ගෙදර ආවත් වැඩිපුර කරේ තමරි එක්ක වීඩියෝ ගේම් ගහන එක තමයි.
මේ ඔක්කොම හැසිරීම් වලින් හෙම්බත් වෙලා හිටපු ශ්රියාණි ට දෙලොව රත් උනේ විණා ප්රි ෂුට් එකට කරන්න හදන වියදම දැකල
" ඔයාට පිස්සුද පුතේ මෙච්චර වියදමක් මේ පොඩි වෙලාවකට "
" පොඩි? කොහෙද පොඩි වෙනම ඇල්බම් එකකුත් හදල වෙඩින් එක වෙලාවේ ලස්සනට හෝල් එකේ ප්රසන්ට් කරනවා. ඒවා නැතුව වෙඩින් ගන්නේ කවුද අම්ම මේ කාලේ " වීණා කතාව පටන් ගත්තෙම නොරුස්නාවෙන්.
"හරි හරි ඒත් මෙච්චර ගාණක්. මොකට ද මේ තැන් හතරකට ගිහින් ෂූට් කරන්නේ . මේ එකක් හපුතලේ යන්නත් දාගෙන." ශ්රියාණි ඉන්වොයිස් පත දිහා බලාගෙන කිවේ කම්මුලට අතකුත් තියාගෙන.
"ඔව් ඉතින් බදින්නේ එක පාරයි. එක මට ඕන විදිහට හොදටම වෙන්න ඕන. "
" මෙහෙම මගුල් කරන්න නං තාත්තාට නැවේ වැඩ කරලා විතරක් මදි නැවක් විකුනන්නත් වෙයි " තමරි කතාවට එකතු වෙමින් කිවේ වීණා තවත් තරහ ගස්සවමින්.
" ඔයාලාට ඕනි හැමදාම මාව පාච්චල් කරන්න. මම කරන හැම දේම සවුත්තු කරන්න. මට නීලා ට කලින් මැරි කරන්න ඕන. එයාට ගන්න බැරි විදිහේ වෙඩින් එකක් ගන්න ඕන.එයාටයි පුංචිටයි පේන්න " වීණා කියාගෙන යද්දී අන්තිමට හැඩුම් ස්වරයක් එකතු උනා කට හඩට.
" මම කිව්වේ... මම කිව්වේ අම්මේ, මේ පාර නීලා අක්කා කොපි කරන එක අත ඇරලා එයත් එක්ක තරග කරන්න පටන් අරන්. යසයි වැඩේ. ඔයාට අක්කේ මොහොතකට ඕව අත ඇරලා පොළොවේ පය ගහලා තීරණ ගන්න බැරිද ?"
" මේ තීරණ ගත්තේ පය ගහල තමයි"
" ඔව් ඔව් ඔයා නං පය කොහේ හරි ගහගෙන ඉන්නවා ඇති. මගේ මස්සිනා නං ඔහේ පාවෙනවා. ඉස්සර වෙලා ඌව බිමට අරන් ඉන්න වෙයි " තමරි කිවේ සමච්චල් හිනාවක් එක්ක.
" එක නං පුතේ ඇත්ත. ඒ ළමයට මේ කිසි දෙයක ගානක් නැනේ. ඒ ළමයාගේ දෙමවපියන්ට වගකුත් නැ. ඔයා මේ මොනවා කරගන්න හදනවා ද කියල මට තේරෙන්නේ නෑ "
අම්මලා දුලා ගේ කතාව නැවතුනේ එක පාරටම නීලා යි නිලාගේ අම්මයි ගෙදර ට ඇතුළු වෙනවා දැක්කම.
"අක්කේ මොකද මේ සද්දේ පාරට ඇහුන කට්ටියගේ බර කතාව" නිලාගේ අම්ම ප්රියා සාලෙට ගොඩ උනේ එහෙම කියාගෙන.
"අපි පුංචි එහෙම තමයි බරසාර කතා කරන්නේ." තමරි කිවේ හිනා වේවි. වීණා නං හිටියේ තමන් කිව්වා දේවල් නිලලට අහුඅනද දන්නේ නැහැ කියල දෙගිඩියාවෙන්.
" නංගි ගොඩ දවසකින් මේ පැත්තේ. මෙච්චර ලග ඉදලත් මම නීලා දුව දැක්කේ මාස ගානකට පස්සේ ද කොහෙද !"
" ඔව් අක්ක පහු ගිය ටිකේ මෙයා හිටියේ නැ. ෆයිනල් එක්සැම් තිබ්බ නේ. දැන් ඔක්කොම ඉවර වෙලා ලොකු අම්මලට සුභ ආරංචියක් කියන්න ඇවිත් ඉන්නේ "
ඒ පාර නං වීණා ගේ කන් දෙකත් රත් උනා.` එයත් බදින්න යනවා කියන්නද යන්නේ? `
නීලා හරිම ලජ්ජාවෙන් හිනා වෙලා " නෑ ලොකු අම්මේ මම රට යනවා. හයර් ස්ටඩිස් වලට ඔසී යන්න ස්කොලේර්ශිප් එකක් ලැබුණා"
වීණාගේ හිත මොහොතින් ඉරිසියාවෙන් පිරිලා ගියා. හැබැයි ඒ එක්කම හිතුන දැන් රට ගිහින් එනකොට නාකි වෙලා තමයි මගුල් ගන්න වෙන්නේ කියලා. සමහර විට කසාද නොබැදම ඉන්නත් ඉඩ තියෙනවා කියල හිතන කොට කට කොනින් පොඩි හිනාවකුත් ගියා.
" මෙයා මේ කියනව ඉතින් යන්න ඉස්සර ලොකුවට නැති උනත් පොඩිවට වෙඩින් එක ගන්න ඕන කියලා. ඉතින් ලබන මාසේ නැකත් දවසට අපේ ගෙදර පවුලේ අය එකතු වෙලා වැඩේ කරමු කියල තමයි අපි කතා උනේ"
ඒ පාර නං විණාට අහසේ තරු දවල් පෙන්න ගත්තා . " ක .. ක ..කවද්ද කවද්ද වෙඩින් එක ? " විණා ඇහුවේ සැහෙන කලබලයකින්
"ලබන මාසේ 15 " නීලා කිව්වේ හිනා වේවි.
"ඒ කියන්නේ ඔයා මට කලින් .." විණගේ ඇස් කදුළු වලින් පිරෙන්න වැඩි වෙලාවක් ගියේ නැ. හිතේ තියන තරහ දුක ඉරිසියාව ඔක්කොම එකතු වෙච්ච් කදුළු කම්මුල් දිගේ බේරෙන්න පටන් ගත්තා. හැමෝම තුෂ්නිම්භූත වෙලා වීණා දිහා බලන් ඉන්නකොට ඒ කදුළු වල නියම අරුත තේරුනේ තමරිට විතරයි
