1884 წელს დავით სარაჯიშვილმა საფუძველი ჩაუყარა კონიაკის კლასიკური ტექნოლოგიით წარმოებას რუსეთის იმპერიაში. პირველი პროდუქტი 1887 წელს თბილისში დაარსებულმა ქარხანამ გამოუშვა.
სარაჯიშვილის კომპანია სწრაფად გაიზარდა და გაფართოვდა რუსეთის იმპერიისა და ევროპის მასშტაბით. თბილისში, მოსკოვში, პეტერბურგში, ერევანში, კიევში, ვარშავაში, ბაქოში, რიგაში, ხარკოვში, ვლადიკავკაზში, ოდესაში, ფეოდოსიაში, სამარაში
, კიშინიოვში, პეტროვსკსა და ჩარგოუში განლაგდა სპირტსახდელები, სასაწყობო მეურნეობები და სარეალიზაციო ქსელი, სადაც იყიდებოდა დავით სარაჯიშვილის კომპანიის მიერ წარმოებული პროდუქცია: კონიაკი, არაყი, ღვინო,ლიქიორი, რომი, აბსენტი და სხვა სპირტიანი სასმელები.
1889-1912 წლებში სარაჯიშვილის კონიაკმა საერთაშორისო გამოფენებზე პარიზში, ჩიკაგოში, ბრიუსელსა და სხვა ქალაქებში ოქროს მედლები მოიპოვა.
1913 წელს კომპანიას რუსეთისთვის მაღალხარისხიანი ქართული კონიაკის მრავალწლიანი სტაბილური მიწოდებისთვის იმპერატორის კარის მიმწოდებლის სტატუსი მიენიჭა.
სარაჯიშვილის კომპანიამ წლების მანძილზე მრავალ განსაცდელს გაუძლო: ომებსა და
დარბევებს, აკრძალვებსა და მშრალ კანონებს. მიუხედავად ამისა, მაინც იზრდებოდა და ვითარდებოდა.
1954 წელს თბილისში დასრულდა ახალი საწარმოს მშენებლობა, სადაც კომპანიის კუთვნილ, სხვადასხვა ქალაქში დაცულ მარაგებს მოუყარეს თავი.
საბჭოურ ხანაში დავით სარაჯიშვილის კომპანიის მემკვიდრე გახდა თბილისის კონიაკის ქარხანა, რომელიც 1995 წელს კერძო საკუთრებაში გადავიდა. ახალი მფლობელის
ინიციატივით მას დაუბრუნდა სარაჯიშვილის სახელი. თბილისის კონიაკის ქარხნის ბაზაზე ჩამოყალიბდა სააქციო საზოგადოება "სარაჯიშვილი", რომელიც დღემდე კონიაკის წარმოების ლიდერია საქართველოში.
სარაჯიშვილის სპირტსაცავებში ძველდება უნიკალური ქართული ღვინის სპირტები, რომლებიც ერთმანეთისგან როგორც ასაკით, ისე გეოგრაფიული ადგილწარმოშობით განსხვავდება. მათ შორის ყველაზე ძველი 1893 წელს სოფელ დიღმის ღვინომასალებიდან თავად დავით
სარაჯიშვილის უშუალო ხელმძღვანელობითაა გამოხდილი.
სწორედ სპირტების ეს მდიდარი ბაზა ქმნის კომპანიაში წარმოებული პროდუქციის უნიკალურობას.
სს "სარაჯიშვილი" დღემდე ინარჩუნებს დავით სარაჯიშვილის მიერ ჩამოყალიბებულ კულტურას. საუკუნოვანი ტრადიციებისა და თანამედროვე ტექნოლოგიების გამოყენება, უძველესი, მრავალფეროვანი სპირტების რეზერვების არსებობა და ტექნოლოგთა პროფესიონალიზმი საშუალებას აძლევს "სარაჯიშვილის სახლს" უმაღლესი ხარისხის პროდუქცია აწარმოოს და ლიდერად დარჩეს.