27/11/2025
मुंबई डबेवाल्यांच्या संस्थापकांच्या स्मारक भूमिपूजनाचा सोहळा उत्साहात पार
मुंबई डबेवाल्यांच्या शिस्तबद्ध, समयनिष्ठ आणि पर्यावरणपूरक कार्यसंस्कृतीला आधुनिक व्यवस्थापनाची नवी चौकट देणारे आद्य मार्गदर्शक स्व. महादू हावजी बच्चे यांच्या स्मरणार्थ त्यांच्या जन्मगावी उभारण्यात येणाऱ्या स्मारकाच्या भूमिपूजनाचा सोहळा भक्तिमय आणि उत्साहपूर्ण वातावरणात संपन्न झाला.
शतकीय परंपरेचा वारसा जपणारी मुंबई डबेवाला सेवा आज जगभर Zero Error Service म्हणून ओळखली जाते. महादू हावजी बच्चे यांनी स्थापन केलेल्या ‘मुंबई जेवण डबे वाहतूक मंडळ’ आणि ‘नूतन मुंबई टिफिन बॉक्स सप्लायर्स चॅरिटेबल ट्रस्ट’च्या माध्यमातून डबेवाल्यांची सेवा संघटनशक्ती, शिस्त, सामूहिक जबाबदारी आणि समाजाभिमुख उपक्रमांच्या आधारे आदर्श व्यवस्थेत विकसित झाली आहे.
धर्मशाळा, अन्नछत्र, रोटी बँक, पर्यावरण उपक्रम आणि सामाजिक बांधिलकीची सातत्याने जोपासना केल्याबद्दल डबेवाल्यांच्या कार्याचे विशेष कौतुक या प्रसंगी करण्यात आले.
डबेवाल्यांच्या अद्वितीय कार्यपद्धतीला आजवर ७०० हून अधिक राष्ट्रीय-आंतरराष्ट्रीय पुरस्कार, तसेच प्रिन्स चार्ल्स आणि रिचर्ड ब्रॅन्सन यांसारख्या जागतिक नेत्यांची प्रत्यक्ष दखल मिळाली असून, त्यांच्या सेवेची ख्याती आंतरराष्ट्रीय स्तरावर अधिकाधिक दृढ झाली आहे.
या स्मारक भूमिपूजन सोहळ्यास आमदार श्रीकांत भारतीय, आमदार बाबाजी शेठ काळे, जि.प. सदस्य अतुल भाऊ देशमुख, जिल्हा नियोजन समिती सदस्य शरद बुट्टे पाटील, इंजि. दिलीप शेठ मेदगे, माजी संचालक कात्रज दूध संघ शेखर भाऊ शेटे, संचालक अरुण शेठ चांभारे, माजी जि.प. सदस्य जयसिंग शेठ भोगाडे, भोसरीचे माजी नगरसेवक रवी भाऊ लांडगे, उद्योगपती किरण शेठ मुके, मुंबई डबेवाला संघटना अध्यक्ष उल्हास मुके, मंडळ अध्यक्ष रामदास करवंदे, तसेच अनेक मान्यवर, पदाधिकारी आणि स्थानिक ग्रामस्थ मोठ्या संख्येने उपस्थित होते.
सामाजिक, राजकीय आणि धार्मिक क्षेत्रातील विविध पदाधिकारी, सरपंच, चेअरमन आणि तालुक्यातील जनतेच्या उत्स्फूर्त सहभागामुळे हा सोहळा अधिक भव्य, ऐतिहासिक आणि अविस्मरणीय ठरला.
पारंपरिक ढोल-ताशे, लेझीम आणि दिंडीच्या गजरात पार पडलेला हा कार्यक्रम डबेवाल्यांच्या सेवाभाव, सांस्कृतिक परंपरा आणि महादू हावजी बच्च्यांच्या प्रेरणादायी कार्याची जिवंत साक्ष ठरला. प्रस्तावित स्मारक पुढील पिढ्यांसाठी प्रेरणास्थळ ठरेल, अशी सर्वमान्य भावना व्यक्त करण्यात आली.
यावेळी भाषण करताना आमदार श्री श्रीकांतजी भारतीय म्हणाले की,
“हे स्मारक केवळ प्रेक्षणीय स्थळ न राहता प्रार्थनेचे आणि श्रध्येचे स्थान व्हावे. डबेवाल्यांच्या या पवित्र वास्तूच्या उभारणीत सर्वांनी यथोचित सहाय्य करावे. तसेच डबेवाल्यांच्या घरांच्या भूमिपूजनाचा कार्यक्रम पंतप्रधान आदरणीय नरेंद्र मोदीजी यांच्या हस्ते पार पाडण्यासाठी आम्ही वचनबद्ध आहोत.”
या आशावादी घोषणेने सोहळ्याला एक विशेष ऊर्जायुक्त दिशा मिळाली. कार्यक्रमाचे संचलन आणि आभारप्रदर्शन डबेवाल्यांच्या सेक्रेटरी श्री.किरण गवांदे यांनी केले.
