09/10/2026
අද මම හැදුවෙ අපේ සිංහල වෙදකමට අනුව ඉතාම ගුණදායී පාරම්පරික කැඳක්.
අපි පුංචි කාලේ අම්මා හදලා දුන්නට පස්සෙ, මමත් අදම තමයි පළමුවරට හැදුවෙ.
වර්තමානයේ වැඩි පිරිසක් තිබ්බටු ගෙඩි ආහාරයට ගත්තට තිබ්බටු කොළ ඖෂධීය ගුණයක් ඇති කොළ වර්ගයක් වශයෙන් නොදන්නා තරම්.
ඉතින් අද හැදුවෙ මේ තිබ්බටු කොළ කැඳ.
ඇත්තටම මේ කැඳ එක මම බීල තියෙන කොළ කැඳ වලින් රසම කැඳ එකක්.
ඉතින් තවත් කොළ කැඳ ලෝලියෙකුට හදල බලන්න ඔන්න හදන හැටිත් පහලින් සඳහන් කළා.
තිබ්බටු කොළවලින් ඖෂධීය කැඳක් පාරම්පරික ක්‍රමයට සකස් කරගන්නා ආකාරය
මෙම කැඳ කල්ගත වූ සෙම, ඇදුම, කැස්ස සහ පීනස් රෝගීන්ට උදෑසන ආහාර වේලක් ලෙස ඉතාම ගුණදායකය.
අවශ්‍ය ද්‍රව්‍ය:
* තිබ්බටු කොළ (මිටක් පමණ)
* රතු කැකුළු සහල් (කෝප්ප 1/2)
* මිටිකිරි (උකු පොල්කිරි) සහ දියකිරි
* සුදු ලූනු බික් 3-4 ක්
* ඉඟුරු කෑල්ලක්
* ගම්මිරිස් ඇට කිහිපයක්
* ලුණු (රස පදමට)
සාදාගන්නා ආකාරය:
👉රතු කැකුළු සහල් හොඳින් සෝදා, එයට තලාගත් සුදු ලූනු, ඉඟුරු, ගම්මිරිස් සහ දියකිරි (නැතහොත් වතුර) එකතු කර සහල් ඇට හොඳින් බිඳී යන තෙක් (බොඳ වන තෙක්) ලිප තබා තම්බා ගන්න.
👉තිබ්බටු කොළ හොඳින් සෝදා, වතුර ස්වල්පයක් එකතු කර වංගෙඩියක කොටා හෝ බ්ලෙන්ඩර් කර එහි පිරිසිදු යුෂ පෙරා වෙන්කර ගන්න. (ඖෂධීය ගුණය රැක ගැනීමට බ්ලෙන්ඩර් කරනවාට වඩා කෙටීම වඩාත් සුදුසුය).
👉බත් එක හොඳින් තැම්බුණු පසු, එය හැන්දකින් හොඳින් පොඩි කරගන්න. පසුව එයට මිටිකිරි (උකු පොල්කිරි) සහ සාදාගත් තිබ්බටු කොළ යුෂ එකතු කරන්න.
👉රස පදමට ලුණු එකතු කර හැඳිගාමින් ලිපේ තබන්න. කොළ යුෂ එකතු කළ පසු වැඩි වේලාවක් නටන්නට (තැම්බෙන්නට) නොදී, කැඳ එක රත් වීගෙන එන විටම (එක් උතුරක් එන විට) ලිපෙන් බාගන්න. (වැඩිපුර තැම්බුණහොත් එහි ඇති විටමින් සහ ඖෂධීය ගුණය විනාශ වේ).
@
