30/06/2026
السلام عليكم
الثورة الغدائية في هذا الوقت لانها فعلاً تعتبر معجزة دقيق وامية يتكون فيه بكتيريا تجعل من المعجنات مرتفعة وصحية وفيها فؤئد للجسم 👍🏻🌺
والكل يبي يعرف اسرارها ويبي يتعلمها وكلنا نشوفوو فيها حاجة صاعبة ومش اي شخص يديرها
لكن طلعت ساهلة وبسيطة بس تبي رعاية واهتمام زيادة شوية في البداية وبعدين استمتعوا بيها
بس كونوا واثقين من ماتقومو بيه🥰🥰
#طبعا قبل العيد درت معاكم تجربة للخميرة الطبيعية
وحدة بالقمح وهادي فشلت وعاودتها وفشلت وكل تحاربي ليها فاشلة هادي خلاص استبعدت حتى التفكير في اعادة تجربتها
واللي هي بالدقيق الابيض نجحت معاي وبشكل كبير
في اليوم السادس 6 درتلها اختبار الطفو ونجحت والفاقد عجنت بيه خبزة وجت تبارك الله بس الحموضة زايدة لاني خمرتها لفترة طويلة وفي اليوم السابع لقيتها مرتفعة وثابتة بعد الارتفاع وعاودت اختبار الطفو ونجحت زدتها لليوم 8 وغديتها وارتفعت في خلال 4 ساعات درتلها اختبار الثبات ونجحت
اللي هو تغدي الخميرة وبعد ترتفع لو ما نزلتش وقعدت ثابت للمستوى اللي وصلتله ساعة ساعتين يعني خلاص الخميرة نجحت واصبح عندك خميرة طبيعية
لو بتعجني اعجني ولو متبيش سكريها كويس وحطيها في الثلاجة وكل نهاية اسبوع غديها وخليها برا الثلاجة لين ترتفع وبعدين سكري عليه وحطيها في الثلاجة وهكذا
اول يوم👇🏻
خديت فازو وحطيت فيه
1/2 كوب دقيق
1/2 كوب امية مش من الشيشمة امية متاع الشيشة
ونخلطوهم كويس كويس ونغطوهم ونخلو الغطاء مفتوح
شوية
ثاني يوم 👇🏻
نلقوها زي ماهي نزيدوها نفس المقدار
1/2 كوب دقيق
1/2 كوب امية ونحركوهم كويس كويس ونفس الشي الغطاء مرفوع
ثالث يوم 👇🏻
لقيتها متفاعلة درت نسبة التغديةواعتمدتها وهي 1:2:3يعني خديت 👇🏻
1/4 كوب خميرة
1/2 كوب امية
3 ارباع دقيق
وخلطتهم كويس في صونية وحطيتهم في فازو نضيف ومعقم وغطيتها بنفس الطريقة غطاء مفتوح شوية
ومن هذا اليوم بديت نغدي فيها كل 12 ساعة باش متجوعش وماديرش حموضة
رابع يوم الى سادس يوم نلقى فيها متفاعلة بطريقة كبيرة ونغدي فيها بنفس الطريقة 1:2:3
وسادس يوم الفاقد عجنت بيها وملوحتاش
سابع يوم غديتها وتفاعلها كان اكثر من رائع ونجحت في اختبار الطفو والثبات لكن قلت نزيدها يوم افضل منبيش نتسرع
فزدت لليوم الثامن 👇🏻تفاعلت هلبةواختبار الطفو والثبات
كانو ناجحين وبشكل كبير ماشاءالله وهنا خلاص
حطيتها في الثلاجة وخليها وبعد اسبوع طلعتها وغديتها وخليتها لين تفاعلت في خلال 4 ساعات فعجنت بيها
وارتفاع الخبز واضح من الصورة ماشاءالله ولاقوة الا بالله
#وبالنسبة للتخمير بعد العجن وبعد عملية الطي والمد خليتها في حرارة المطبخ تقريباً 4 ساعات وبعدين شكلتها
وحطيتهم في السوابيت وخليتهم ساعة في المطبخ لين ارتفعت شوية وبعدها دخلتهم للثلاجة للصبح
ولعت الكوشة وحطيت فيها الطناحر وتقدروا اطيبوها من غير الطناحر المهم اقل شي ساعة تكون الكوشة والعة قبل ما اندخلوا فيها الخبزة
ولكن للاسف قدر الله ماشاء فعل قبل مااطيب الخبزة الكوشة فسدت ومع هذا واضح ناجح العجينة
#ملاحظة
الخميرة في تخمرها تعتمد على الهواء بالدرجة الاولة
لهذا نخلوا الغطاء مفتوح شوية وتعتمد على تعقيم المواد
وتعقيم الادوات بطريقة الكوشة افضل من طريقة الطبخ في الماء لان بعد الطبخ نمسحوهم وبهادي الطريقة كاننا مدرنا شي لكن لما نحطوه في الكوشة او مجفف الفواكه
نكونوا غاسلين الادوات ومجففينهم والتعقيم متاعهم بيكون ممتاز
تخمير الخبزة لفترة طويلة من 18 ل 24 ساعة تجي فيها طعم الحموظة كاننا ضايفين ليها ليمون
لكن لما نخمروها لوقت اقل يقل فيها طعم الحموظة
#تقريباً من سنة ونص درت خميرة الارز الخاصة بالغلوتين
في وقتها الكل قالوا لا الرز يولي مُسكر وانا نيتي خير وتجنب للجدل حدفت البوست
وتوا اصبحت خميرة الارز من اشهر الخمائر وشيفات عالميين منزلينها ويقدروا اللي عندهم حساسية يجربوها
ربي يوفق الجميع وهادي تستاهل دعوة جميلة منكم برحمة الوالدين
