20/09/2026
بحالهم كيتباعو في المخابز الكبرى بأثمنة طالعة عطيتكم وصفة اقتصادية حتى اللي بغات تعملهم مشروع
المقادير:
250غ مركرين الحلويات
كأس عنبة مملوء سكر كلاصي 150غ
رشة ملح
كيس فانيليا 7,5غ
2صفار البيض
ربع كاس زيت 40مل
4ملاعق كبيرة حليب بودرة(ممكن تعويضه بالكوك مطحون أوزاللوز مطحون)
دقيق حسب الخليط
2غ خميرة الحلويات أو راس ملعقة صغيرة
100غ شكولاطة مقطعة
الطريقة:
في إناء نوضع المركرين السكر،الملح،الفانيليا نخدم الكل نضيف الزيت والبيض نخدم ثم نضيف الحليب بودرة من بعد نزيد الدقيق مع الخميرة بشوية حتى يتجمع العجين ثم آخر حاجة نضيف الشكولاطة مقطعة قطع صغيرة جداا نشكل العجين حرابل ندخلهم للمجمد غير يشدو في راسهم باش مني نقطعهم يحافظو على الشكل الدائري
من بعد نجبدهم من المجمد نقطعهم مباشرة نوضعهم في صفيحة الفرن ندخلهم لفرن ساخن من قبل بالنسبة لفرن الغاز النار من الأسفل والصفيحة الفوق ندخلها حتى يطيبو من الجوانب والتحت عاد نزلهم يتحمر الوجه ديالهم
أما الفرن الكهربائي يكون شاعل من الأسفل والأعلى على 160درجة حتى يطيبو ونقدموهم بالصحة والراحة
بالنسبة لهاد الكمية اللي عطيتكم تتخرج تقريبا 825 غرام
بالنسبة لثمن البيع بهاد المقادير 80درهم للكيلو
ممكن تعملو علب صغيرةديال 125غ بثمن 10دراهم
