05/03/2026
ညဘက် ထမင်းကြော်ဆိုင်တွေမှာ နာမည်ကြီးပြီး ထမင်းကြော်နဲ့ အင်မတန် လိုက်ဖက်လွန်းတဲ့ ဝက်ချိုနှပ် ချက်နည်းကောင်းလေး ဖြစ်ပါတယ်။
ပါဝင်ပစ္စည်းနှင့် နယ်ဖတ်ရန်
ဝက်သုံးထပ်သား (၃၀ သား): ဆား၊ အရသာမှုန့်၊ တရုတ်မဆလာ (လက်ဖက်ရည်ဇွန်း ၁ ဇွန်း)၊ ငရုတ်ကောင်းမှုန့် အနည်းငယ်၊ ပဲငံပြာရည်အနောက် (၁ ဇွန်း) နှင့် ဂျင်းရည်ညှစ်တို့ဖြင့် နာရီဝက်ခန့် ကြိုတင်နှပ်ထားပါ။
ချက်ပြုတ်နည်း အဆင့်ဆင့်
ဆီသပ်ခြင်း: ကြက်သွန်ဖြူနှင့် ဂျင်းထောင်းထားသည်ကို ထည့်၍ ဆီသပ်ပါ။ ထိုသို့ ဆီသပ်ရာတွင် သစ်ကြမ်းပိုးခေါက် (၁) ချောင်းနှင့် နာနတ်ပွင့် (၂) ပွင့်တို့ကိုပါ တစ်ပါတည်း ထည့်ပေးပါ။
အသားကြော်ခြင်း: ကြက်သွန်ဖြူများ နီရဲပြီး အနံ့မွှေးလာပါက နယ်ထားသော ဝက်သားများကို ထည့်ကြော်ပါ။ အသားများ တင်းလာပြီး အပေါ်ယံ အရောင်တက်လာသည်အထိ ကြော်ပေးရပါမည်။
နှပ်ခြင်း: ဝက်သားများ အရောင်လှလာလျှင် ဒန်အိုးထဲသို့ ပြောင်းထည့်ပါ။ ထို့နောက် ကြက်သွန်နီကြော် (ဟင်းခပ်ဇွန်း ၁ ဇွန်း) ထည့်ပါ။ (ကြက်သွန်နီကြော် မရှိလျှင် အစိမ်းကို ပါးပါးလှီးထည့်နိုင်သော်လည်း အကြော်က ပိုမွှေးပြီး အရသာ ပိုကဲစေပါတယ်)
အရသာဖြည့်စွက်ခြင်း: ရေထည့်ပြီး မီးအေးအေးဖြင့် အသားနူးအောင် မှန်မှန်လေး တည်ထားပါ။ မိမိနှစ်သက်သလို ပဲငံပြာရည်အနောက်၊ ဆား၊ အရသာမှုန့်တို့ကို ထပ်မံဖြည့်စွက်ပါ။ (ဘဲဥပြုတ်ရှိလျှင် တစ်ပါတည်း ရောချက်နိုင်ပါတယ်)
အချောသတ်ခြင်း: ဝက်သားနူးအိလာပါက ကြက်သွန်နီဥသေးလေးများ ထည့်ပေးပြီး ရေခန်းဆီပြန်လာသည်အထိ ချက်ပေးပါ။
အကြံပြုချက်
ညဘက် ထမင်းကြော်ဆိုင်က စားနေကျစတိုင် လိုချင်ပါက ဆီမပြန်ခင် ရေစပ်စပ်လေး ကျန်ချိန်မှာ အိုးချပေးပါ။
နူးညံ့အိစက်နေတဲ့ ဝက်ချိုနှပ်လေးကို သီးစုံပဲကုလားဟင်း၊ ငပိထောင်းစပ်စပ်လေးနဲ့ တွဲဖက်စားသုံးရင်တော့ တကယ့်ကို ရှယ်ပါပဲ။
