19/06/2024
အလိုလို သိစိတ် 𝑰𝒏𝒕𝒖𝒊𝒕𝒊𝒐𝒏 🧠🤩
𝑰𝒏𝒕𝒖𝒊𝒕𝒊𝒐𝒏 အကြောင်း ရေးပေးချင်နေတာ ကြာပါပြီ၊ရေးသာရေးရတယ် 𝑰𝒏𝒕𝒖𝒊𝒕𝒊𝒐𝒏 ကို အရမ်းတော့ နားမလည်သေးပါဘူး၊ဒါပေမယ့် ဘာလို့ ရေးပေးရလဲဆိုရင် ခုခေတ်မှာ လူတိုင်း 𝑰𝒏𝒕𝒖𝒊𝒕𝒊𝒐𝒏 အားကောင်းဖို့ မဖြစ်မနေ လိုအပ်လာလို့ပဲ ဖြစ်ပါတယ်။
ကျနော်တို့ နေထိုင်ရာ ကမ္ဘာကြီးက 3D ကနေ 5D ကို ပြောင်းနေပြီလို့ Spiritual လိုက်စားတဲ့ ဆရာသမားတွေပြောတာကြာပါပြီ၊လက်ရှိ ကမ္ဘာကြီးမှာ ဖြစ်ပျက်နေတဲ့ ဆင်းရဲ ဒုက္ခပေါင်းစုံက အဲ့ဒီအပြောင်းအလဲနဲ့ အများကြီးသက်ဆိုင်နေပါတယ်၊5D ကိုရောက်ရင် ကမ္ဘာကြီးပေါ်မှာ Authenticity လို့ ခေါ်တဲ့ 'စစ်မှန်မှု' နဲ့ပဲ အသက်ရှင်လို့ ရပါတော့မယ်။
ဘယ်လိုမျိုးလဲဆိုရင် Authenicity ရှိမှ ကျန်းမာအောင် နေထိုင်စားသောက်တတ်မယ်,စီးပွားရေးကို အောင်မြင်အောင် လုပ်နိုင်မယ်,မိတ်ဆွေစစ် မိတ်ဆွေမှန်တွေကို ရရှိမယ်,ကြုံလာနိုင်တဲ့ ဘေးရန်တွေကို ရှောင်နိုင်မယ် ဒါမှမဟုတ်လည်း အောင်မြင်အာင်ဖြေရှင်းနိုင်မယ်၊အဲ့လို Authenticity အပြည့်အဝနဲ့ ဘဝကို ရှေ့ဆက်ဖို့ 𝑰𝒏𝒕𝒖𝒊𝒕𝒊𝒐𝒏 ကောင်းမှ ကို ရတော့မယ်။
𝑰𝒏𝒕𝒖𝒊𝒕𝒊𝒐𝒏 ဆိုတာ မိမိရဲ့ စိတ်ထဲမှာ တွေးတောတာ ကြံစည်တာမဟုတ်ဘဲ 'အလိုလိုသိလာတဲ့စိတ်'ပဲ ဖြစ်ပါတယ်၊အင်မတန်မှ သိမ်မွေ့ပြီး အဆင့်အတန်းမြင့်တဲ့ စိတ်အခြေအနေတစ်ခုဖြစ်ပါတယ်၊'ဝမ်းတွင်း သိစိတ်'လို့လည်း အဓိပ္ပာယ်ဖွင့်လို့ရတယ်၊အားလုံးကြားဖူးတဲ့ သီချင်းစာသားလေးလို ... "ဒါကို သူမြင်တယ်ဆို ရင်မှာ ပုဏ္ဏားတွေရှိလား 🎵🎼"၊ရင်ထဲမှာ ဗေဒင်ဟောတတ်တဲ့ ပုဏ္ဏားလေးရှိသလို မပြောဘဲနဲ့ သိနေပါလားဆိုတဲ့ သဘောပါ၊ဒါ့ကြောင့်မို့ 𝑰𝒏𝒕𝒖𝒊𝒕𝒊𝒐𝒏 ကို အင်္ဂလိပ်လို Gut Feeling(အူမှသိစိတ်/အူလမ်းကြောင်းရဲ့ ခံစားချက်) လို့လည်းခေါ်တယ်။
နားလည်အောင်ထပ်ရှင်းပြပါဦးမယ်...ဥပမာ အိမ်ရှင်မတစ်ယောက်က ဒီနေ့ ကြက်သားဟင်းချက်မယ်ဆိုပြီး စျေးကိုထွက်လာတယ်၊ဒါမဲ့ သူ့စိတ်မှာ တမင်မတွေးတောရဘဲ ကြက်သားမချက်သင့်ဘူး ငါးဟင်းပဲချက်တော့မယ်လို့ အတွေးဖြစ်တယ်၊အဲ့ဒါနဲ့ပဲ ငါးဟင်းပဲချက်ဖြစ်တယ်၊အဲ့ဒီနေ့မှာ သူသွားတဲ့ စျေးက ကြက်သားကိုစားပြီး အစာအဆိပ်သင့်တာတွေ ဖြစ်ကြတယ်၊သူတို့မိသားစု လွတ်သွားတယ်။
အချိန်လေးစားတဲ့ ကုမ္ပဏီပိုင်ရှင် သူဌေးတစ်ဦးက နေ့ခင်းပိုင်း အစည်းအဝေးတစ်ခုတက်ဖို့ အချိန်စောပြီး ပြင်ဆင်ပြီးနေပေမယ့် သူ့စိတ်မှာ မသွားသင့်ဘူးလို့ ဖြစ်လာလို့ ခဏအိပ်လိုက်တယ်၊နာရီဝက် နောက်ကျပြီးမှ သူရောက်သွားတယ်၊လမ်းမှာ သူသာနာရီဝက်စောပြီး သွားလိုက်ရင် ယာဥ်တိုက်မှုနဲ့ ကြုံမှာဖြစ်တယ်။
ဒါဆို 𝑰𝒏𝒕𝒖𝒊𝒕𝒊𝒐𝒏 ဆိုတာ အနာဂတ်ကိုကြိုသိနေတာမျိုးလားဆိုပြန်တော့လည်း တစ်စိတ်တစ်ပိုင်း ဟုတ်တယ်လို့တော့ ပြောရမယ်၊လူတကာ ရွှေစုတဲ့ အချိန်မှာ မြေကွက်တွေဝယ်စုတဲ့ သူက ရူးကြောင်ကြောင်နိုင်ပေမယ့် ရွှေစျေးကျပြီး မြေစျေးကောင်းတဲ့ ခေတ်မှာ ကျိကျိတက် ချမ်းသာသွားဖူးတယ်၊ဒီသဘောတွေပါပဲ လူတစ်ယောက်ကို လူကောင်းလား? ကိုယ့်ကိုဒုက္ခပေးမယ့် သူလား? ဆုံးဖြတ်တဲ့အခါ အများအပြောထက် မိမိရဲ့ 𝑰𝒏𝒕𝒖𝒊𝒕𝒊𝒐𝒏 နဲ့သာ မှန်ကန်စွာဆုံးဖြတ်တတ်လာအောင် လေ့ကျင့်ယူရမှာပဲ ဖြစ်ပါတယ်။
နောက်ထပ်ထူးဆန်းတာ တစ်ခုက 𝑰𝒏𝒕𝒖𝒊𝒕𝒊𝒐𝒏 က စိတ်ရဲ့ အရည်အသွေးတစ်ခုဖြစ်တာမို့ အူလမ်းကြောင်းကျန်းမာရေးနဲ့လည်း ဆက်စပ်နေပြန်တယ်၊အူလမ်းကြောင်းရောဂါမရှိဘူး,စားသမျှ အစာကြေတဲ့သူတွေက စိတ်ကြည်လင်တာမို့ 𝑰𝒏𝒕𝒖𝒊𝒕𝒊𝒐𝒏 ပိုအားကောင်းတယ်။(Gut-Brain Connection လို့ခေါ်ပါတယ်)
ဦးနှောက်ရဲ့ လုပ်ငန်းဆောင်တာပိုင်းကကြည့်ရင်လည်း 𝑰𝒏𝒕𝒖𝒊𝒕𝒊𝒐𝒏 က အချက်အလက်တွေကို မှတ်သားတဲ့စိတ်နဲ့ လေ့ကျင့်ယူလို့မရဘူး၊ဥပမာ-မောင်မောင်က လူကောင်းလို့မှတ်ယူထားတဲ့ မှတ်ဉာဏ်က 𝑰𝒏𝒕𝒖𝒊𝒕𝒊𝒐𝒏 မဟုတ်ဘူး၊မောင်မောင်နဲ့ အတူအလုပ်တွဲလုပ်မယ်ဆို မောင်မောင်က လူကောင်းလား,နောက်ကျောဓားနဲ့ထိုးမယ့်သူလား အလိုလိုသိတာကမှ 𝑰𝒏𝒕𝒖𝒊𝒕𝒊𝒐𝒏 ဖြစ်ပါတယ်။
လောကမှာ 𝑰𝒏𝒕𝒖𝒊𝒕𝒊𝒐𝒏 အားအကောင်းဆုံး ပုဂ္ဂိုလ်ကို ပြပါဆိုရင်တော့ မြတ်ဗုဒ္ဓကိုပဲ ညွှန်ပြရလိမ့်မယ်၊ပြီးခဲ့တဲ့ရက်အနည်းငယ်တုန်းက နယုန်လပြည့် (မဟာသမယနေ့) ဖြစ်ပါတယ်၊မဟာသမယသုတ် ဟောကြားစဥ်အခါတုန်းက စကြဝဠာတိုက်တစ်သောင်းမှာရှိတဲ့ နတ်,ဗြဟ္မာတွေ ရောက်ရှိလာတယ်၊တန်ခိုးနည်းတဲ့နတ် တန်ခိုးကြီးတဲ့နတ် စုံလို့ပါပဲ၊မရေတွက်နိုင်အောင် များပြားလွန်းတဲ့ နတ်,ဗြဟ္မာတွေက သူတို့ဒီလောက်အများကြီး ရောက်လာတာကို ဘုရားရှင် မသိမှာစိုးရိမ်ကြတယ်,တန်ခိုးကြီးတဲ့နတ်တွေလည်း အများကြီးပါတော့ တန်ခိုးနည်းတဲ့နတ်တွေက သိမ်ငယ်ကြတယ်,ပရိသတ်ကများပြားလွန်တော့ သူတို့သိချင်တာတွေ မေးလျှောက်ဖို့ အခွင့်အရေးမရမှာလည်း စိုးရိမ်ကြပြန်တယ်။
သူတို့တွေရဲ့ စိတ်ကို မြတ်စွာဘုရားက အလုံးစုံသိလေတော့ သူတို့တွေရဲ့ နာမည်တွေကို နတ်အုပ်စုအမျိုးအစားအလိုက်ခေါ်ပြီး နှုတ်ဆက်တယ်၊နှုတ်ဆက်တဲ့နေရာမှာလည်း အဆင့်နိမ့်နတ်တွေကနေ အဆင့်မြင့်နတ်တွေထိ အစဥ်လိုက်နှုတ်ဆက်တာမို့ အားလုံးရွှင်လန်းဝမ်းသာကြတယ်၊သူတို့သိလိုတဲ့ အာသာဆန္ဒတွေကိုလည်း နှစ်ကိုယ်ခွဲပြီး ဘုရားနှစ်ဆူအနေနဲ့ တစ်ပါးကမေး,တစ်ပါးကဖြေ ပုံစံနဲ့ ဖန်ဆင်းပြီးဖြေကြားတဲ့အခါ တရားရပြီး ကျွတ်တမ်းဝင်ကြတယ်။
မြတ်စွာဘုရား သက်တော်ထင်ရှားရှိတဲ့အခါတွေတုန်းကလည်း ဒီလမ်းကသွားရင် ဒုက္ခများမယ်,ဒီလမ်းကဆို အဆင်ပြေမယ်ဆိုတာ ကြိုတင်ပြီးသိမြင်တာမျိုးတွေကို တရားစာပေတွေမှာ ဖတ်ရတယ်၊မြတ်စွာဘုရားမှရယ်တော့ မဟုတ်ပါဘူး...စိတ်ကို ကောင်းစွာလေ့ကျင့်ထားတဲ့သူတိုင်းက 𝑰𝒏𝒕𝒖𝒊𝒕𝒊𝒐𝒏 ကောင်းကြပါတယ်။
𝑰𝒏𝒕𝒖𝒊𝒕𝒊𝒐𝒏 အားကောင်းလာရင် ဘဝမှာ ကြုံတွေ့ရတဲ့ ကိစ္စမှန်သမျှကို သူများအပြောနဲ့ မောမနေတော့ဘဲ မိမိဘာသာ မှန်မှန်ကန်ကန်ဆုံးဖြတ်နိုင်ပြီး အကျန်းမာဆုံး အကြွယ်ဝဆုံး အန္တရာယ်အကင်းဆုံး ဘဝတွေကို တည်ဆောက်နိုင်လာမှာ ဖြစ်ပါတယ်။
𝑰𝒏𝒕𝒖𝒊𝒕𝒊𝒐𝒏 အားကောင်းလာတဲ့အခါ ငါ ဘာလုပ်ရင် အောင်မြင်မှာလဲ?,ငါ့ရဲ့ သူများတွေထက် သာတဲ့အရည်အချင်းကဘာလဲ?,ဘယ်သူတွေက မိတ်ဆွေစစ်လဲ?,ဘာလုပ်ရင် လက်ရှိခံစားနေရတဲ့ ဝေဒနာတွေကုရလွယ်မလဲ? စသဖြင့် အကျိုးကျေးဇူးတွေ ခံစားရမှာဖြစ်ပါတယ်။
ဒီနေရာမှာ ဒီနေ့ဒီလမ်းသွားရင် ငါတော့ ဒုက္ခရောက်တော့မှာပဲဆိုတာလိုမျိုး စိုးရိမ်စိတ်ကလည်း 𝑰𝒏𝒕𝒖𝒊𝒕𝒊𝒐𝒏 မဟုတ်ပြန်ဘူး၊စိတ်တည်ငြိမ်တဲ့သူ,ဒေါသနည်းတဲ့သူ,ခံစားချက်တွေကို ထိန်းချုပ်နိုင်တဲ့သူ,အရာရာကို မှန်ကန်စွာတွေးခေါ်မြော်မြင်တတ်တဲ့သူတွေရဲ့ စိတ်မှာဖြစ်လာတဲ့ အလိုလိုသိစိတ်ကသာ 𝑰𝒏𝒕𝒖𝒊𝒕𝒊𝒐𝒏 အစစ်အမှန်ဖြစ်ပါတယ်၊ 𝑰𝒏𝒕𝒖𝒊𝒕𝒊𝒐𝒏 ကောင်းတဲ့သူတွေက သူတို့ကိုယ်ကို 𝑰𝒏𝒕𝒖𝒊𝒕𝒊𝒐𝒏 ကောင်းမှန်းလည်း သိကြပါတယ်။
ဒီလောက်ဆို 𝑰𝒏𝒕𝒖𝒊𝒕𝒊𝒐𝒏 ကိုသဘောပေါက်လောက်ပါပြီ၊ဒါဆို 𝑰𝒏𝒕𝒖𝒊𝒕𝒊𝒐𝒏 ကောင်းအောင် ဘယ်လိုလေ့ကျင့်ယူမလဲပေါ့... 𝑰𝒏𝒕𝒖𝒊𝒕𝒊𝒐𝒏 ဆိုတာစိတ်ရဲ့ မြင့်မားတဲ့အခြေအနေမို့ စိတ်ကို ကောင်းတဲ့ဘက်ရောက်အောင် လုပ်ယူနိုင်တဲ့ နည်းမှန်သမျှက 𝑰𝒏𝒕𝒖𝒊𝒕𝒊𝒐𝒏 ကိုကောင်းစေပါတယ်...
🔹နေ့စဥ် စိတ်တည်ငြိမ်အောင်,ဒေါသနည်းအောင် လေ့ကျင့်ပါ(တရားထိုင်ခြင်း,ယောဂဆော့ခြင်း စသည်)
🔹ဖုန်း နဲ့ ကွန်ပြူတာသုံးတာလျှော့ပြီး တတ်နိုင်သမျှ သဘာဝနဲ့ နီးစပ်အောင်နေထိုင်ပါ(လေ့ကျင့်ခန်းလုပ်ခြင်း,ခရီးထွက်ခြင်း,မြေကြီးနင်းခြင်း စသည်)
🔹အူလမ်းကြောင်း ကျန်းမာရေးကောင်းအောင် အမြဲဂရုစိုက်ပါ,ကြေညက်လွယ်တာ စားပါ,အာဟာရပြည့်ဝအောင်စားပါ,အိပ်ရေးဝအောင်အိပ်ပါ
🔹မကြာခဏအစားစားတတ်တဲ့ အကျင့်ကိုဖျောက်ပြီး အချိန်အပိုင်းအခြားနဲ့သာ စားတဲ့အကျင့်ကို မွေးမြူပါ(Fasting လုပ်ခြင်း)
🔹အားလပ်တဲ့အချိန်တွေမှာ မိမိခန္ဓာကိုယ်က ဘာတွေပြောနေလဲ နားထောင်တတ်တဲ့အကျင့်လုပ်ပါ,ဘယ်အစိတ်ပိုင်းက နာနေလဲ တောင့်တင်းနေလဲ ပိတ်ဆို့နေလဲ လေးလံနေလဲ မြင်အောင်ကြည့်ပါ၊ပြီးရင် ဆေးတွေကိုချည်း အားမကိုးဘဲ သဘာဝအတိုင်း ကုစားတတ်အောင် သင်ယူထားပါ
🔹စိတ်သဘောထားမှန်ပြီး မိမိကို လမ်းပြနိုင်မယ့် ဆရာသမားနဲ့ မိတ်ဆွေတွေကို ရှာဖွေပါ
🔹လောကကြီးအကြောင်း,လူတွေရဲ့အကြောင်းသိဖို့ စာများများဖတ်ပါ။
စိတ်နှလုံးချမ်းမြေ့ကြပါစေ ☺️🤝😍
၁၆.၆.၂၀၂၂
#ဒေါက်တာရဲပြည့်ဟိန်း
~Internet
