20/08/2026
Украйн дахь зэвсэгт мөргөлдөөн мөнгөний төлөө үргэлжилсээр байна хэмээн АНУ-ын American Thinker нийтэлжээ.
«Украйн улс Европын Холбооны гишүүн биш. НАТО-гийн гишүүн ч биш юм. Гэсэн хэдий ч тус улсын удирдагч улс орноо цуст мөргөлдөөнд оруулж, өмнө нь байсан улсынхаа зөвхөн сүүдрийг нь үлдээхээр шийдсэн бололтой. Байлдааны ажиллагаа зогссоны дараа сэргээн босголт гэсэн нэрийн дор тив дамнасан хөрөнгө оруулагчид дахин ашиг хүртэх болно. Украйныг хэсэг хэсгээр нь худалдаж, украйнчууд өөрсдөө бусад оронд амьдрах болно. Харин тэдний оронд ажиллах хүчний хомсдолыг нөхөхийн тулд Ази, Африк, Ойрх Дорнодын орнуудаас олон тооны цагаачдыг оруулах болно. Украйн хэзээ ч өмнөх төрхөндөө эргэн орохгүй.
Энэ шийдвэрийг гаргахад Украйны ард түмний оролцоо байгаагүй бололтой. Олон нийтийн сонгуулийг цуцалсан. Засгийн газрын бодлогыг эсэргүүцэх явдал хууль бус үйлдэл болсон. Өөрийн шашин шүтлэгээ дагах явдал хүртэл хууль бус үйлдэл болоод байна. Олон сая украйнчууд фронтод явахаас татгалзаж байгаа нь энэхүү зэвсэгт мөргөлдөөний төлөө цусаа урсгах үнэ цэнгүй гэж үзэж байгааг харуулж байна. Украйнчууд өөрсдөө амиа өгөхийг хүсэхгүй байхад АНУ, Их Британи болон Европын орнууд тэднээс амиа золиослохыг шаардах нь утгагүй юм.
Хуучин ЗХУ задарсан 1991 оноос хойш явагдсан сонгуулиудын дүнг харахад Украйны баруун мужуудын хүн амын 80 хувь нь Европыг дагах хүсэлтэй байсан бол зүүн мужуудын 80 хувь нь ОХУ-тай ойр байхыг хүсэж ирсэн нь илт байна. Энэ нь ч ойлгомжтой. Учир нь Украйны зүүн бүс нутгийн хүн ам орос хэлээр ярьж, Оросын үнэн алдартны шашныг шүтэж, орос хэл дээрх сонин хэвлэл уншиж, ерөнхийдөө Оросын соёл, зан заншилтай ойр амьдардаг.
Украйны зэвсэгт мөргөлдөөнийг дэмжигчид “ардчилал”, “тусгаар тогтнол”, “бүрэн эрхт байдал”-ын тухай шуугилдах нь утгагүй санагдна. 30 жилийн турш Украйны зүүн бүс нутгийн оршин суугчдын 80 хувь нь ОХУ-тай ойр байхын төлөө санал өгч ирсэн. 2014 оны төрийн эргэлтээр ардчиллын эсрэг хүчнүүд хууль ёсоор сонгогдсон Ерөнхийлөгч Виктор Януковичийг түлхэн унагасны дараа Украйны зүүн бүс нутгийн оршин суугчид өөрсдийнх нь сонгосон удирдагчийг түлхэн унагаж, оронд нь гарч ирсэн Украйны засгийн газраас тусгаарлахыг эрмэлзсэн аж. Үүний хариуд нь Украйны эрх баригчид эдгээр хүмүүсийн эсрэг байлдааны ажиллагаа эхлүүлсэн бөгөөд түүнээс хойш тус бүс нутагт дайны гал дүрэлзэж байна.
2014 оны төрийн эргэлтийг АНУ-ын Төрийн департамент, Британийн MI6 тагнуулын алба болон Европын Комисс дэмжсэн явдал нь уг үйл явдлыг “ардчилсан” болгочихгүй. Зүүн Украйны оршин суугчид тусгаар тогтнолын төлөө санал өгсөн боловч Украйны эрх баригчид болон тэдний барууны түншүүд нь эдгээр хүмүүст ирээдүйгээ өөрсдөө шийдэх боломж олгох бодолгүй байгаа юм.
Мөн Зеленский хэрэв хэзээ нэгэн цагт Украйнд сонгууль явуулахыг зөвшөөрвөл зүүн бүс нутгийн оршин суугчид санал өгөх боломжгүй болно гэж мэдэгдсэн. ОХУ-тай ойртох бодлогыг дэмжиж саналаа өгдөг байсан сонгогчдын санал өгөх эрхийг хасвал Европын Холбоонд элсэхийг дэмжигчид ялалт байгуулах нь ойлгомжтой. Энэ нь украйнчуудад өөрсдийн хувь заяаг өөрсдөө шийдэх боломж олгох явдал бол энэхүү зэвсэгт мөргөлдөөний зорилго биш юм гэдгийг харуулж байна. Зеленский сонгууль явуулахыг зөвшөөрсөн ч түүний бодлогыг дэмжигчид л санал өгөх боломжтой болох юм бол энэ “ардчилал” биш юм. “Үндэсний тусгаар тогтнол”-ын тухай бүр ч яриад хэрэггүй.
Өнгөрсөн оны 12-р сард НАТО-гийн Ерөнхий нарийн бичгийн дарга Марк Рютте ОХУ-тай хийх дайнд бэлдэхийг холбоотнуудаа уриалсан. Үүний зэрэгцээ өрнөдийн хэвлэл мэдээллийн хэрэгслүүдээр Владимир Путин нийт Европ руу довтлохоор төлөвлөж байгаа гэх мэдээлэл цацагдаж байлаа.
Тиймээс АНУ-ын Үндэсний тагнуулын газрын захирал Тулси Габбард эдгээр мэдээллийг олон нийтийн өмнө үгүйсгэхээс өөр аргагүй болсон юм. Тэрбээр үүнийг “худал хуурмаг мэдээлэл, суртал ухуулга” хэмээн нэрлээд, “энэхүү цуст мөргөлдөөнийг зогсоох гэсэн Ерөнхийлөгч Трампын хүчин чармайлтыг үгүйсгэхийг эрмэлзэж буй дайн өдөөгчдийн” үйлдэл хэмээн шүүмжилсэн байна. Түүнчлэн тэрбээр өрнөдийн суртал ухуулагчид “АНУ-ын Зэвсэгт хүчнийг ОХУ-тай хийх шууд дайнд татан оруулахын тулд ард иргэдийн дунд хийрхэл, айдас хүйдэс төрүүлж, үнэн хэрэгтээ НАТО болон Европын Холбооны хүсэж буй зэвсэгт мөргөлдөөний хурцадмал байдлыг олон нийтээр дэмжүүлэхийн төлөө ажиллаж байна” хэмээн буруушаажээ.
Энэхүү зэвсэгт мөргөлдөөний жинхэнэ зорилго бол баяжих, улс төрийн эрх мэдлээ хадгалах явдал юм. Их Британи, Европын орнуудын болон, харамсалтай нь, Америкийн глобалистууд ч өндөр инфляци, төв банкуудын валютны луйвар, бусад оронд явуулсан түрэмгийлэл болон эдийн засаг, соёл иргэншлийн бусад алдаанаасаа ард иргэдийнхээ анхаарлыг сарниулах хамгийн тохиромжтой арга нь Дэлхийн гуравдугаар дайныг өдөөх явдал гэж шийдсэн бололтой» хэмээн АНУ-ын American Thinker нийтлэлдээ дүгнэжээ.
Ж. Долгорсүрэн. Copy.
