05/08/2026
Удахгүй 上海
Шанхай хотын нэгээхэн чухал хэсэг болсон энэхүү газар нь хуучны Шанхай хотын төв нь байжээ. Одоо энд алдарт Июү Юань цэцэрлэгт хүрээлэн, Чэн Хуан Миау сүм, Вэн Миау гэх мэт газрууд байрладаг. Уг хуучин хотыг шинээр зохион байгуулсан ба үүнд зарим хүмүүс харамсдаг боловч энэ нь хуучин Шанхайн соёлыг харуулж чадахуйц эд зүйлсийн зах зээлийг ихээр өргөжүүлжээ.
Вэн Миау буюу Күн хийд (Kong Temple): Күн хийд бол Шанхайн төв хэсэгт орших Юань улсын үед баригдсан цор ганц Күнзийн сургаалыг сурталчлагч, түүх дурсгалын ариун газруудын нэг юм. Түүхэнд энэ хийдийг дээд зэрэглэлийн сургууль, Хятадын эртний түшмэл цол хэргэм хүртэгсдийн шалгалт авдаг номын ариун газар байсан гэлцдэг. Энэ хийд олон удаа дайн самуунд эвдэрч сүйдэж байсан ба 1995 онд Шанхай хотын засгийн газар дахин Чин улсын үеийн төрхөөр нь сэргээжээ. Амралтын өдрүүдэд номын зах ажиллах ба орчин цагийн бүх төрлийн ном, сонин, сэтгүүл худалдаалдаг.
Гурван уул танхим (Three Mountain Hall): Шанхайн цор ганц Чин улсын үеийн бүрэн бүтнээрээ хадгалагдсан барилга юм. 1909 онд Фүжиэн нутгийн худалдаачид хөрөнгө нийлүүлэн бариулж, энх амгаланг сүжиглэн мөргөл үйлддэг байжээ. Фүжоу хотын Июү уул, Шувуу чулуун уул, Юүэ Ван гэх 3 уулаар билэгдэн нэрлэжээ. Одоо Шанхай хотын умардын хувьсгалын түүхэн дурсгалын үзвэр байдаг. Баруун талын байранд нь Шанхайн иргэдийн цуглуулгын үзмэрийн газар байх ба ардын ёс заншлыг харуулсан төрөл бүрийн цуглуулгуудыг энд тавьжээ.
WO-Тоглоомын вант улс: Түүх дурсгалын нэг хэсэг болсон Вэн Миау гудамжинд хүүхдүүдийн орох дуртай нэг дэлгүүр байдаг нь энэхүү тоглоомын вант улс юм. Дэлгүүрийн гадна хана нь үлгэрийн ертөнцийн нэгээхэн хэсгийг харуулдаг. Энд Европ, Японы төрөл бүрийн тоглоомууд сонголт ихтэй байх ба дэлгүүрийн эзний хувийн цуглуулга болох хэнд ч худалддаггүй тоглоомуудыг та харж болно.
Июү Юань аялал жуулчлал худалдааны бүс
(Yuyuan Tourist Mart)
Энэ бүс нь Июү Юань цэцэрлэг, Чөн Хуан Миау сүм хоёрын хооронд оршдог аялал жуулчлал, худалдаа, түүхийн дурсгалт газрууд багтсан худалдааны төв гудамж юм. Июү Юань жуулчны захаар байдаг Мин Чин улсын үеийн хэв маягтай барилгууд байдаг бөгөөд хятад үндэстний бэлэг дурсгалын зүйлс авах сонголт ихтэй. Худалдааны төв дотор шувууны зах, номын худалдаа, хоолны газар, төрөл бүрийн барааны дэлгүүрүүд бий.
Июү Юань цэцэрлэгт хүрээлэн (Yuyuan Garden): Хуучин хотын зүүн хойно байрлах 1559 онд байгуулагдсан, Хятадын түүх соёлын өвд бүртгэгдсэн аялал жуулчлалын чухал газруудын нэг билээ. 30 га талбайтай, 40 гаруй үзвэртэй. Зүүн талд нь Диэнь Чүнь өргөө бий. 1853 онд Шанхай Шиао Дао Хуй хөдөлгөөний удирдах газар байсан ба одоо энд буу зэвсэг, мөнгө зэрэг түүхэн дурсгалт зүйлс байдаг. Өмнө хэсэгт хуучны жүжгийн тайзтай, тэнд нь байнга Күнмин үндэстний тоглолттой байдаг. Мөн Июү Хуа ордоны урд байрлах Июү Лин Лун хиймэл чулуун уултай, бас содон чулууны үзвэрийн танхим бий.
Чөн Хуан Миау сүм (The Temple of City God): Шанхайн хуучин худалдааны гудамжнаас холгүй, Мин улсын үед баригдсан, 700 гаруй жилийн түүхтэй, өнгө гэрлээ цацруулсан гоёмсог сүм бий. Жуулчдын сонирхлыг маш ихээр татдаг, хуучин Шанхай хотын дүр төрхийг харуулж чадсан онцлогтой юм.
Шанхайн хуучин ресторан (Shanghai Classical restaurant): Июү Юань цэцэрлэгийн худалдаа, аялал жуулчлалын хэсэгт байрладаг, 1875 онд анх баригджээ. Эдний ханан дээр Шанхай хотын үе үеийн гэрэл зурагнууд өлгөөтэй байдаг. Рестораны 3 давхрын Баофаны хэсэг нь цахилгаан тэрэг, хуучны хаяг зэргийг зочдод үзүүлж 1930-40-н оны хуучин Шанхай хотын өвөрмөц төрхийг харуулдаг. Голдуу хятадын Жиансу, Жөжиан, Анхуй мужуудын хоолыг маш амттай хийдэг.
Июү Юань цаасан хайчилбарын дэлгүүр: Хятадын цаасан хайчилбарын урлагийн нэгээхэн хэсэг ба энэ урлаг хятадад маш өндөр хөгжсөн байдаг. Мөн хажуу талд нь Лигау чихрийн дэлгүүр бий. Хятадын уламжлалт эмийн орцтой, эрүүл мэндэд тустай, ханиад намдаах, хоолны дур ихэсгэх зэрэг олон төрлийн чихрүүд сонголт ихтэй байдаг.
Лью Бо Лан ресторан (Lvbolang restaurant): Июү Юань цэцэрлэгийн хятадын тусгай зэрэглэлийн тансаг хоолны ресторан юм. Чөн Хуан Миау сүм, Жиучу гүүрийн хажууд байрладаг 3 давхар байшинд байдаг. Энэхүү эртний хятадын уламжлалт хоолны газарт Английн хатан хаан II Элизабет, Америкийн ерөнхийлөгч асан Клинтон зэрэг гадаад дотоодын олон зочид ирж, хоолны амт чанарыг сайшааж байжээ. Мөн хямд хоолны сонголт ч арвин бий. "8 эрдэнийн халуун ногоо" хэмээх мах, ногоо, жимс зэрэг 8 зүйлсээс бүрдсэн халуун тогоо нь хамгийн алдартай. Бас загасны сэрвээ, наймаалжны зоог, Бабао нугас, ширмэн дээрхи шарсан могой загас зэрэг нь тун амттай.
Наншиан буузан гэр: Байнга урт дараалалтай байдаг Шанхайн хамгийн нэртэй буузан гэр. Хятад хоолны нэгээхэн хэсэг болсон "луу" жижиг бууз нь хамгийн амттай. Энэ жижиг буузыг Шанхайчууд "луун мантуу" гэдэг. Хэлбэрийн хувьд Монгол буузтай тун төстэй.
Шанхайн хуучин худалдааны гудамж (Shanghai Traditional street): Июү Юань цэцэрлэг, Чөн Хуан Миау сүмтэй зэргэлдээ оршдог хуучны Шанхай хотын дүр төрхийг харуулсан өвөрмөц барилга байгууламжтай, томоохон худалдааны гудамж юм. Энд олон зуун жилийн түүхтэй эртний шаазан эдлэлийн Гө Дө Хө дэлгүүр, Гу Су хатгамалын дэлгүүр, бичиг хэргийн дэлгүүр, хуучны Ван Да Лун хутга хайчны дэлгүүр, хөвөн даавууны дэлгүүр гээд өөрийн онцлогтой олон дэлгүүрүүд байдаг. Урд хэсэгт нь Чүнь Фөн Дө хоёр давхар цайны газар, гудамжны эцэст Ао Зао Гуань хэмээх цайны газар бий. Энд зууханд болгосон гоймонд нь хүмүүс их дуртай. Гоймонгийн шөлийг хөх загасны мах, загасны хайрс болон салиаг чанаж гаргаж авдаг нь маш амттай болгодог байна.
Шиши дүфүний гэр: Дүфү бол хятад үндэстний хоолны гол бүтээгдхүүн юм. Энд дүфү хуа, өмхий дүфү, дүфүний сүү зэрэг олон сонголт ихтэй. Дүфү хуа нь маш зөөлөн, сонгино, жан, сам хорхойн хальс, дарсан ногоотой, давсархаг нэгэн төрлийн дүфү юм.
