23/08/2022
Ba pengarap iban, kitai tu agi dalam kandung indai sigi udah ditanya petara dulu. Sekali ka kitai tu nerima selatan pengidup kitai sepengudah ke ada ba dunya tau ka enda.
Nya alai, enti saut anak mit ke dalam kandung nya madah diri enggai. Nya mih iya lalu mati lulus kenu ku jerita. Ke sanggup, alu idup laban sanggup nerima selatan idup diri.
Tang lengka ke kitai dulu jerita nya. Diatu kitai ngenang anak mit ti dikacau utai ke dikumbai burung langit nyentuk ka iya tau udu nyabak, udu sakit tauka ngejung ke iya bebadi.
Burung langit tu kenu ku jerita cukup jai enggau anak mensia. Enti apai indai orang ke baru ngandung sereta anak agi mit enda bepenti nya mih peluang iya ngereja anak mit nya.
Empai lama ke udah aku bisi nerima siti WhatsApp ari siku follower page tu. Ku iya madah iya bisi penusah alai anak iya udah nadai beumur 2 bulan laban diayah ke “ burung langit”.
Enggau peluang tu mega aku deka meri penyinu ati ngagai sida sebilik.
Aku sekali tu ka bekunsi ka bakani pendiau anak mit ke diayah ke burung langit tu. Ngambi enti bisi anak kita , bisi “simptom” munyi ku jaku melayu baka ke disebut aku tu. Kita jampat jampat mai anak kita nuju orang ti nemu ngibun anak mit.
Keterubah, anak kita udu nyabak malam. Enggai badu badu ngejung ka kita jampat ringat lalu mansut ke jaku ti enda patut nuju anak mit kita.
Kedua, anak mit kita enti maya iya nyabak dia mata iya ngelanit ke atas baka kena sawan. Tau bai berubat ke hospital nyangka nya penyakit hospital. Tang enti nya ukai sawan, ku orang iya benung ditundi burung langit.
Ketiga, anak kita takut kediri. Enda tau tinggal , iya lalu nyabak enggau nyawa ke cukup besai.
Enti kita agi ingat bisi ke viral orang ba WhatsApp berapa taun ke udah senentang ibu ke besebut ke ubung mirah. Utai tu amat , taja mayuh ngelesay ke tudah.
Ba pengarap iban, burung langit tu takut amat meda ubung merah. Nya suah kitai meda anak mit kelia bekena ke ubung merah tu nyadi ke gelang ba kaki enggau jari diberi apai indai. Nya tuju iya tadi.
Kelimpah ari nya mega , nuju apai indai mega enti ulih anang mai anak kita bejalai maya lemai salah kelala. Urung ya jam 6 lemai bakanya. Enti ulih diau mih dalam bilik.
Enti ninga iya nyabak ketu, anang ngelak ke iya. Alu aum sereta peradak ke agi nyawa kitai. Awak ke burung langit nya takut ku jerita tuai.
Penemu tu mesti dikunsi enggau bala anak ucu icit kitai, taja dunya udah mansang. Engka laban kitai tu agi bedarah iban, utai tu agi bisa ba tubuh anak kitai.
Selamat kerebak tawas bala followers Page Panggau Online .
- Burik Kemundang
