31/08/2026
ASSALAMU ALAIKUM ĆłAN UWA MANOMA.
Da fatan Kuna lafiya da ababen kiwonku. Kafin mu shiga karatun zan dan tunatar damu cewar, Day old din da muka saya 1,400 zuwa 1,500 sune a record din mu, nan da mako za'a fara fitar da Yan week's 5. In Sha Allah. Saboda haka kasuwa dole ta canzawa manomi. A mai da hankali wajen duba farm record kafin a tsaida farashin kaza.
Aƙalla kamar shekaru biyar baya kenan ina ta jaddadawa manoma muhimmancin samun ma’auni (analog scale) a gidan gona. A wasu lokuta ma nakan fadi cewar duk manomin da ma'auni a tare dashi, to bai San kiwo ba har yanzu, kullum abubuwan cigaba da zamani yake zuwa mana dasu, sau tari wasu watsi suke yi dashi. Musamman mu Yan arewa, shi yasa kullum komai namu yake tafiya cikin kwan-gaba-kwan-baya. Allah Ya kyauta. Naga wuraren da akan ma'auni ake sayar da kaza a raye, iya kudinka iya shagalinka.
A wancan lokaci wasu daga cikinmu sun saurari wannan shawarar, s**a sayi ma’auni kuma s**a fara amfani da shi. Amma wasu har yanzu suna ganin kamar ba wani abu ne mai muhimmanci ba.
A yau ina so mu fahimci abu guda:
Ma’auni ba kayan ado ba ne a gidan gona. Kayan aiki ne na yanke shakku, shawara.
Idan muna son kiwon kaji na zamani, bai kamata mu dogara da ido kawai wajen tantance nauyin kajinmu ba. Dole ne mu samu ainihin bayanai ta hanyar kididdiga. Domin manomi mai bayanai shi ne manomi da zai iya sanin:
• ko kajinsa suna girma yadda ya kamata;•
• ko abincin da yake basu yana bada sakamakon da ake bukata;
• ko akwai matsalar da ke hana girma; • da kuma lokacin da ya dace ya kai kajinsa kasuwa.•
Babu mai baka wannan sakamakon sai kana anfani da ma'auni
A yau zan kawo muku muhimmancin ma’auni guda 5, kuma ina fatan bayan wannan laccar, duk wanda bai da shi zai saka shi cikin kayan aikin gonarsa na gaba.
Muhimmancin Analog Scale a Gidan Kaji
1. Sanin ainihin nauyin kaji
Analog scale yana taimaka wa manomi ya san nauyin kajinsa a kowane mako, maimakon dogaro da kallo ta hanyar hasashe kawai. Wannan yana nuna ko kajin suna samun ci gaban da ake bukata.
2. Bibiyar girman kaji.
Idan kana auna kaji daga mako zuwa mako, za ka iya gane ko suna ƙaruwa da nauyi yadda ya kamata. Idan nauyin ya tsaya ko ya ragu, za ka iya bincikar matsalar tun da wuri.
3. Taimakawa wajen tsara abinci
Nauyin kaji yana taimakawa wajen fahimtar ko adadin feed da ake basu ya dace da makwancinsu da yanayin jikinsu.
4. Gano matsala ko rashin lafiya da wuri
Wani lokaci kaji na iya fara samun matsala kafin alamun cuta ya bayyana sosai. Idan ana auna su akai-akai, rashin ƙarin nauyi na iya zama alamar cewa akwai matsalar lafiya, ruwa, abinci ko management.
5. Taimakawa wajen yanke shawarar lokacin sayarwa
Musamman ga broilers, ma'auni yana baka damar sanin matsakaicin live weight na kaji kafin ka kai su kasuwa. Hakan yana taimaka maka wajen lissafin cost, selling price da ribar gona.
Daga karshe abin da nake son ku gane shine, “Idan ba ka auna kajinka ba, kana kallon kiwo ne da ido; amma idan kana auna su, kana gudanar da kiwo ne bisa ka'ida da bibiyar diddigi.”
Ma'arush Management take muku fatan alkhairi tare da fatan samun albarka a rayuwar mu, da Sana'ar mu. 31/8/2026 ✍️
