25/12/2024
GWAMNAN KATSINA YA KIRKIRO KWAMITIN BUNKASA CIGABAN AL’UMMA
Gwamnan Jihar Katsina, Malam Dikko Umaru Raɗɗa, ya kaɗɗamar da Kwamitocin Al’umma domin kula da tsarawa da aiwatar da ayyukan cigaban al’umma a fadin jihar.
An gudanar da bikin kaddamarwar a dakin taro na Hukumar Kananan Hukumomi, inda gwamnan ya bayyana cewa al’ummomi ne za su zabi ayyukan da suke bukata a yankunansu.
Kwamitocin za su kunshi wakilai daban-daban, ciki har da matasa, mata, kungiyoyin addinai (Darika da Izala), da kuma jami’an tsaro na gari tare da masu rike da mukamai a kananan hukumomi.
Gwamnan ya tabbatar da cewa kwamitocin za su tabbatar da gaskiya da adalci wajen zakulo mutanen da s**a cancanci amfana da tallafi kamar na kayan noma, irin shuka, da famfunan ruwa masu amfani da hasken rana.
Gwamna Radda ya jaddada cewa ba wani dan siyasa ko jami’in gwamnati da zai iya katsalandan ko yin tasiri kan ayyukan kwamitocin.
Kwamishinan Kudi, Malam Bashir Tanimu Gambo, wanda ke kula da Ma’aikatar Kananan Hukumomi da Harkokin Sarautar Gargajiya, ya yaba da wannan tsari mai cike da gaskiya da rikon amana. Haka zalika, Dr. Kamaludeen Kabir, Shugaban Shirin Cigaban Al’umma na Jiha, ya bayyana kwamitocin a matsayin babban tsari da ke bai wa al’umma damar shiga cikin tsarin tsara kasafin kudi da aiwatar da ayyuka.
Dr. Kamaludeen ya kara da cewa sama da ma’aikata 1,083 daga kananan hukumomi 27 a fadin jihar aka horar da su domin tallafa wa wannan tsari.
Wannan shirin yana cikin ayyukan Shirin Cigaban Al’umma na Jihar Katsina (KSCDP) da aka kaddamar ranar 21 ga Nuwamba, 2024, a karkashin gwamnatin Gwamna Radda.
