Seltun gard

31/05/2026

Endeleg er prosjektet med fiskarhuset ferdig - etter tre til tider særs intense månadar er undertaket vesentleg utbetra, takpapp og nye takrenner komen på og deretter ca 2000 skiferplater over mange, lange arbeidsdagar - ledda mine har vore i posisjonar eg ikkje trudde dei var i stand til og frustrasjonsnivået skyhøgt til tider.

I tillegg er huset målt, diverse dårleg treverk skifta ut og deler av det elektriske anlegget fornya. Ymse naboar, nesten-naboar og familiemedlemmar har bidrege på ulikt vis - utan den hjelpa hadde eg ikkje hatt sjanse å få gjort sopass mykje, so eg takkar og bukkar!

No håpar eg grunnlaget er lagt for at huset overlever meg med god margin - nye 180 år skal kanskje noko til, men ein kan håpa😊

26/04/2026

Den mest hektiske veka i denne "gardbrukaren" sitt minne går mot slutten - 7 av 9 søyer har lemba, og det meste som kan skje under lembing har skjedd, kjennest det som. Ein blir vel kjenslemessig vel knytt til desse sauene når ein berre har ni av dei, for her har vore gjort det meste som tenkjast kan for å berga lammeliv. Men med eitt stort og sårt unntak har alle lembingane enda godt🐑

Den spesielle veka vart avslutta med kurs i skifertekking på fiskarhuset - tre finfine kursdagar med supre deltakarar; takk so mykje til dei som deltok og instruktør Odd Arne Rudi😊 Me kom godt i gang med taket - mykje står att og det blir mange timar oppå der innimellom alt anna, men eg trur det blir riktig bra til slutt.

17/04/2026

Då er det som gjerne blir kalla vårens vakraste eventyr i gang på Selto - men lamming kan vera groteske greier også. Uansett, ein finfin start i år der ungsøya Johanne var første dame ut - to flotte lam utan særskilt dramatikk som ber namna Elise og Eline (sistnemnde vart omdøypt frå Elias etter ein dobbelsjekk som viste seg å vera på sin plass)

Me hadde eigentleg ikkje tru på véren Milo (rip) - han vart liten og verka puslete saman med desse søyebeista våre. So det eksisterte på eit tidspunkt både ein plan B og ein plan C for å få lam i vår også. Men Milo har vore potent som berre det - alle dei ni søyene er openbert svangre og halvparten er rundare enn nokon gong, so bekymringa har dreia over til at dette kan bli i meste laget for somme. Ein nervepirrande månad står føre🐑🤞

01/04/2026

Flinke snikkarar hjå Lokreim bygg og betong klargjer taket på kårhuset for skifertekkjingskurs 24-26.april - nokre kursplassar ledige🔨😊 ➡️ https://fb.me/e/7hoIqNPl1

08/02/2026

08/02/2026

Ein annan spennande husmannsplass under Selto var Gravdalen i Seltåsen. Her dreiv ei Torborg ein slags kafé på slutten av 1800-talet. Rykta vil ha det til at ho selde meir også, men me skal ikkje dra spekulasjonane for langt..