08/08/2026
प्रधानमन्त्री बालेन्द्र शाहको मध्यरातमा आएको सामाजिक सञ्जाल अभिव्यक्तिलाई लिएर नेकपा एमालेका सचिव महेश बस्नेतले राजनीतिक टिप्पणी गरेका छन्।
शाहले आफ्नो स्टाटसमा ढिलो भए पनि गलत नहुने, नआत्तिन र कहिलेकाहीँ एक्लै लड्नुपर्ने अवस्था आउने उल्लेख गरेका थिए।
बस्नेतले उक्त भनाइलाई उद्धृत गर्दै प्रधानमन्त्री शाहमाथि सत्ता छाड्न दबाब बढिरहेको हुनसक्ने बताएका छन्। उनले शाहको अभिव्यक्तिले आफ्ना निर्णय र कार्यशैलीलाई सही सावित गर्नुपर्ने दबाबमा रहेको संकेत गर्ने दाबी गरेका छन्।
बस्नेतले राजनीतिक नेतृत्वको सफलता सामाजिक सञ्जालमा व्यक्त गरिने भावनाभन्दा जनताका समस्या समाधान गर्न सक्ने क्षमताले निर्धारण गर्ने बताएका छन्।
उनका अनुसार जनताले अब ‘सही समय आउँछ’ भन्ने आश्वासन सुन्न मात्र चाहेका छैनन्। उनीहरू आफ्ना दैनिक समस्या समाधान भएको, जीवनस्तरमा सुधार आएको र वास्तविक प्रगति भएको देख्न चाहन्छन्।
चुनावमा प्राप्त जनमतलाई स्मरण गराउँदै बस्नेतले जनताको समर्थनबाट सत्तामा पुगेपछि उनीहरूले उठाएका प्रश्नको सामना गर्नुपर्ने बताएका छन्।
‘एक्लै लडेको दाबी गर्नुअघि चुनावमा पाएको जनमत र जनताको विश्वास बिर्सन मिल्दैन,’ उनले भनेका छन्।
बस्नेतले समयसँगै सबै कुरा स्वतः ठीक नहुने भन्दै काम, व्यवहार र परिणामलाई नै नेतृत्वको वास्तविक परीक्षा मानेका छन्।
उनले अन्ततः इतिहासले नै कसको निर्णय सही र कसको गलत थियो भन्ने फैसला गर्ने बताएका छन्।
