17/05/2026
Sa report ng Commission on Audit (COA), pinagtibay nito ang “compliance” ng Davao City government, sa ilalim ng pamumuno ni Mayor Baste Duterte, sa pagsusumite ng liquidation reports ng P530-million confidential funds ng siyudad.
Binubuo ang 19.15 porsiyento ng total maintenance and operating expenses ng Davao City, mas mataas pa ang confidential funds ng siyudad kumpara sa pinagsama-samang halaga ng parehong pondo na ginastos ng walong lungsod sa Metro Manila.
Sa parehong COA report ng financial statements noong 2024, sa walong Metro Manila cities na gumastos ng confidential funds, pinakamalaki ang sa Maynila sa P120 milyon, kasunod ang Pasay City, P80 milyon; Quezon City, P75 milyon; Caloocan City, P70.5 milyon; Parañaque City, P49.5 milyon; Muntinlupa City, P47.93 milyon; Marikina City, P25 milyon; at San Juan City sa halagang P16 milyon.
Hindi naman gumastos ng confidential funds ang mga lungsod ng Makati, Pasig, Las Piñas, Mandaluyong, Navotas, Taguig, Malabon, at Valenzuela.
Samantala, sa nakalipas na mga dekada ay sumirit paitaas ang halaga ng confidential funds ng Davao City, partikular nang pamunuan ito ni Vice President Sara Duterte bilang alkalde. Mula sa P144 milyon noong 2016, lumobo ito sa P293 milyon noong 2017 at P420 milyon noong 2018, bago pumalo sa P460 milyon noong 2019 hanggang 2022.
Sa kabuuan, mula 2016 hanggang 2022, sa administasyon ni Mayor Sara, nakapaglaan at gumastos ang Davao City ng mahigit P2.6 bilyon halaga ng confidential funds, dinaig pa ang kabuuang nagastos ng mas mayayamang siyudad, gaya ng Makati, Manila, Quezon City, at Cebu City, base sa datos ng COA.
Naging malaking usapin sa bansa ang confidential funds, na pangunahing iniuugnay sa kinukuwestiyong paggastos ni VP Sara sa P612.5-million confidential funds ng Office of the Vice President at Department of Education (DepEd)—partikular ang P125-million confidential funds na ginastos sa loob lang ng 11 araw.
