17/08/2026
ہلدی ٹو تھگس روڈ کی ری کارپٹنگ: ناقص کام پر اے سی مشہ بروم کا ایکشن، معیار پر سمجھوتہ نہ کرنے کی ہدایت
انتظامیہ گنگ چھے کے لیے ہلدی ٹو تھگس روڈ کی ری کارپٹنگ کا ناقص معیار ایک اہم اور سنگین مسئلہ بنتا جا رہا ہے، جسے بروقت حل کرنا ضروری ہے۔
عوامی شکایات پر اے سی مشہ بروم عبدالقادر نے اعلیٰ الصبح موقع کا دورہ کیا اور ری کارپٹنگ کے کام کا جائزہ لیا۔ انہوں نے متعلقہ عملے کو کام میں تیزی لانے اور معیار پر کسی قسم کا سمجھوتہ نہ کرنے کی واضح ہدایات جاری کیں۔
یہ شاہراہ علاقے کی مصروف ترین سڑکوں میں شمار ہوتی ہے، اس لیے عوامی شکایات کے پیش نظر کام کے معیار کی جانچ کے لیے ورکس ڈیپارٹمنٹ کے متعلقہ عملے کو بھی ذمہ داری سونپی گئی ہے تاکہ تعمیراتی کام کے معیار کو باقاعدگی سے مانیٹر کیا جا سکے۔
تاہم، اے سی مشہ بروم کی جانب سے واضح ہدایات اور موقع کے دورے کے باوجود ایک مرتبہ پھر کام بند ہونا اور موقع پر موجود ملازمین کی جانب سے مبینہ طور پر غیر ضروری مداخلت اور ذاتی نوعیت کے معاملات کو سامنے لانا تشویش کا باعث ہے۔ ایسی صورتحال سے آپس میں چپقلش پیدا ہونے کے ساتھ ساتھ ترقیاتی کام کی رفتار بھی متاثر ہو سکتی ہے۔
انتظامیہ گنگ چھے اور متعلقہ محکمہ سے گزارش ہے کہ کام پر مامور مزدوروں اور متعلقہ عملے کو واضح ہدایات جاری کی جائیں اور ٹھیکیدار کے سپرد کیے گئے کام کو انتظامیہ کی نگرانی میں مقررہ طریقہ کار اور منظور شدہ معیار کے مطابق مکمل کرایا جائے۔
اگر ناقص کام یا غیر ضروری مداخلت کا سلسلہ جاری رہا تو اس کا براہِ راست نقصان عوام کو ہوگا، جبکہ مستقبل میں ناقص تعمیراتی کام انتظامیہ اور متعلقہ محکمہ کے لیے بھی ایک بڑا مسئلہ بن سکتا ہے۔
نوٹ: اے سی مشہ بروم عبدالقادر نے موقع کا دورہ کرکے عوامی مطالبات کے عین مطابق کام کو بہتر انداز میں مکمل کرنے اور معیار کو یقینی بنانے کی ہدایات دی ہیں۔ اب متعلقہ مزدوروں، ٹھیکیدار اور محکمہ کے عملے کی ذمہ داری ہے کہ ان ہدایات پر مکمل عمل درآمد یقینی بنایا جائے۔
