13/08/2026
🌹 في عيد المرأة… اليوم نحبو نحيّيو نوع آخر من النساء.
موش كان المرأة اللي عندها مكتب، ولا مشروع، ولا منصب كبير…
اليوم نحكيو على المرأة الكادحة ❤️
اللي تقوم قبل الفجر، تلبس وتخرج والناس مازالت راقدة…
تمشي تخدم بالساعات، على زوز فرنك، باش توفّر لقمة عيش لأولادها وعائلتها.
على المرأة اللي تركب في وسائل النقل، تمشي مسافات، وتقاوم البرد والسخانة والتعب…
وتوصل تخدم وهي تعرف اللي آخر النهار باش تكون منهكة، أما تقول: "لازم نخدم."
واليوم زادة نتفكرو النساء اللي خرجوا من ديارهم في الصباح وما رجعوش…
نساء فقدناهم في حوادث الطرقات وهم في طريقهم لخدمتهم، يسعوا على رزقهم ورزق عائلاتهم.
💔 رحم الله من فقدناهن، وربّي يصبّر عائلاتهن.
عيد المرأة موش كان وردة وكلمة حلوة 🌹
عيد المرأة هو إننا نشوفو تعبها، نحترمو كفاحها، ونقدّرو قيمتها.
لكل امرأة تكافح كل يوم باش تعيش بكرامة…
إنتِ بطلة، حتى كان العالم ما صفقلكش. ❤️
🌹 كل عام وكل امرأة كادحة، صابرة ومكافحة بألف خير.
