Meelman

06/06/2026

Suurdeegbrood en soetsuurdeegbrood vir die Worcester Audensberg NG Gemeente se jaarlikse basaar.

26/04/2026

Heerlike suurdeegbrode gebak met Gideon Milling se witmeel. Ek hou daarvan om meer as een brood op ‘n slag te bak vir die volgende redes. 1. Dit verg omtrent net soveel moeite om 5 brode te bak as een. 2. My gluten ontwikkel lekkerder as ek met ‘n swaarder gewig deeg werk. Als is oopgebak, sonder ‘n “dutch oven”. Ek plaas ‘n bak met water aan die onderkant om te help met ekstra stoom. Geniet die res van die langnaweek, almal!

13/04/2026

15/02/2026

31/01/2026

148 uur gefermenteerde, voorgebakte suurdeeg-pizzabasisse 🥳🤤🍕

Alhoewel dit baie moeiliker is om deeg te hanteer wat só lank fermenteer, maak die langer fermentasieproses dit baie beter verteerbaar. Dit gee ook ’n dieper suurdeegsmaak, wat besonders goed saam met pizza werk.

Hulle is bestem vir die Pizza Braai vanaand om dit af te rond en finaal te bak.

18/01/2026

Nog twee mooi suurdeegbrode gebak met 50% bruin en 50% wit Eureka Mills-meel. Hierdie is beide 24-uur gefermenteer.

Resep:
- 500g witmeel
- 500g bruinmeel
- 120g rogmeel suurdeegplantjie
- 20g sout
- 650g water

Die warm weer moedig die fermentasieproses aansienlik aan. Sodra die deeg ongeveer so 70% gerys het, vorm dit en plaas dit in die yskas. Ek hou daarvan om die oond teen 180 grade Celsius voor te verhit en die brood direk vanaf die yskas in die oond te sit. Wanneer jy in ‘n dutch oven bak, voorverhit die dutch oven saam met die oond, sodat die brood die beste geleentheid het om so vinnig moontlik te rys.

Wenk vir die jaar: as jy gereeld artisinale brode koop en, soos ek, hou van eweredige snye, belê dan in ‘n behoorlike broodsnyer. Dit was een van my beste geriefsbeleggings van 2025 🤩.

28/10/2025

Ek kon uiteindelik weer ‘n paar brode in die oond kry en hulle het sommer behoorlik gerys. Ek het gebruik gemaak van Gideon Milling witmeel. Dié suurdeegbrode is beide 48-uur gefermenteer. Resep:
- 500g witmeel
- 120g suurdeegplantjie (24%).
- 10g sout (2%)
- 325g water (65% hidrasie).

Interessante feit: Suurdeegbrood word natuurlik stadig gefermenteer, wat nie net die geur verdiep nie, maar ook gluten en fytiene afbreek. Dit maak die brood makliker verteerbaar en help jou liggaam om minerale soos yster en sink beter op te neem.

22/09/2025

Eureka Mills suurdeegbrood. Witmeel 65% gehidreer.

24/08/2025

BLASIES

23/08/2025

Ek het al met amper al die beskikbare meelsoorte gespeel wat ek in die hande kon kry – tot by Caputo Manitoba, wat seker die sterkste glutenformasie gee. Tog is dit steeds plaaslike meel, soos Eureka Mills en Gideon Milling wat vir my die beste resultate met brood lewer.

Hier’s my resep vir die volgende twee brode:

1kg Gideon meel
650g water
20g sout
150g suurdeegplantjie

Los die plantjie op in die water en voeg die meel by. Meng alles en laat dit ’n uur rus. In dié tyd vorm die gluten sommer vanself (bekend as outolise). Voeg die sout by en doen 4 rek-en-vousessies, elke 30 minute. Laat die deeg ongeveer 70% rys en sit dit daarna in bannetmandjies of broodpanne. Koud fermenteer dit in die yskas vir 12–24 uur.

Verhit jou oond tot 250 °C. As jy ’n Dutch oven gebruik, verhit dit saam met die oond. Haal die deeg uit die yskas net voor bak, sny ’n gleuf (scoring) in die deeg sodat dit mooi oopbak, en plaas dit in die oond. Bak 30 minute met die deksel op, dan nog 20 minute sonder deksel teen 200 °C. In ’n pan bak jy dit vir 50 minute teen 220 °C.