https://www.facebook.com/738014172720083/

Sk Indodakazi Yosizi, Randburg (2026)

08/09/2026

Imfihlo kaGogo

Isahluko 34

Sk Indodakazi Yosizi +26777182531

"Wena wancwaba isigodo somtswiri vele laphana babekwethusela unkosikazi wakho wayesebulewe, laphana uMakhumalo wadlala ngomqondo wakho babekwethusela nje uMakhumalo wayefuna ubekwazi ukuthi uyingozi lokuthi umesabe akula okutheni. Wena idlozi lakho linzima kakhulu uMakhumalo wazama ukukubulala kanengi wehluleka, bona uke wathi usendleni wathwala umuntu ngemota yakho uthe ungakafiki lapha oyakhona. Kwaqhamuka inkomo yalimaza umuntu owawuhamba laye lamanje uyisigoga lokhwana bekungasinkomo bekuyizinanakazana lezi owazibonayo lezi uMakhumalo owayekubonisa zona. Wena idlozi lakho lakuvikela yikho ubona lemota yakho yase yafa yaphela omakanika bayizama behluleka inkomo leyo layidinga layiswela bengundofa kaMakhumalo.
Ngemva kwalokho bona wathi uqeda uhamba wahlangana labafana befuna ukukudubula kwafika amapholisa kwaba yikusila kwakho, wena uMakhumalo uzamile kakhulu kodwa wehluleka bona ibhasi leyana yawa yabulala bonke abantu wena wasila kahle kahle ungaphi umsamu wakho kungani idlozi lakho ungalithembi ngoba uyabona liyakulwela bona imizamo yabaphansi yonke manje abamtwana bakudingile bakuthola. Izinanakazana zikaMakhumalo zazama ukucima ubudlelwane bakho labamtwana kodwa kwehlula, bona baphuca yonke imcabango abamtwana ababeyicabanga ngawe ungakhohlwa abamtwana laba bathethwe sebekhulile awuzibuzi ngani ukuthi kungani bebengasakucabangi yiso lesi isalukazi wena idlozi lakho lilamandla kakhulu.
Thatha abamtwana bakho uyebabika emsamu ubathele ngenyongo ngoba abaphansi bayabadinga uMakhumalo kaselawo amandla sewaphupha umuntu oyingozi lapha yindodakazi yakho uSikhangezile njalo kusazonuka kungabolanga lapha, yeyi abaphansi bathukuthele kuledlozi elibi elilandela uSikhangezile isalukazi esidala esingumthakathi logogo wafa ehluphile nguye owatshiyela uMakhumalo lenotho yegazi yeyi kubi lapha ma ungayimelanga indaba yabamtwana bakho umuzi uzavalwa ngoba angiboni izizukulwane lapha angiboni bamtwana bedlala esangweni uNomathemba usazochithekelwa yizisu uSiyabonga inhlanyelo yakhe kuzothiwa ayilamandla hehehe kubi mani lapha kunzima hayi ikhona indaba lapha."Kwakukhuluma uGumede.
"Manje ngingenza njani ukuvikela laba abamtwana ngoba uSikhangezile usehluphile kuthiwa uchitha igazi njalo nje ngezimota zakhe ukuthi imali uyithethe ngaphi lami angazi, ngilovalo ngiyesaba ngilapha ngiyamesaba uSikhangezile ngoba usephenduke ibhubhesi kajayeleki. Ngicela ukubuza ukuthi ukuze abamtwana laba bebelemizi yabo kumele ngenze njani?"Kubuza uNyathi.
"Hayi hamba Nyathi labamtwana bakho abaphansi bazakubonisa indlela ngoba kulobungozi lapha asechithekile asechithekile soze esabutheka kuledlozi elibi mani elavuswayo, yazi umtwana lowu ulobungozi kodwa loNomathemba ulamandla inkinga lezi izinanakazana sezimile impande uNomathemba soze ezikwanise uSikhangezile ngunkosikazi wakho yeyi umtanakho ulesibindi esinzima yeyi ngiyamsaba mina khuluma labakoNyathi. Khupha lesi isigodo osigebhele endlini uthi ngunkosikazi wakho khuluma labaphansi bancenge bancenge bazomambulela uNomathemba bazofika ebuthongweni betsho ukuthi mele enze njani kodwa inzalo ayisekho lapha, lisazibhoda izinyanga indaba ilapha uMakhumalo sephelelwe ngumphakho usefana lomganxa lo otshona ukhonkotha kodwa ungalawo amandla okuluma, uSikhangezile ufana lenja le elobhova edla kwasani, uSikhangezile ufana lenyoka le othi ungayinyathela umsila ma iphakamisa ikhanda vele iyakugamula ayikukhuthi. UNomathemba engazama uSikhangezile uzambulala umtanakho lowu okumele ekwenze yikuvikela umdeni hayi ukulwa, engalingi ethi uyamphosa noma abantu bengathini lingavumi ngoba lingamzama uyalibulala lonke." Kwakusitsho uGumede. Basala bengalankani uMaDube kanye loNaZibanani babona ukuthi kunzima egumeni likaMakhumalo ngabathakathi yeyi besaba bacabanga ukuthi labo sebengafela ize.

Obhalayo ngu S-K indodakazi yosizi eyakoMadabe uSikhangezile Nleya.

IYAQHUBEKA

05/09/2026

Imfihlo kaGogo

Isahluko 33

Sk Indodakazi Yosizi +26777182531

Bamamukela uNyathi ngezandla ezifudumalayo laye wabona engaqedi ngokumgcinela abamtwana bakhe.
"Ngiyabonga kakhulu ngiswele amazwi ezinkulungwane umsebenzi eliwenzileyo mkhulu kakhulu ngiyabonga ngithi isandla sedlula ikhanda elikwenze kwabami abamtwana likwenze lakwabanye ngiyabonga ngizwa ngizelwa yinjabulo enkulu, ize ngibe yisehluleki abamtwana bami bakwazile ukuluthola uthando lomzali lolu engingazange ngikwazi ukubanikeza bona kodwa kathesi sengizaqala ukudlala indima yokuba ngubaba. Ngizabafukamela abamtwana bami njengesikhukhukazi esifukamela amatsiyane aso lami ngisazoyidlala eyami indima."Kwakusitsho uNyathi bajabula uMadube loNakaZibanani besizwa uNyathi ekhuluma okwendoda.
"Baba umkhulu uyangibiza uthi ngize kuye ekwazi ukungiyabela izibusiso baba wawungaphi sonke lesi isikhathi mina ngihamba lomkhulu! Kwakusitsho uNomathemba etsho esukuma okohlanya esibathela ngesiqubu.
"Uyahamba lomuntu nxa singamekela soze simbambe baqalisa ukumgijimisa engena iganga kodwa wathi engakayi khatshana wayesembambile uSiyabonga ngoba wayengafuni ukuzwa ngodadewabo.
"Nomathemba ubaba sekhona konke okumele kulungiswe kuzalungiswa ugogo angikwanisanga ukumlanda ngoba ngesaba izinanakazana zakhe. Kodwa ngilethemba lokuthi ubaba ma esekhona konke kuzahamba ngomumo." Kwakusitsho uSiyabonga.
"Mhuuuu vele ugogo ebezakubulala ugogo ubezakubulala ukuze athole amandla akhe hahahaha angihleki ngiyalinganisa lowana umuzi ngumuzi wezikhohlakali bahleli bechitha igazi njalo nje hayi mina ngiyesaba lami bayafisa ukungibulala kodwa ixhegu engihamba lalo alifuni bumbulu, mkhulu bayangibamba ma ngithi ngiza kuwe bacabanga ukuthi ngiyahlanya mina angihlanyi angithi mkhulu angihlanyi vele."Kwakusitsho uNomathemba wayethi ma eseqala ukukhuluma ngomkhulu wakhe indlela owayeqala ukumoyizela ngayo wawungafunga uthi uyahlanya. Kodwa yena efunga egomela ethi kahlanyi uhlutshwa ngamadlozi.
Ngosuku olulandelayo bavuka baqonda kuGumede bavuka entathakusa bayafisa khona ilanga seliphuma kunina wajabula uGumede ebabona.
Wabayamukela wangena labo endumbeni wafika wakhuluma kabanzi loNyathi.
"Wafihlwaphi umama wabamtwana laba njalo wabulawa yini unkosikazi wakho, ngoba wena wawufunga ugomela uthi liphakade lakho wadliwa yini lomtwana? Engifuna ukwazi yikuthi icala labamtwana laba ngelani?" Kwakubuza uGumede.
"Mina angazi ngoba unkosikazi bambulala phambi kwami uMakhumalo kanye lezinanakazana zakhe, yayikhona inyoka engangingayiqondi umbala wayo ngoba uyathi yayizitshintsha okonwabu eyayillkhe indiza emoyeni ngesikhathi bembulala, mina zakhe ngimbulale unkosikazi ngoba bengimthanda ize bengamlobolanga ngoba uMakhumalo wawenqaba amalobolo mina bengimthanda njengonkosikazi ngoba ngangimbikile edlozini. Bambulala ngenkemba ebukhali bathi beqeda ukumbulala bangitshiya laye bathi ma ngingafuni ukuya ejele noma ukufa ngimcwabe kunengi lendaba ingivusela amanxeba ayala ukuphola ngoba inhliziyo yami wopha igazi imihla lamalanga. Ukuthi unkosikazi wabekwa ngaphi angazi eqinisweni ngoba lami nginje ngilencwaba la engamcwaba khona ngedwa uMakhumalo ulencwaba la owamncwaba khona lomphakathi ukuthi owancwaba umzimba wakhe wangempela angikwazi ngoba lamanje ngiyadideka ngoba le yindaba enzima impicabadala. UMakhumalo wenza umdeni wami wangihlamukela wabatshela wathi yimi engibulale unkosikazi wami ngoba bengihleli ngimhlukumeza mina unkosikazi isandla sami ubengasazi mina bengisebenza eNingizimu Africa ngibuya lapha ngivakatsha ngizobona unkosikazi labamtwana ngoba bengilomdeni, ngathi ngibuyile yikho la okwaqala khona imtshikatshika ngoba umthakathi omkhulu onguMakhumalo kanye lemkhovu yakhe babevele sebehlelile bengilindile. Angifuni kukhuluma ngalindaba ngoba iyangilimaza. Kodwa engingakutsho yikuthi angazi ukuthi ithuna likankosikazi elamampela yiliphi."Kwakusitsho uNyathi wakhuluma kabanzi umuntu omdala wazehlisa inyembezi ukuhlakanipha konke kwasekuphelile kwezakhe inhlamvu zamehlo wakhala kwangazani yikho ukufa kukaNakaSiyabonga kuqeda yenzakala. UMaDube kanye LoNakaZibanani baqala ukwesaba besizwa ukuthi ugogo wabo Siyabonga uyingozi njalo ulabomantindane.
Baba lemibuzo eminengi bazibuza ukuthi ma kungenzeka ukuthi uMakhumalo athumele izinanakazana zakhe zizobabulala kutsho abamtwana babo bazasala bezintandane baqala ukucabanga kabanzi ngendaba kaNomathemba kanye lo Siyabonga.

Obhalayo ngu S-K indodakazi yosizi eyakoMadabe uSikhangezile Nleya.

IYAQHUBEKA

04/09/2026

Imfihlo kaGogo

Isahluko 32

Sk Indodakazi Yosizi

"Pho ugogo wancwaba umama lawe wancwaba umama incwaba likamama elamampela yiliphi? Sengiyadideka ngoba amancwaba angemva komuzi kuthiwa ngawabamtwana bakagogo onke, ugogo wasitshengisa elikamama. Le yindaba enzima imphicabadala ngiyaphicaphiceka mina. Kungaselani baba ngicela ukubuza ngoba angizanga ngendaba kamama lapha ngize ngendaba kaNomathemba siyahamba noma njani?" Kwakubuza uSiyabonga.
"Sizahamba ngizayenza noma yini esemandleni ami ukuthi ngilivikele likwazi ukuba lekusasa elihle ngoba ubugwala abusizi ngalutho buka manje impilo yami yatshabalala ngenxa yobugwala ubufisa ukuthi sihambe nini ndodana?" Kwakubuza uNyathi.
"Kusasa ekuseni ugogo engakaze engibone engangibona ngizakuba senkingeni njalo lempilo kaNomathemba izaba sengcopheni! Kuphendula uSiyabonga.
"Kulungile ndodana kodwa ugogo wakho ngizwa amahungahunga kuthiwa ngani inqondo sezimtshiya ngingazi kumbe ngamanga phela abantu bayathanda ukusenga ezimithiyo. Kulungile ndodana sizahamba entatakusa njengokutsho kwakho, kodwa ngoba inqola zaphansi zihamba amazolo esetshabalele sizayenza njani kumbe sithathe amabhasikili sivuke ekuseni ngovivi siyabe sizagadela koTsh*tshi ngoba le akula bantu abasaziyo abangachazela uMakhumalo."Kwakusitsho uNyathi bavumelana bavuka ngovivi uNyathi watshiya impepha wacela abaphansi ukubana bebengumkhombandlela wabo, wabika loSiyabonga edlozini, bathi beqeda lapho batshova amabhasikili balubhekisa khona ekhalanyoni bafika balinda ibhasi koTsh*tshi ngoba basebekhathele njalo uNyathi esetshaywa likhanda lebhabhalazi.
"Makhumalo ntombendala! kumemeza uBambanani
" Ngiyakubiza awusabeli?"Kwakubuza uBambanani wagijima okomuntu osebone isilwane uMakhumalo esiyoguqa phambi kukaBambanani.
"Wawusithi kophetha ngani buka manje suyinja sudubeka wathatha amandla wonke wawanikeza uSikhangezile buka manje ukudonsa ngempumulo kukhala esakhe isicathulo emzini wakho! Lapha ligaya ngelomhlathi ungibona ngilapha ngicabanga ukusa uSenzo kogoqwanyawo ngoba selokhu ngathwetshulwa yingwe angikaze ngibone umfazi olamadoda amabili umfazi olesithembo ngiyakuyala mina. La engidla khona akula ndoda engadla khona yikho ubona uSenzo sezitika kuwe uSikhangezile ngamfaka idwala ngasese mina okwami ukudla ngiyakwazi ukukudingela isigcekiselo esilandla ukuze kungabi khona abafana abadlalela kikho. Njalo ngiyambona uSenzo indlela ongikhangela ngayo ngicabanga ukuthi ucabanga ukungithelela utshefu ngife manje soze elunge mina ngiyinsimbi edlezinye enganya mncane kabi uSenzo kimi. Njalo wena vele kungani ungathathi zonke lezi izinanakazana uyezibisela la owazithatha khona ngoba aziwazi umsebenzi wazo."Kwakusitsho uBambanani.
"La engazithatha khona inyanga yakhona seyafa yikho ubona sengidubeka kanje ngiphenduke isighili emzini wami ngaze ngafisa ukuthi ngabe abamtwana bami angibabulalanga ngabe ngabulala bonalaba abazukulu ngoba abalancedo kumanje esengiphenduke inhlekisa emzini wami..... "Kwakusitsho uMakhumalo.
"Hayibo ma usithi abazukulu ubala lephakade lami aluqonde ulimi lwakho wena salukazi esakho isikhathi sesadlula wakholisa kwenela manje yisikhathi sethu uke uzame amaqhinga akho ngizakukhupha ulimi lolo oluyinkinga." Kwakusitsho uBambanani.
"Ngiyaxolisa ulimi lutshelelile." Kwakusitsho uMakhumalo.
"Ngiyakuxolela phela mina ngilenhliziyo enhle yikho ubona bengafuni igazi ezandleni zami bengifuna uyobisela omantindane bakho laba abangala ncedo, kodwa kungaselani ngiyindoda ngizaphuma leqhinga." Kwakusitsho uBambanani.
UMakhumalo wavele wabona ukuthi indaba yakhe ayikho laqala ukugaya ngelomhlathi ebona ukuthi akula ongamsiza wabona ukuzikhunga kungamsiza.
UNyathi lendodana yakhe bathi besahleli besadla inxoxo zomlomo yabe isifikile ibhasi.
"Liyangaphi badala ngenani sambeni?" Kwakusitsho umtshayeli.
Baphakamisa amabhasikili abo bethi bayangena umtshayeli wenqaba.
"Ngoba lithi amabhasikili soze liwatshiye lizawabhadalela na imali elingana leliyibhadalayo?" Kubuza umtshayeli.
"Yebo sizawabhadalela akula nxaki mfowethu." Kwakusitsho uNyathi.
"Aliwatshontshanga mpela amabhasikili analawa kahle kahle liqhamuka ngaphi khonalapha?" Kwakubuza umtshayeli.
"Cha asiwatshontshanga njalo asisiwo amasela thina besingazi ukuthi wena ungumahluleli kambe sungaze usahlulele ungasazi, incwadi encwele ithi munye owahlulelayo kumbe nguwe kungaselani siyaxolisa lathi singabahlali bakhonalapha la esiyakhona kudinga zonalezi intondolo." Kwakusitsho uNyathi.
Yalaqa ukutsha inxoxo ebhasini indlela yabamfitshayeli umtshayeli loNyathi bagcina sebengabangane ngoba uNyathi engumuntu othanda ukuhlala ehleka njalo engumuntu ofuna ukuthi la okhona khona abantu behleke bekhohlwe ngenkingazabo bengagcini sebecabanga okubi. Wayesenza lokho kungenxa yezimo odlule kizo uNyathi wadinga waswela ongamchazela udaba lwakhe.
Bahamba bayofika bathola uMadube kanye loNakaZibanani bebalinde ngamehlo abomvu bajabula bebona uSiyabonga ethutsha loyise bavele babona ukuthi nguye mpela ngoba uSiyabonga wayemfuze wamqeda uyise baqinisile ma bethi udiyo lufuze imbiza ngoba ukufana kwabo kwakukwelinye izinga.

Obhalayo ngu S-K indodakazi yosizi eyakoMadabe uSikhangezile Nleya.

IYAQHUBEKA

28/08/2026

Imfihlo kaGogo

Isahluko 31

Sk Indodakazi Yosizi

"Ngabe nguwe ndodana obe umi ezinyathelweni zami ube uzayenza njani? Uyazi ngiyazi uganwe unwabu kodwa kunzima akulula ngendlela otsho ngayo ngiyazi kubuhlungu ukuthi walahlekelwa ngumama kanye lami, lami ungibona ngilapha inhliziyo wopha igazi mina ngalahlekelwa ngumdeni wonke ngalahlekelwa ngunkosikazi emehlweni ami, ngalahlekelwa ngabamtwana bami engihleli ngibabona imihla lamalanga. Ngibabona njalo kodwa kunzima ukuthi ngibakhombise ukuthi ngabamtwana bami mina bengilomdeni silekhaya elifudumalayo njengoba ulibona.
Umuzi lo angiwakhanga ngedwa ngawakha lonkosikazi wami kanye labamtwana bami ize babebancane. Ngangingacabangi ukuthi ngolunye usuku ngizaba sengiyisidakwa kanje! Mina utshwala bengingabunathi ngiqale ukubunatha ngithi ngibalekela inkinga zami, kanti cha angizibalekeli ngenza inkinga zingandele ngamandla mina bengiyisambane uqobo lwaso ngisebenzela umdeni wami kodwa konke lokhu kwatshabalala njengamazolo ebona ilanga. Ugogo wakho lo wakuphuca konke lokhu kwezami inhlamvu zamehlo ngenxa yokuthi umthetho umela abasifazana walithatha, njalo lami ngavela ngadela eNingizimu Afrikha ngabuya ngazozihlalela lapha, ngoba ngibona singasekho isidingo sokuthi ngisebenze ma ngithi ngiyasebenza ngiyabe ngisebenzelani? ngidlalisa amandla ami bathi ilifa leziwula lidliwa yiziwula yiyo impilo esengiyiphila mina."Kwakukhuluma uNyathi wakhuluma kabanzi ngemva kokuthi umtanakhe uSiyabonga wayembeka amabala.
"Uchaza ukuthini baba ma usithi wena ube ulomdeni wakho omuhle ugogo wawuphuca phambi kwezakho inhlamvu zamehlo? Ngicela ungichasisele kabanzi ngoba ngiyadideka ngidinga ukwazi? Njalo ma usithi umthetho umela amalungelo abasifazana utsho njani? Ngiphinde ngibuze ma usithi wena umuzi uwuyakhe ulomdeni omuhle ulabamtwana bakho utsho abamtwana bakho baphi ngicela indaba yakho uyendlale kahle njalo ngatshayi inja ufihla umphinu, ngoba ngimdala manje ngidinga ukulazi iqiniso lonke liphelele ungagudli iguma udaba lwakho lubeke lunjengokuba?"Kwakubuza uSiyabonga edidekile.
" Qala utshele mina waze njani ukuthi mina nginguyihlo? Njalo ma usithi udadewenu ugulela ukufa lokuphila uyawavula uyawavala uchaza ukuthini ndodana, okunye lokhu ngizakuchazela ngemveni?"Kwakubuza uNyathi eseyethukile utshwala bavela baphela ekhanda esecabanga ukuthi umtanakhe uyagula noma engafa kasoze ebambe. Ngoba kuthiwa umuntu ma efile obakomama babamba enyaweni abakobaba babamba ekhanda watsho ngenhliziyo wathi yena uzabe emi katshana njengomuntu wokuza othe ehamba wasesizwa isifo wasehamba esithi eyephelekezela othe wadlula emhlabeni. Inhliziyo yakhe yaba buhlungu ngamandla wathi njalo sekungenzeka uNomathemba ma ethe wadlula emhlabeni ugogowakhe uMakhumalo enqabe ukuthi ehambe esifeni ngoba ekhohlakele okwamagama.
"Ngezwa kudala ukuthi ungubaba mina omunye umama wangitshela, kathesi uNomathemba uyagula uhanjelwa zinqondo ma sihamba ebamtwini bathointa ukuthi abaphansi bathukuthele bayamdinga, ngabuza basebechaza kabanzi ukuthi wena ungubaba! Sengihambe ebamtwini abayisikhombisa bakhuluma into eyodwa ngilethemba ukuthi bakhuluma iqiniso bathi ukuze uNomathemba alulame kudingakala wena baba! Yikho ubona ngilapha ngalobu ubusuku ngoba bathi nxa singamphuzela senganqamula amafu mina soze ngikwazi ukuphila ngaphandle kwakhe ngisamdinga empilweni ngicela baba uvume sihambe sonke! Kwakusitsho uSiyabonga wakhuluma waze wasenga ezimithiyo esenzela ukuthi uyise amethembe njalo esenzela ukuthi avume ukuthi behambe bonke.
"UMakhumalo ukuvumile lokho mina soze ngihambe ngoba uMakhumalo engangincwaba ngiphila lesana isalukazi silomoya omubi." Kwakusitsho uNyathi.
"Ubona kungcono ukuthi kufe umtanakho? Ma usithi wena soze ukwanise kutsho ke uzabulawa yimi igazi lakho lizabuzwa ezandleni zami, njalo uMakhumalo kazi lutho kakwazi lokuthi singaphi kakwazi lokuthi kwenzakalani empilweni zethu sahamba samtshiya loSikhangezile ngoba bebesebehleli bexabana bekhombana ngeminwe."Kwakusitsho uSiyabonga.
"Hayi ma uMakhumalo engakwazi khululeka sohamba sonke ndodana, lamtshiyelani uSikhangezile ngoba abamtwana bomuntu bayabambisana noma inqamu ibukhali kathesi uSikhangezile uthenge amakhombi amathathu aselezinyanga ezimbalwa kodwa awabulali abantu enza ezibukwayo abantu bacabanga ukuthi uthwele ngoba uyezwa kuthiwa ikhombi kaSikhangezile namuhla itshaye eMpandeni enye uzwa kuthiwa itshaye koNdolwane enye uzwa kuthiwa itshaye eGwanda. Isimanga yikuthi ma imota zakhe zibulele abantu kanje bonke uyabancwaba yikho abantu becabanga ukuthi imota zakhe ziphila ngegazi lami ngiyavumelana labo! Khonapha ngibuhlungu ngomtanami osephenduke umthakathi emncane. Kwakusitsho uNyathi.
"Aaaaaaaaah kutsho zimbi indaba kodwa uGumede uyithintile lendaba yokuthi uSikhangezile uzakuba ngumthakathi omkhulu manje usevele seqalile, mhuuu angazi yinto esizayithini tshono asiwelanga endabeni kagogo kwenzakalani ngomdeni wakho?" Kwakubuza uSiyabonga.
" Mina ugogo wakho ngiyamesaba lowo nguye owachitha umuzi wami, wabulala umamakho phambi kwami wayelenyoka ezazimbili enye ilamaphiko enye imnyama yazi soze ngafa ngakhohlwa, waqeda wathi ngimcwabe ngingedwa kumbe ngidle isidumbu sakhe ma kungenjalo ngizafela ejele,mina ugogo wakho angimzondi ngiyamenyanya ngenhliziyo yami yonke ngingathola abantu bembulala lami ngingancedisa. Yazi okungizwisa ubuhlungu kakhulu ngoba kamanga lapho watshiya isidumbu lapha wahamba wayahlela umcwabo kamamakho bamcwaba khonale abantu ababehambile bathi bambona mpela kodwa mina umamakho ngamcwaba lapha egumbini lethu lincwaba lakhe leli olibonayo." Kwakusitsho uNyathi wathi engakaqedi zehla inyembezi wakhala isililo sikaNandi.

Obhalayo ngu S-K indodakazi yosizi eyakoMadabe uSikhangezile Nleya.

IYAQHUBEKA

27/08/2026

Imfihlo kaGogo

Isahluko 30

Sk Indodakazi Yosizi

"Mina lapha angizwisisi muntu omdala ma usithi umama ngumantindane ngoba thina umama asimazi watshona sibancane asimazi.
Uchaza ukuthini ngicela ungenze ngizwisise ngoba ngiyadideka, njalo ngiphinde ngibuze ukuthi ubaba singamletha kanjani lapha siyamlanda sifike sithini ngoba kasazi thina?"Kwakubuza uSiyabonga.
"Uyihlo uyalazi mhlophe! uyabe ecatsha ngomunwe ma esithi kalazi ulazi kahle kodwa uphoxwa ngumumo wenza izifungo logogo wakho.
Njalo lina lisazozibhoda zonke izinyanga ma kungalungiswanga lapha lisazodubeka ugogo wakho kanye loyihlo bayalazi iqiniso ugogo wakho yinyoka elamakhanda amabili ulala ephenduka,uyihlo inkinga yakhe ligwala lendoda wesaba ukufa yikho ubona waze wadela abamtwana bakhe lamanje uyihlo kathathanga uyazidla imihla lamalanga wesaba ukuthatha ucabanga ukuthi kuzaphinda kwenzeke kwenzeka endulo.
UMakhumalo nguye odonsele uSikhangezile kuleyi ndlela kasoze esamkwanisa.
Okumele likwenze yikuthi lingiphathele bona bobabili." Kwakukhuluma uGumede.
"Ukuthi sibalethe lapha kuzakuba nzima akula enye indlela elingasincedisa ngayo ikakhulu elingangancedisa ngayo uNomathemba ngoba nangu uhanjelwa zinqondo?"Kwakubuza uSiyabonga.
" Udadewenu kahanjelwa zinqondo konke okukhulumayo yinto eziphilayo kodwa soze ngikwazi ukumncedisa ngoba abaphansi bavalile ngethunzi elimnyama, yikho lizahamba ebamtwini befike bebambe ubuthakathi akula buthakathi lapha ngamadlozi dingani uyise walengane zingakaze zonakale izinto,mina ezami izandla zibotshiwe akukho engingamnceda ngakho ma uyise engabuyanga lapha." Kwakusitsho uGumede kwathula kwathi cwaka kuSiyabonga laligaya ngelomhlathi watsho ngenhliziyo wathi "Noma kanjani uNomathemba kumele elulame kumele ngimsindise."
"Kuyezwakala muntu omdala nxa ubaba singamthola sibuye nini?" Kwakubuza uSiyabonga
"Noma nini livumelekile ukuthi libuye." Kuphendula uGumede.
UMaDube kanye lonakaZibanani basebetshelwe ngamathe emlonyeni bengasakwazi ukuthi bethi I njalo bengakwazi ukuthi bethini.
"Gumede ngicela ukubuza lapha kunganjani uNomathemba simhambise kugogo wakhe?" Kwakubuza uMaDube.
"Lapho lizabe limimbela igodi lokufa malingakwenza lokhu, ngoba ukunyathela laphana ekulesi isimo yikufa kwakhe ngoba kasoze ekwazi ukuzilwela, njalo izinanakazana zikaMakhumalo zimfuna ngamehlo abomvu zifuna igazi ukuphila kwalomtwana sekusezandleni zenu lina bomama."Kwakusitsho uGumede.
Bavalelisa bawela indlela ngoba babengaselaso isixazululo.
"Badala ngiyalithemba kakhulu kuNomathemba impilo yakhe isezandleni zenu kambe ngingaba yini ngaphandle kwenu, lingethule umthwalo obungisinda emahlombe okwakathesi ngizacela libe lilihlo likaNomathemba limkhangele engayindawo engaphumi ekhaya lihlale liseceleni kwakhe.
Ngiyakwazi akula lutho olungenzeka kuye ma likhona eduze laye, namhlanje ngithabatha lolu unyathelo ithemba lami ngilitshiya kini, ngisayolanda ubaba ngoba angisoze ngekele udadewethu esifa ngimbukele yisikhathi sokuthi ngidlale eyami indima eyokuba ngumfowabo.
Ngiyazi ngimphoxile kakhulu kodwa kathesi kumele ngibonise ukuzisola njalo mele ngimbonise ukuthi engangithemba ngempilo yakhe, ngizacela ukusala eCrossroad ngilindele amabhasi aya ekhaya." Kwakusitsho uSiyabonga.
"Ekhaya uhamba kanjani ngoba ukuhamba kwakho uMakhumalo engakubona lezinanakazana zakhe zizakulandela ukuze zithole umkhondo ngoNomathemba."Kwakusitsho uMadube.
"Khululeka soze bengibone ngoba ngizafika ebusuku ngivele ngiqonde kubaba njalo ngizakhuluma laye eze ezwisise ngizomtshela ukuthi indoda lendoda iphiliswa yizinqumo zayo sekukuye ukuthi uyavikela intandokazi yakhe noma uyayiyekela ifele egangeni." Kwakukhuluma uSiyabonga wakhuluma kabanzi.
"Ndlela nhle mtanami okuhle kodwa engikufisela khona udadewenu somnakekela njalo lawe sizokukhulekela ukuze uhambo lwakho lukhanye." Kwakusitsho uNakaZibani wayekhuluma ngenhliziyo ebuhlungu elethemba kuSiyabonga ngoba wayemthanda uNomathemba wayengafuni ukuzwa lutho ngaye ngenxa yemisebenzi yakhe lezifiso zakhe.
Basebefikile eCrossroad wehla uSiyabonga wangena ezimoteni eziyakibo ngehola letshumi ntambama (10 pm) wayesehla esilindelweni samabhasi wehla wazihambela kancane kancane njalo wayegqoke impahla ezimnyama emboze ikhanda engafuni kube khona ombonayo ngemva kwamahola amabili wayesefikile emzini kayise.
Wafika waqoqoda izindlu zonke ngemva kwesikhathi esedelile esithi sesiyohlala emkulwini ebe elinde uyise wabona uyise engena ngasesangweni.
"Yeyi wena ungubani wena omi amadlodlongwane emzini wami?" Kwakubuza uNyathi edakwe ephelile engazazi ukuthi ungubani.
"Yimina indodana yakho uSiyabonga." Kwakuphendula uSiyabonga.
Wamsondelela uNyathi ecabanga ukuthi uyaphupha kukathi kaphuphi ngumtanakhe uqobo.
"Ndodana yami angila mtwana mina ufunani lapha wena ufuna ukungibulalisa ngabakini phuma emzini wami." Kwakusitsho uNyathi.
"Angiyi ndawo ngoba kukithi lapha unuka phu utshwala ucabanga ukuthi uyazikhupha enkingeni ngotshwala awuzikhuphi uyazifaka utshwala abuxazululi inkinga obhekane layo, wena baba kwamele ume isibindi ubhekane lezimo zempilo uzosilandula kuze kube nini? Umtanakho uyagula manje ulwela ukufa lokuphila wena ukhona siphenduke intandane ezipheleleyo wena uphila ungifundisani? Mfundiso bani oyiletha kimi lana uchaza ukuthi kumele ngibalekele inkinga zami ngicatshe ngotshwala."Kwakukhuluma uSiyabonga wakhuluma njengomuntu osemoyeni ngapha ekhala ecabanga isimo udadewabo okuso ngapha uyise ephila engafuni ukuba ngumzali lomqotho kibo.
"Ngiphenduke ngaba ngumzali ngimncane kanje wena ukhona uphilelani ma ungafuni ukubhekana lezimo, yazi ngizibuza ukuthi kungani ugogo engayenzanga wena umkhovu wekela umama ngoba wena uyisehluleki ufana lomuntu ofileyo kithi, wamekela umuntu wakho omthandayo bamphendula umkhovu wehluleka ukulwela lathi igazi lakho pho uphilelani umsebenzi wakho ngowani lapha emhlabeni? Kutsho wena ufana lenyoka ebekela amaqanda iwatshiye esale ecandula ewodwa abamtwana bakhona bekozikhulela."Kwakusitsho uSiyabonga zehla inyembezi kuNyathi wavula isigcabha ukuthi bengene endlini bekhulume omakhelwane bengakaze bezwe imfihlo.

Obhalayo ngu S-K indodakazi yosizi eyakoMadabe uSikhangezile Nleya.

IYAQHUBEKA

27/08/2026

Imfihlo kaGogo

Isahluko 29

Sk Indodakazi Yosizi

Bathi bephuma emzini kaMathiya baqala ukukhonona uSiyabonga wayengaphathekanga kahle ukuthi uMathiya ufike wakhuluma into engekhoyo.
"Mina angizwisisi ukuthi kungani ubaba lowana efike wathi kulenkukhu abayikhupha amehlo ezulayo egangeni edinga igazi leyo nje yona ngiyayiyala! Njalo ngiyala lapha ma ubaba lo esithi thina sakhuliswa ngumkhulu utsho umkhulu wethu uphi, limzwile sesithi umama laye uyakhala ngathi umama ekhala ngaphi sewaba ngamathambo mhlophe, njalo thina umkhulu adimazi sekungenzeka waya kwelusa amadada. Kungani vele babakazi belisiletha kulobaba akula omunye elimaziyo ongasinceda ongasoze afike athuze izihlahla kube ngumuntu olesithunywa esilamandla?"Kwakubuza uSiyabonga inhliziyo sibuhlungu ngokuthi uMathiya ufike wehluleka ukuphorofitha into ephilayo.
"Lapha Siyabonga lokhu kuyimvela kancane akusibo bonke abantu abahamba kubaphorofithi befike bebaphorofithe iqiniso lapha esingakwenza asidluleni kuGumede mhlawumbe yena engasisiza singamahluleli uMathiya ngoba thina asikwazi okusemfihlakalo.
Njalo singenzi angazani kukhona esikwaziyo ngoNomathemba ebesifuna esitshele khona okuzasijabulisa."Kwakuphendula uMaDube ngomoya ophansi ezama ukuchasisela uSiyabonga.
Abasazanga bahamba ibanga elide bavele baquma bayakuGumede uGumede wafika wabamukela ngezandla ezifudumalayo.
"Namuhlanje badala angisebenzi ngilamalanga okusebenza ngisebenza ngoMvulo langolweSithathu kanye langomgqibelo, kuzakuba kuhle ma lingabuya kusasa." Kwakusitsho uGumede.
"Uxolo mkhulu usibona silapha sisuka katshana njalo soze sikwanise kusasa ngenxa yomango azikho indlela na esingenza ngazo?" Kwakubuza uMaDube.
"Bangaki abafuna ukungena?" Kwakubuza uGumede.
"Silethe umtwana sizangena laye sonke lapha." Kwakusitsho uMaDube.
"Ma kunjalo ngizafuna imali yokukhanyisa engange 500 amakhulu amasithupha." Kwakusitsho uGumede.
Bavumelana bangena bathe bengena bakhanyisa lakanye waqala ukuhlola.
"Lapha ngibona abaphansi bafulathele ngibona bavale ngesithunzi sabo mina angifuni kulikhohlisa, lapha akula buthakathi abaphansi bathukuthele ngoba ngibona nanti ixhegu elidala lihamba lezalukazi ezihamba ngodondolo. Lapha selingazibhoda zonke inyanga kodwa kufuneka umsamu bavalile ngesithunzi sabo.Njalo selingabhoda izinyanga zilitshele amanga njalo zilidle izimali yenzani imfanelo ngalumtwana kungakaze konakale lomtwana kahlanyi uhlutshwa ngabaphansi."Kukhuluma uGumede.
"Ngicela ukubuza muntu omdala leli ikhehla elilibonayo kanye lezalukazi babuyaphi ngoba thina usibona silapha asiyazi imvelaphi yethu njalo singenza njani ukuze sikwazi ukuthola usizo?" Kwakubuza uSiyabonga.
"Ngibona isibongo sakoNyathi mina lapha inkinga nje lapha kukhanya kulemfihlo enkulu, kodwa leli ikhehla ngelakoNyathi kanti ngubani uSikhangezile?Ngoba lesi isalukazi ngisifuna lapha lesi isalukazi sizoluhlupha empilweni ngibona ephenduka esiba ngumthakathi omkhulu uyabona lomuntu kulesalukazi esidala ezimlandelayo lesi isalukazi besingumthakathi onzima njalo sihamba labogogo ababili esabathwasisa ubuthakathi lesi isalukazi sifuna ukuthwasisa logogo uSikhangezile abengumthakathi kodwa ngibona nje sengumthakathi onzima odlula sona lesi isalukazi esasingumthakathi onzima. Lo mina angimboni abaphansi bavalile dingani abantu bakoNyathi bakhanyisele lomtwana ngibona elusizo olukhulu phakathi komdeni nguye umuntu onganqoba uSikhangezile."Kwakusitsho uGumede wakhuluma kabanzi ngoSikhangezile.
"USikhangezile kasuye gogo ngumtwana ngudadewethu okwenza sabaleka yena samtshiya yikwenza kwakhe ngoba into zakhe bezimhambela kahle kodwa engakaze esebenze uthenge imota ethusa umphakathi wonke esigabeni. Ngemva kwalapho waqala ukungazwani logogo asazi ukuthi babangani, ngoba ngelinye ilanga sathi sihleli wezwakala esithi kugogo engesabi kadle ukudla ngoba ma efuna ukumbulala uzambulala zinengi indlela zokubulala umangoye watsho wathi kafakanga utshefu ekudleni. Besengibuya lapha ma lisithi thina singabakoNyathi angali ngoba ukhona ugogo engake ngahlangana laye wangitshela ngobaba kodwa ubaba ngumuntu wesigaba njalo khanya uyamesaba ugogo angazi ukuthi khonalapho singancediswa njani ukuze sikwazi ukunceda udadewethu alulame. Ngiphinde ngibuze laphana kuSikhangezile singamnceda kanjani ukuze angaphenduki umthakathi abengumtwana olungileyo?"Kwakubuza uSiyabonga wakhuluma kabanzi ngoba wayesedidekile.
"Lapha kuSikhangezile akusekho kulungisa ngoba bexabana kanje logogo wakho umnikeze udiwo lwegazi udiyo oluhamba lezinanakazana okuyizo ezimthengela imota, ugogo wakho ufuyile ulabomantindane abayehlukezeyo kodwa babili abamehlulayo njalo ababanga uSikhangezile, oyedwa bekumele etshade uNomathemba inkinga uNomathemba ebezibona lezi izinanakazana njalo ebezikhulela ngamandla yikho bebesebefisa ukumbulala esisodwa ebesifuna ukutshada uNomathemba esilamandla anzima senqaba, yiso esesisilwa sifuna ukuba ngumnyeni kaSikhangezile kodwa zonke lezi izinanakazana uSikhangezile uzazikwanisa ngoba uledlozi lobuthakathi elinzima.
Lina elingakwenza ngodadewenu dingani uNyathi libuye laye lapha ngimncedise enze imfanelo andubana udadewenu ethathwa yinjuzi wathathwa yinjuzi kajiki lomuntu ngoba ngibona lonke lithwala izandla ekhanda lihlaba isililo sikaNandi injuzi ibisizonda ibisibulala uNomathemba ngibona uNomathemba ephuma edamu seyisidumbu.
Ngemva kokufa kwakhe ngibona liphoselana inyoka ephilayo yazi ikhona indaba lapha kahle kahle ungaphi uMakhumalo njalo ngubani uMakhumalo ngoba ulesandla lapha hayi kunengi kulemfihlakalo ngifuna uNyathi kanye lo Makhumalo ngike ngikhulume labo ikhona indaba ekhona, watshonaphi unyoko uyakwazi wena ukuthi unyoko uyaphila ungumkhovu lowana olenkani, liyamazi umantindane ongatshelwa okokwenza ngunyoko yazi ulekhanda elomileyo."Kwakukhuluma uGumede wakhuluma kabanzi wayesegebha okulamandla.

Obhalayo ngu S-K indodakazi yosizi eyakoMadabe uSikhangezile Nleya.

IYAQHUBEKA

Sk Indodakazi Yosizi

08/09/2026

05/09/2026

04/09/2026

28/08/2026

27/08/2026

27/08/2026

Address

Website

Alerts

Shortcuts

Share

Category

Listing takedown request