Հայկական գինեգործության բազմադարյա փորձի շարունակողն է հանդիսանում 'Վեդի-Ալկո' ընկերությունը, որն իր կազմում ներառում է երկու խոշոր ձեռնարկություններ. 1938 թ-ին հիմնված Գետափի գինու գործարանը և 1956 թ-ին հիմնված Վեդու գինու գործարանը:
Պահպանելով հայկական գինեգործության ավանդույթները` տարիներ շարունակ մենք ձգտել ենք ստեղծագործաբար զարգացնել դրանք` նոր նրբերանգներ ավելացնելով համերի հարուստ
բույրերին: Այսօր մենք արտադրում ենք ավելի քան 40 անուն ոգելից խմիչքներ` տարատեսակ օղիներ, մրգահատապտղային թունդ ըմպելիքներ, կոնյակներ, անապակ, կիսաանապակ, կիսաքաղցր, կիսաաղանդերային, աղանդերային բարձրորակ գինիներ, որոնք մեծ պահանջարկ են վայելում սպառողների շրջանում:
Մեր ընկերությունը ուշի-ուշով հետևում է համաշխարհային գինեգործության զարգացման տենդենցներին և մշտապես կատարում արտադրական հզորությունների տեխնիկական վերազինում: Դրա մասին են վկայում արտադրության մեջ ներդրված խաղողի վերամշակման և պատրաստի արտադրանքի շշալցման նորագույն սարքավորումներն ու հոսքագծերը:
Մենք երաշխավորում ենք մեր արտադրանքի բարձր որակը: Որակ, որին կարողացել ենք հասնել մեր ընկերության բարձրակարգ մասնագետների համառ աշխատանքի և նոր տեխնոլոգիաների ներդրման շնորհիվ:
Մեր հաջողությունների երաշխիքներից մեկն էլ Վայոց ձորի լեռնային հատվածում և Արարատյան դաշտավայրում մեր իսկ ուժերով հիմնադրված տեղաբնիկ խաղողի սորտերի շուրջ 150 հեկտար տարածքով այգիներն են, որոնք գտնվում են ծովի մակարդակից 800-1300 մետր բարձրության վրա` լեռնոտ հողագոյացություններում:
«Վեդի-Ալկո» ապրանքանիշը ցանկալի անուն է ոչ միայն Հայաստանում, այլև նրա սահմաններից դուրս: Այսօր մեր արտադրանքը հաջողությամբ արտահանվում է Ռուսաստանի Դաշնություն, Ամերիկայի Միացյալ Նահանգներ, Ուկրաինա, Ֆրանսիա, մերձբալթյան երկրներ և այլուր: Միջազգային համտես-մրցույթներում մեր արտադրանքը նվաճել է ավելի քան 90 ոսկե, արծաթե և բրոնզե պարգևներ:
