09/02/2026
ዕድመ ናይ ኣምላኽ ውህብቶ ኢዩ'ሞ፡ ዕድመይ ኣይክሓብኦን እየ። ንእግዚኣብሄር ኣብ ውሻጣን ምድሪ ቤትን፡ ኣብ ገበላን ጥራይ ዘይኮነስ፡ ኣብ ቅድሚ ህዝቢ ዓለም ከመስግኖ! "ደጊም እነሀኻ ራእሲ ወዲ ባሕሪ ነጋሲ" ከም ዝበሃል፡ እግዚኣብሄር ክሳብ 70 ዓመት ብሰላም ኣብጺሑኒ ኢዩ'ሞ፡ ተመስገን!! ካብ ፈንጂ፡ ካብ ጠያይትን ቦባታትን ዘመነ ገድሊ፡ ዕርዲ ኮይኑ ተኸላኺሉለይ። ናብ ናጽነት ኣትየ፡ ብርሃን ርእየን ፍቕሪ ስድራ ቤተይ ኣስተማቒረን እየ'ሞ፡ ተመስገን። ተመርዕየን ወሊደን፡ ኣቦን ኣቦ-ሓጎን ኮይነ እየ'ሞ፡ ተመስገን። ሰራውረይ ከም ገረብ ዋርካ ኣስፋሕፊሑን ጨናፍረይ ኣጉላዕሊዑን ኢዩ'ሞ፡ ብዘለኒ ቃላት ንኣምላኽ ኣመስግኖ ኣለኹ። ኣብ መራኸቢ ብዙሓን ንተኸታተልተይ፡ ብፍላይ ድማ ንኤርትራውያን መንእሰያት ደቀይ ከምዚ ናተይ ዕድመ ጸጋን ይሃብኩም፡ ሰስኑን ሽሕን ዋልታን ኩኑ!! ነቶም ኣብ ዘመነ ገድሊ መጓዕዝተይ ዝነበሩ ጀጋኑ ተጋደልቲ፡ ስለ ህዝቢን ሃገርን ዝተሰውኡ መንግስተ ሰማያት የዋርሶም።
