11/04/2026
Vorstelligsrundi Nr. 13
Zum Abschluss vo üsere Vorstelligsrundi darf ds wichtigste Gsicht hinger Tanners Hoflade nid fähle, d'Andrea Tanner. Ihres ganze Härzbluet steckt i däm Projekt u das gseht u gspürt me auneort. Ds Lädeli hetsi sit dr Betriebsübernahm vo ihrne Eutere langsam aber stetig zumne wichtige Betriebszweig usbout. Ds Produziere vo Läbesmittu hett ihre scho geng Fröid gmacht, sigs dazumau ir Usbiudig zur Miuchtechnologin oder äbe ize bi de eigete Produkt vom Hof. Drnäbe leit si viu Wärt uf Regionalität u so chunnts, dases bi üs mittlerwile äs grosses Sortimänt a Produkt vo befründete Buurefamilie u Produzänte us dr Umgäbig git. Zfridni Chunde si ihre wichtig u si schätzt dr persönlech Kontakt mit ihne sehr, drum isch ds Lädeli bi üs o geng bedient.
Ihri grossi Lideschaft isch z'Bache, si steit gärn am Morge früeh uf u gniesst di Rueh bim Züpfne. D'Mässlatte setzt si höch u si isch säute so würkli zfride - drbi hettsis so richtig im Griff u macht lut viune Chunde eifach di beschti Ankezüpfe!
Äs vergeit ke Tag wo si nid mit so viu Liebi u Fröid aus git für d'Familie, für Tier, füre ganz Hof u für ds Lädeli. Vom Stall, über ds Büro, Planig vom Team u aune Häufer, ds Choche für geng so viu Lüt am Tisch, si bringt viles unger ei Huet. U o wesi hüüfig au Häng vou z'tüe hett, hetsi für aui äs offes Ohr, weiss geng ä Lösig u wes haut mau nid so louft wis sött, isch si di Optimistischi wo i auem z'Guetä gseht.
Ä Usglich fingt si im Stall bi de Tier, u die Zyt laht si sech nid gärn la nä. Bsungers d'Chäubli si ihres Metier, aber o süsch weiss si bestens Bscheid über jedes Tier u si Charakter.
Ir Freizyt isch d'Andrea gärn sportlech ungerwägs. D'Bärge si ihres Liebschte, ob vo wiitem azluege oder säuber drufobe - im Summer z'Fuess u im Winter mit de Ski.
