11/05/2026
حابه أشارككم رايي المتواضع كمربيّة مصرية عاشقة للخيل في مزاد الخيل المصرية اللي أقيم امس 10/05 في نادي القوات المسلحة بمدينة نصر واللي قدمه وأشرف عليه الدكتور حاتم ستين …
١- المزاد ناجح مليون في الميه لانه ببساطة الدكتور حاتم ستين عرف بذكائه وثقافته في الخيل وفن ادارة الخيل انه يخلي المزاد مش مزاد لفوائض المزارع إلى مزاد للخيل الفارهة والفاخرة.. عرف بطريقته يركز على قوة الحصان المصري سواء من حيث الشهادة او البطولات او جمال التراكيب والحركة وكان بيدي كل حصان مشارك حقه في العرض ويلف بيه بنفسه على الناس الموجوده في المزاد.. كأن الحصان حصانه طبعا فيه ناس هتقولي ما هو بيعمل كده علشان مزاده ينجح .. هرد عليك هو فعلا مزاده نجح ويستحق ❤️
٢- ماشاء الله مفيش حصان ما تزيديش عليه كل الخيل اتزايد عليها وده في حد ذاته نجاح مبهر والمزاد جمع الخيل من عمر سنة إلى ١٦ سنة والكل اتحط فيه سعر ماشاء الله بس اللي زعلني بعض اصحاب الخيل المصرية في حاجتين كانوا واضحين جدا 😡😡
-أولهم عدم المرونه في البيع انت شايف حصانك جايب سعر حلو في ظل الظروف الاقتصادية السيئة اللي العالم كله بيمر بيها من حروب وركود اقتصادي وارتفاع اسعار في كل حاجة ده غير كده هيسافر لبره مصر ويمثلك ويمثل مصر في مهرجانات بره فخليك متهاون وبارك مادام عرض حصانك للبيع وده طبعا اللي أشار له الحاج محسن الحابري امس ربنا يديله الصحة 🤍🙏
- ثاني حاجة حصاني جابلي سعر حلو وانا قولت مش هبيع يبقى ما انزلوش تاني تحت اي مسمى لاني هظلمه وهظلم نفسي لانه بالمنطق كده مش هيجيب نفس سعره الاولاني ليه بأه؟؟؟ لان اللي حط سعر فيه في اول مره اكيد شاف حاجة تانية مناسبة لاختياره وزايد عليها فخلاص مش هيزايد عليها تاني.. وهيبدأ حد تاني يدخل مكانه وهيزايد بسعر اقل بكثير لانك كصاحب حصان ظهرت انك عاوز تبيع حصانك بدلالة انك نزلته تاني ويا سلام بأه لو قبلت تبيعه بأقل من القيمة اللي جتلك فيه في اول مرة .. يا جماعة والله منظرنا بيبقى وحش قدام العالم اللي بره .. ده غير ان الحصان لو ما تبعش في المرة الثانية كده خلاص شكرا في لغة السوق كده "حصانك اتشم" .. فلازم تاخدوا بالكم من منظركم وقيمة خيلكم.. والله دي اكثر حاجة زعلتني امبارح في المزاد .. 🙄😢
٣- المزاد كان عبارة عن نوعين من الناس:
- ناس بتزايد ومعظمهم عرب او مصريين بس وكلاء عن أجانب بره مصر
- ومربيين خيل مصريين بيعرضوا خيلهم في المزاد
ملاحظتي هي؛
- الناس اللي كانت بتشتري امبارح طلعوا بنتيجة مهمة للمزادات الجاية انهم لما يزيدوا بعد كده مش هيدخلوا بثقلهم تاني ليه بأه؟؟ لانك كده كده هترفض تبيع في الاول علشان السعر مش عجبك وبعدين هتنزل حصانك تاني وممكن تقبل بسعر اقل لانها آخر فرصة ليك في المزاد .. والله حرام يتاخد عننا الفكرة دي 💔
- فيه مربيين خيل كانوا حاطين سعر سوق لخيلهم بالاتفاق مع لجنة المزاد ورغم ان خيله جابله السعر اللي عاوزه ولكنه رفض البيع .. طيب ده اسمه ايه يا جماعه … 😩😩
لازم كلنا نفكر في بعض كمربيين وصورة اي حد فينا بتأثر على الجميع وبتعطي انطباع عن مربيين الخيل في مصر خصوصا في ايفنت زي كده اقدر اقول عليه Global event .. فكروا في غيركم اللي اكيد هيكونوا عاوزين يشاركوا في المزادات الجاية للدكتور حاتم ستين والمزايدة عليها عمرها ما هتكون زي اللي حصل امبارح .. هتكون بطريقة تانية لان ببساطة “ First impression is the last impression “
وفي الاخر يا جماعة الخيل تخطب ولا تباع مفيش قيمة موحدة للخيل زي الذهب والدولار لانهم اغلى من كده بكثير وربنا يصلح حالنا وحالكم
اللي عاوز يتفرج على المزاد يدخل على اللينك👇🏻
https://www.youtube.com/live/K2upK8_gpg8?feature=shared
٦٠ شو مع الدكتور حاتم ستين
