08/09/2023
- انتي مين
- مش عارفني
- لا معرفكيش
- افتكر
- افتكر ايه؟ انتي مجنونة
- خلاص مش مهم لو افتكرت ابقى عرفني
- احنا نعرف بعض؟
- جايز كنا نعرف بعض او بنتلاقي في عالم الارواح
- ده كلام افلام يعني ...انتي بتشتغليني ..عن اذنك
- والله ما بشتغلك احنا نعرف بعض فعلاً
- منين؟ انا مش فاكرك انتي فيكي شبه غريب من ناس كتير حواليا ودي حاجة غريبة بس فعلاً مش فاكرك
- انك تفتكر اصلاً دي حاجة صعبة لانك هتفتكر حاجة من قرون..بس المدخل انك تفتكرني هو قصة الحب الي كانت بينا
- انتي اكيد مجنونة صح؟
- مفيش بنت جميلة زيي هتكلم واحد متعرفوش وتقوله الكلام ده الا اذا كانت حاجة من الاتنين
- الي هما
-يأما مجنونة يأما صادقة خاصة اذا كانت متجوزة
- كمان متجوزة
- وبحب جوزي جدًا
- لا كده نرجع لاحتمال انك مجنونة او شيزوفيرنيا
- او بتكلم جد وده الي خلى قلبك يدق جامد جدًا دلوقتي
- قلبي مبيدقش
- طب خليني اشوف بنفسي
- شيلي ايدك لو سمحتي الناس هتتفرج علينا
- افتكر
- افتكر ايه؟
- انا مين بالنسبالك ..احنا كنا في زمن تاني مع بعض بس كنا اسياد الارض
- ده جنون في مرحلة خطرة
- انا فعلًا مدركة الي انت فيه ومشفقة عليك بس على الاقل انا موجوده معاك بس انا لما افتكرت مكانش في حد جنبي يواسيني
- تواسيني كمان انا الصراحة زهقت عن اذنك ..
-استنى بس
- نعم
- رقم 11:11 مش بيظهرلك
- نعم؟ انتي مين بالظبط
- قولتلك انا نصك التاني توأم روحك..افتكر
- انتي عرفتي موضوع الرقم ده منين
- سيبك من موضوع الرقم ده هشرحهولك بعدين ..المهم تفتكر وبأقصى سرعة ..عشان لو افتكرت هتعرف تعمل ايه في الي جاي وانت دورك كبير
- هو غالباً انتي لسه شايفة فيلم عن مصاصين الدماء او حاجة زي كده ومتأثرة بيه
- ياريتنا كنا مصاصين دماء كنت على الاقل هتبقى فاكرني
- طب دي كاميرا خافية او مقلب وكده
-افتكر انت مين بص لعينيا وهي مدمعة عشان تفتكرني
- وانتي افتكرتي ازاي بقى فيلم الخيال العلمي ده
- حلم ومش حلم
- الله يخربيت الالغاز
- مش الغاز دي حقايق لازم تجمعها
- انا همشي
- لسه عنيد زي ما انت مهما فاتت القرون
- القرون؟ ده العملية صعبة معاكي قوي عن اذنك
- هي صعبة عليك ياحضرة الظابط
- انتي كمان عارفة شغلي
- ظابط في الجيش المصري خير اجناد الارض
- ومش خايفة
- اخاف من ايه انا المفروض اكون حاسة بالامان انت ظابط في اعظم جيش على وجه الارض جيش الحسين جيش المحروسة ليوم الدين
- الحسين؟
- اه سيدنا الحسين
- طيب
- طيب ايه
- انتي منهم؟
- من مين ؟
- بتوع الاولياء والتبرك بناس زينا زيهم والمشركين
- بس ده مش شرك بالله ..انا بروح ازور الحسين او السيدة نفيسة عشان بحبهم لله في لله والدعاء عندهم ده من قوة طاقة الحب الي عندهم
- ده تبرير للشرك مش اكتر المساجد كلها واحد ومفيش وساطة بين العبد وربه مبالك انسان وميت كمان
- صلي على النبي
- عليه الصلاة والسلام
- مين الي انت صليت عليه ده؟
- ده الرسول عليه افضل الصلاة والسلام
- ده رسول المسلمين صح ؟
- المسلمين هو حضرتك ديانتك ايه بالظبط
- انا كل حاجة بتؤدي للمصدر الدين هو منهج عشان الناس تعرف تعيش مع بعض بالعدل والحب ويعبدوا مصدر واحد
- ما علينا ايه علاقة الرسول عليه الصلاة والسلام بالموضوع
- انت عارف انك لما بتيجي تدعي عشان دعوتك تستجاب يستحسن تصلي على النبي قبل الدعوة وبعدها
- ونعمة بالله ياست الشيخة ..اكيد عارف
- سبحان الله مع ان الرسول بشر وميت هو كمان مش ده تبرك برضو ياسيادة الرائد؟ ولا انت مشرك زيهم
- ده ربنا الي امرنا بكده...وبعدين خلصنا خلاص ..مش ناوية تقولي انتي مين قبل ما امشي
- اسم "ناريا" مش بيفكرك بحاجة؟
- ناريا ..
- كل ده بتفكر بس دي علامة كويسة ..انا بقى الي لازم امشي..
- انتي اسمك ناريا يعني؟
- اخر جسد كان اسمه ناريا لما كنا مع بعض
-اخر جسد ؟
-روح زور سيدنا الحسين واخرج من هناك على الاهرامات وابو الهول ..يمكن تفتكر سيث ..
- "سيث" ؟
- اما تفتكر هتفهم ..دورك كبير قوي المرة دي انا هجيلك لما تفتكر ... بس المره دي دورك متوقف عليه مستقبل كون ..سلام ياسيادة الرائد
1:11
11:11
