02/06/2026
去首爾玩點可以唔食醬油蟹？
基本上首爾熱門嘅醬油蟹我大部分都食過。好似真味食堂、大瓦房確實好食，但必須要提早預訂（真味）或者花時間（1小時左右）排隊。
如果你好似我咁偏向佛系旅行，唔想行程被限死，可以睇吓我食呢間～
至於好多人提過嘅元祖馬山奶奶同弘大新津島，我自己就真心不推，因為全場都係觀光客。
今次想推薦大家去江南附近「韓女士醬蟹」（位於瑞草站，同江南只係兩個站距離）。
幾年前有YouTuber 介紹過所以大排長龍，但依家去已經不用預約，可以舒舒服服咁開餐，最重要係品質依然維持到高水準！
醬油蟹大隻肥美、醬汁濃郁
同大瓦房差唔多嘅價錢，韓女士嘅蟹都一樣好大隻同肥美得多。我覺得佢哋嘅醬汁味道偏向濃郁，但正正因為咁，撈飯食係啱啱好，而且每次去蟹膏都係超多、鮮甜好滿足！
佛系點餐分享：
因為我哋晏啲仲預約咗其他餐廳，原本以為這裡規定最少每人要點一隻蟹，點知原來可以咁配搭：
我哋揀咗一隻醬油蟹 (55,000 won) 同埋一碗蟹膏拌飯 (38,000 won)。
咁樣點餐有幾個好處：
一隻醬油蟹（간장게장）：蟹肉飽滿，直接用手拿著啜，帶埋手套唔怕整污糟手。
蟹膏拌飯（게알비빔밥）：店員已經幫你拆好晒蟹肉同蟹膏，加入蛋黃同海苔碎拌飯。呢碗嘢直情係懶人福音！雖然份量比一隻整蟹少，但撈埋一齊食超惹味。而且價錢平啲，港計返港幣$200。
因為蟹膏好豐富，食多其實會有點膩，一隻蟹加一碗拌飯兩個人分剛剛好，飽肚得嚟又可以留肚食下一餐。另外隨餐附送嘅海帶湯好清甜，飲得出應該是用蟹同蝦一齊熬煮，最驚喜係飲完原來仲可以免費續碗！
如果你去首爾都想舒舒服服、免排隊食到高質素醬油蟹，呢間絕對係彈性行程嘅好選擇。
—————————————
𖠿𖥣 韓女士醬蟹 한여사간장게장
〒 首爾瑞草區瑞草大路46街9 1樓 (서울 서초구 서초대로46길 9)
🚇 瑞草站
