悦和醬園 Yuet Wo 1945

04/10/2026

造豉油既方法好多，但唔係總總都可以將味道提升到極緻。而天然生曬就係一種經千年認證既好方法，係豉油佬既角度真係幾咁天花龍鳳既科技都比唔上呀。

係天然生曬既過程中有好多不同引發鮮味既化學作用出現，除左有蛋白質不斷被分解成氨基酸，仲有不斷因為日曬而產生既梅鈉反應，為豉油添上陣陣既焦香味，呢d都係大自然提供比我地，無可取替既美味因子❤️

#悦和醬園

30/09/2026

喂！講起悦和，你淨係諗到豉油、甜醋、酒？
啊叔今日同你介紹一款你可能唔知嘅 隱藏產品 — 悦和 #自家製鹹柑桔 😎

我哋嘅鹹柑桔係自家醃製，用傳統方法，嚴選靚柑桔🍊，加上悦和老師傅多年嘅經驗，再經過長時間陳釀而成。鹹柑桔嘅製作過程非常講究（如果你自己整過你一定明我講咩）：首先要揀冇破損嘅桔，再用剪刀剪蒂（唔可以用手搣，否則桔肉外露會發霉），然後等清洗後風乾，再用粗鹽一層桔一層鹽咁醃製。悦和嘅老師傅做呢啲工序做到熟晒手，經驗就係品質嘅保證啦～😌

鹹柑桔最大嘅功效就係化痰、舒緩喉嚨痛同聲音沙啞嘅情況。嚟緊就快入秋，轉冬啦，有冇發現天氣開始慢慢慢慢咁轉涼呢？呢到時候如果咳咳聲，信我，沖一杯熱鹹柑桔，即刻舒服晒！

啊叔溫馨提示： 胃酸過多嘅朋友唔好空腹飲‼️因為柑桔嘅果酸有機會刺激胃壁黏膜。

🛒 邊度買？
悦和鹹柑桔，喺荃灣街市街33號悦和門市有得賣。
得閒經過荃灣，入去行吓，仲有其他傳統醬料等緊你😎～

啊叔再次溫馨提示：鹹柑桔越浸越靚，越陳越香，買返屋企擺喺陰涼處，想飲嗰陣攞一粒出嚟沖水，即時舒緩喉嚨不適，正！

28/09/2026

六十幾年前，我哋悦和廠房由荃灣搬到嚟古洞。呢間廠絕對唔係件死物，因為咁多年嚟，我哋一直做唔同改動，喺呢到做唔同新產品俾大家。呢到紀錄住既，係每一代人嘅堅持，每一滴醬油嘅釀製，都係時間同心機嘅累積。

事過境遷，四周嘅村落已經遷走同埋拆卸，變成一棟棟高樓大廈，亦係未來嘅古洞新市鎮。附近嘅醬園都陸續搬緊，得返我哋喺呢到掙扎緊。

嚟緊我哋會有一系列嘅片，帶大家睇下我哋古洞嘅廠房，紀錄悦和喺古洞嘅足跡。大家記得繼續follow咗我哋呢個page啦～

25/09/2026

21/09/2026

豉油醱酵好與壞
全靠師傅的愛心與關懷❤️

講到醱酵豉油，當然就唔少得呢班老黴，即係我地至關重要既米麴菌，唔好聽到菌就以為佢係衰嘢，天下細菌何其多，都唔係種種都係衰人黎既，但係衰親果啲都係特衰，特別衰。而麴菌就好似益力多啲朋友咁，係好嘢黎既！

其實麴菌係好多食品加工行業都會用到，比較多聽到嘅係紅麴，而豉油界既麴菌主要用途就係用黎幫手分解果d人類吸收唔到既蛋白質，將佢拆散為更細粒既氨基酸，咁我地食完就吸收到唔會晒左d營養啦❤️

#悦和醬園 #米麴菌

17/09/2026

喂！秋天就到🍂🍁，又到咗一年一度「食蟹🦀」嘅季節啦！咁究竟食大閘蟹，應該要點咩醋呢？
今日就同你介紹一款悦和專為食蟹而設嘅 #薑蓉蟹醋，等你今年食蟹食得更滋味！😎

悦和呢支薑蓉蟹醋，唔係普通白醋加薑碎咁簡單。佢用悦和自家釀造嘅靚醋做底，再加入驅寒老薑，而且 #啲薑浸足一年先出廠 。醋酸同薑嘅辛辣完美融合，甜酸適宜，配以鮮薑煮成，食蟹嘅時候就可以幫你驅散寒意～你知啦，蟹係寒涼嘅嘢，食得多個胃會「聚住聚住」，我哋薑蓉蟹醋入面嘅老薑，就係用嚟驅走呢種感覺，等你食多幾隻都唔怕😌

最經典食法一定係配 #清蒸大閘蟹，當你一剝開蟹蓋，加幾滴我哋嘅薑蓉蟹醋，蟹黃嘅香味會即刻被提升，蟹肉嘅鮮甜味都會更加突出㗎💯！

除咗食蟹，薑蓉蟹醋仲有其他玩法😌，例如有客人試過話「點小籠包都好好味」（豉油佬試過將一茶匙蟹醋同可樂溝埋飲，即刻有「薑啤」嘅感覺；溝雪碧都得！）

我哋嘅薑蓉蟹醋用嘅係自家釀造靚醋，唔係化學合成嘅「假酸」，味道有層次，同一般嘅工業醋完全係兩個世界嘅嘢！嚟緊食蟹配呢支，包你食得開心又放心😎

啊叔溫馨提示：
每年一到食蟹季節，呢支薑蓉蟹醋就勁多人搶！試過賣到斷晒市... 如果嚟緊你見到有貨就買定先啦～唔好等到想食蟹嗰陣先嚟撲空😂

12/09/2026

薑醋雖好，都要熱力扶持

悦和豬腳薑係好食你知我知單眼佬都知，但係如果凍食就真係搞唔掂 😭

喂！鍾意食豬腳薑嘅朋友，你哋有冇試過就咁打開我哋個盒 #即食豬腳薑 就隊？
啊叔間唔時都聽到客人反映話：「買咗盒豬腳薑諗住lunch食，點知公司冇微波爐冇蒸爐，焗住就咁常溫，有時直頭係凍食⋯⋯」

喂！凍食仲嘥過大嘥鬼！ 😭 豬腳薑，記得記得記得！一定要整返熱先食！

你諗吓，一煲靚嘅豬腳薑，啲薑、豬腳、雞蛋喺甜醋入面浸咗咁耐，所有味道都係「鎖住」㗎。

如果係常溫食，甚至係凍食，一來多少會有d油脂係表面凝結，賣相大打折扣！二來豬腳啲膠質凝結晒，口感硬梆梆，咬落去好似食緊橡筋咁... 三來甜醋嘅香氣出唔到嚟，薑味都弱咗一半，成件事得個「酸」字，你覺得佢好食既機會係"零" 呀😟。

翻熱之後薑醋嘅香氣先會重新被激發出嚟！酸酸甜甜嘅香氣喺空氣中飄散，講真，包保你未食都已經流晒口水，仲未計啲豬腳嘅膠質溶返出嚟，入口即溶嘅感覺；薑嘅辛辣味都更加出，驅寒效果加倍；雞蛋索晒啲醋汁，熱辣辣食先係最正‼️🔥

簡單講：凍食=不如唔好食，翻熱=lam碟底！你點揀先？

🎁 想食最正嘅豬腳薑？
我哋悦和有即食豬腳薑禮盒，一人份、六人份、十二人份都有，開袋翻熱即食😎

記得：一定要整返熱！熱食真係先食到個陣滋味！

11/09/2026

唯獨你一個豉不可給取替
豉我生命裡的一切

豉油佬想要既好簡單，係好多人爭緊做第一既時候，我只係想悦和支豉油係你屋企既唯一❤️

咁岩今日做訪問被問到，你希望個品牌仲可以帶出咩訊息？係老生常談既香港製造定仲有無其他？其實每一樣都好重要，好似我地d產品同生意都係環環相扣，最近幾年睇得最多既係某某老字號結業，然後大家先醒起去幫襯下，但係往往到果刻已經太遲。香港仲有一班人好努力係度堅守緊既香港製造，係資本家眼中可能係好蠢好無謂既一件事，但係呢個地方勝在仲有呢班痴線佬😌我地守住既係一個由上幾代人一路傅承落黎既金漆招牌，係一個個屬於呢個地方既故事❤️唔好比佢停，唔好到失去先黎後悔

09/09/2026

喂，你買豉油嗰陣，有冇諗過一個問題：你手上呢支豉油，到底係邊一批、邊一缸、邊一日釀出嚟㗎？😮

講真，今時今日做食品生產，除咗講求好食外，更重要一定係 #品質追溯😎。你諗吓，一缸豉油由黃豆開始，經過煮豆、落麵粉、入黃房發酵、落缸生曬最少6個月、到最後入樽出貨。中間涉及幾多工序、幾多個人手、幾多個日子？如果冇記錄、冇追溯，萬一有咩問題，點樣搵返源頭？

悦和嘅做法係：每一批產品都有 #完整生產記錄，由原材料採購、生產過程、到出廠檢驗，全部有文件跟身✅。

咁「出世紙」寫咗啲咩？又點解對消費者咁重要😳？
首先我哋悦和每一批豉油出廠之前都要經過嚴格檢測，包括密度測試、胺基酸含量、鹽度檢測、顏色、氣味測試等，確保每一批嘅品質一致。檢測合格之後，會有一張 #出廠檢驗合格證。呢張就係豉油嘅「出世紙」😎

以前呢啲嘢全部靠人手記錄，但而家悦和十幾年前開始就通過哂「 ISO 9001國際品質管理系統」同擁有「HACCP食品安全監控標準」認證😌。即係話，由原材料採購、生產過程、到成品出貨，全部有系統化管理。邊一批黃豆、邊一日入缸、邊一個師傅負責，全部有紀錄，萬一有事可以即刻追溯返源頭～等大家食得安心放心！

05/09/2026

芫抽是這樣鍊成的