28/12/2025
یکم جنوری سے اسلام آباد میں بغیر ایم ٹیگ گاڑیوں کا داخلہ ممنوع
وفاقی دارالحکومت اسلام آباد میں یکم جنوری سے بغیر ایم ٹیگ گاڑیوں کے داخلے پر پابندی عائد کرنے کا فیصلہ کر لیا گیا ہے۔ ڈپٹی کمشنر اسلام آباد عرفان میمن کے مطابق یہ اقدام وزیر داخلہ محسن نقوی کی ہدایات پر کیا جا رہا ہے، جبکہ بغیر ایم ٹیگ گاڑیوں کے خلاف باقاعدہ کارروائی عمل میں لائی جائے گی۔
ڈی سی اسلام آباد نے بتایا کہ شہریوں کی سہولت کیلئے ایم ٹیگ کے اجرا کے لیے شہر کے مختلف علاقوں میں 16 پوائنٹس قائم کیے گئے ہیں۔ 14 نومبر سے اب تک تقریباً ایک لاکھ گاڑیوں کو ایم ٹیگ جاری کیے جا چکے ہیں۔
عرفان میمن کے مطابق بغیر ایم ٹیگ گاڑیوں کی نشاندہی جدید ٹیگ ریڈرز کی مدد سے کی جائے گی، جو شہر کے مختلف انٹری پوائنٹس اور ناکہ جات پر نصب کر دیے گئے ہیں۔
انتظامیہ کے مطابق یکم جنوری سے یہ ٹیگ ریڈرز مکمل طور پر فعال ہو جائیں گے، جس کے بعد بغیر ایم ٹیگ گاڑیوں کے خلاف سخت کارروائی کی جائے گی۔
