22/05/2025
بعد ٣ سنين من الشغل والتعب والحلم، منعلن اليوم إنو محلنا سكّر.
كان هذا المحل حلمًا بدأناه بإيمان بالله، وتعبنا عليه بكل قوتنا. سعينا بكل جهدنا، ووثقنا أن الرزق من عند الله، والحمد لله على كل حال. لكن في بعض الأحيان، تأتي الأقدار بما لا نشاء، ويبقى على الإنسان أن يقبل مشيئة الله
ما كان القرار سهل، وما أخدناه بيوم وليلة… مرقنا بكتير محاولات، ووقفنا على رجلينا رغم كل الظروف، بس وصلت المرحلة اللي صارت الكلمة أصعب من التحمل.
٣ سنين حاولنا نعيش الحلم، نفرح بأي كلمة حلوة من زبون، ونرضى بالقليل، ونآمن إنه الجاي أحسن. بس الحقيقة؟ أحياناً الدنيا بتخذلك، حتى لو عملت اللي عليك وزيادة.
المحل كان مكان صغير، بس كان عالمنا… شاف تعبنا، ضحكتنا ، وحتى لحظات اليأس اللي خبّيناها عن الناس. اليوم بنسكر بابه، وبنتركه ورا ظهرنا، بس جزء من قلبنا رح يضل فيه.
يمكن خسرنا مشروع، بس ما خسرنا الناس الطيبة اللي عرفناها، ولا الذكريات اللي عمرها ما رح تُنسى.
شكراً من القلب… لكل حدا دعانا بالخير، اشترى منّا، ساندنا بكلمة، أو مرّ وسأل كيف أمورنا.
دعواتكم معنا، وإن شاء الله منلتقي بمكان جديد، ببداية أحسن، وقلب أقوى.
