23/07/2023
6-6 ਫੁੱਟ ਡੂੰਘੇ ਪਾਣੀ ਚ ਡੁੱਬੀ ਆਲੀਸ਼ਾਨ ਕੋਠੀ ਦੇ ਮਾਲਕ ਨੂੰ ਸੇਵਾਦਾਰਾਂ ਨੇ ਆਵਾਜ਼ ਦਿੱਤੀ, "ਬਾਬਾ ਜੀ ਰਾਸ਼ਨ ਲੈ ਲਓ ਸੇਵਾ ਆਈ ਹੈ। " ਕੋਠੇ ਦੀ ਛੱਤ ਤੋਂ ਹੀ ਦੁੱਧ ਚਿੱਟੀ ਦਾਹੜੀ ਵਾਲੇ ਬਜ਼ੁਰਗ ਨੇ ਦੋਵੇਂ ਹੱਥ ਜੋੜਕੇ ਜਬਾਬ ਦਿੱਤਾ," ਪੁੱਤਰੋ! ਧੰਨਵਾਦ ਤੁਸੀ ਆਏ, ਪਰ ਸਾਡੇ ਤਾਂ ਅਜੇ ਰਾਸ਼ਨ ਹੈ, ਪਿੰਡ ਚ ਨੁਕਸਾਨ ਬਹੁਤ ਹੋਇਆ ਹੈ, ਜਰੂਰਤ ਮੰਦਾਂ ਚ ਵੰਡ ਦਿਓ"।
ਥੋੜਾ ਅੱਗੇ ਗਏ ਤਾਂ ਘਰਾਂ ਦੀ ਹਾਲਤ ਲੋਕਾਂ ਦੀ ਗਰੀਬੀ ਨੂੰ ਆਪ ਮੁਹਾਰੇ ਹੀ ਬਿਆਨ ਕਰ ਰਹੀ ਸੀ। ਸੋਚਿਆ ਗਰੀਬ ਲੋਕ ਨੇ ਇਹ ਤਾਂ ਰਾਸ਼ਨ ਲੈ ਹੀ ਲੈਣਗੇ। ਨਾਲੇ ਸੁੱਕਾ ਰਾਸ਼ਨ ਕਿਹੜਾ ਖਰਾਬ ਹੋਣਾ ਏ, ਬਾਅਦ ਚ ਵੀ ਕੰਮ ਆ ਸਕਦਾ ਏ।
ਇਕ ਬਜ਼ੁਰਗ ਨੂੰ ਰਾਸ਼ਨ ਲੈਣਾ ਲਈ ਆਵਾਜ਼ ਦਿੱਤੀ। ਕਹਿਣ ਲਗਾ, " ਵੀਰੋ ਰੱਬ ਦੇ ਰੰਗ ਨੇ, ਦੋ ਦਿਨ ਹੋ ਗਏ, ਨਾ ਚੁਲਾ ਲੱਭਦਾ ਏ ਨਾ ਭਾਂਡੇ। ਪੱਕਾ ਪਕਾਇਆ ਲੰਗਰ ਗੁਰਦਵਾਰਾ ਸਾਹਿਬ ਤੋਂ ਆ ਰਿਹਾ ਹੈ। ਰਾਸ਼ਨ ਦੀ ਲੋੜ ਗੁਰਦਵਾਰੇ ਸਾਹਿਬ ਹੋਵੇਗੀ, ਓਥੇ ਦੇ ਦਿਓ।"
ਫਿਰ ਜਦੋਂ ਅਗਲੇ ਪਿੰਡ ਗਏ ਤਾਂ ਇੱਕ ਘਰ ਚ ਲੰਗਰ ਦੇਣ ਲੱਗੇ ਬੀਬੀਆਂ ਨੇ ਹੱਥ ਜੋੜ ਸ਼ੁਕਰਾਨਾ ਕਹਿੰਦਿਆ ਲੰਗਰ ਲੈਣੋਂ ਮਨਾ ਕੀਤਾ, ਜਦੋਂ ਅਸੀਂ ਬੀਬੀਆਂ ਨੂੰ ਘਰ ਦੇ ਬੰਦਿਆ ਵਾਰੇ ਪੁੱਛਿਆ ਕਿ ਮਾਤਾ ਕਹਿੰਦੀ ਪੁੱਤਰੋ ਓਹ ਤਾਂ ਅਗਲੇ ਪਿੰਡ ਚ ਲੰਗਰ ਵਰਤਾਉਣ ਗਏ ਨੇ।
ਇਸ ਧਰਤੀ ਦੇ ਲੋਕਾਂ ਦੇ ਸਬਰ ਤੇ ਸਿਦਕ ਬਾਰੇ ਮੈਂ ਬਹੁਤ ਪੜ੍ਹਿਆ ਸੁਣਿਆ ਸੀ, ਪਰ ਅੱਜ ਗਲ ਗਲ ਪਾਣੀ ਚ ਖਲੋਕੇ ਦੁੱਖਾਂ ਨਾਲ ਝੂਜਦੇ ਇਹਨਾ ਲੋਕਾਂ ਦੇ ਸਬਰ ਨੂੰ ਵੇਖਕੇ ਮੈਂ ਸੋਚ ਰਿਹਾ ਸਾਂ," ਮੇਰਾ ਪੰਜਾਬ ਹੜ੍ਹ ਤਾਂ ਗਿਆ ਹੈ ਪਰ ਅਜੇ ਡੁੱਬਿਆ ਨਹੀਂ।"
ਬਾਬੇ ਨਾਨਕ ਦਾ ਪੰਜਾਬ, ਗੁਰੂਆਂ ਪੀਰਾਂ ਦਾ ਪੰਜਾਬ
- ਕੁੰਵਰ ਸਿੱਧੂ ਪੱਲ੍ਹਾ ਮੇਘਾ
