04/09/2026
"വൈഷ്ണവജനതോ" എന്ന കീർത്തനം ഒരു നല്ല മനുഷ്യൻ്റെ അല്ലെങ്കിൽ ഭഗവാൻ്റെ യഥാർത്ഥ ഭക്തൻ്റെ ഗുണങ്ങളെക്കുറിച്ചാണ് പറയുന്നത്. മറ്റുള്ളവരുടെ വേദന മനസ്സിലാക്കി സഹായിക്കുകയും, എന്നാൽ അഹങ്കാരം മനസ്സിലേക്ക് വരാതിരിക്കുകയും ചെയ്യുന്നവരാണ് അവർ. എല്ലാവരെയും ബഹുമാനിക്കുന്ന, കള്ളം പറയാത്ത, ആഗ്രഹങ്ങളിൽ നിന്ന് വിട്ടുനിൽക്കുന്ന ഒരാളാണ് യഥാർത്ഥ വൈഷ്ണവൻ എന്നാണ് ഈ കീർത്തനം പറയുന്നത്.
പതിനഞ്ചാം നൂറ്റാണ്ടിൽ ഭക്ത കവി നരസിംഹ് മേത്ത എഴുതിയ ഗുജറാത്തി കീർത്തനമാണ് വൈഷ്ണവ ജൻ തൊ. ഗുജറാത്തിയിൽ 'പ്രഭാതിയു' എന്ന് വിളിക്കുന്ന ഇത്തരം ഭജനകൾ പ്രഭാതത്തിലാണ് സാധാരണയായി ആലപിക്കാറ്. മത വിശ്വാസങ്ങൾക്ക് അതീതമായ സാർവ്വജനികതയും 'എങ്ങനെ നല്ല മനുഷ്യനാകാം' എന്നതിൻ അടിസ്ഥാന പ്രമാണങ്ങളും നൽകുന്നതിനാലാകാം മഹാത്മാ ഗാന്ധിയ്ക്ക് ഏറ്റവും പ്രിയമുള്ള ഭജനയായിരുന്നു ഇത്.
