11/09/2026
ക്ഷീരകർഷകർക്കും നവസംരംഭകർക്കും സ്മാർട്ട് ഡയറി ഫാർമിങ് ത്രിദിനപരിശീലന പരിപാടി.
കേരള വെറ്ററിനറി ആൻഡ് അനിമൽ സയൻസസ് യൂണിവേഴ്സിറ്റിയുടെ മണ്ണുത്തി ക്യാമ്പസിൽ വച്ച് യൂണിവേഴ്സിറ്റി ലൈവ്സ്റ്റോക്ക് ഫാം & ഫോഡർ റിസേർച്ച് ആൻഡ് ഡെവലപ്മെന്റ് സ്കീം, ക്ഷീരകർഷകർക്കും സംരംഭകർക്കുമായി *2026 സെപ്റ്റംബർ 15, 16, 17* തീയതികളിൽ
പരിശീലന പരിപാടികൾ സംഘടിപ്പിക്കുന്നു.
കാലിവളർത്തൽ, ശാസ്ത്രീയവും ലാഭകരവും സുസ്ഥിരവുമായ സംരംഭമാക്കി മാറ്റുക എന്ന ലക്ഷ്യത്തോടെ, ക്ഷീരകർഷകരുടെയും സംരംഭകരുടെയും നിലവിലെ പ്രായോഗിക ആവശ്യങ്ങൾ മുൻനിർത്തിയാണ് പരിപാടി ആസൂത്രണം ചെയ്തിരിക്കുന്നത്.
കേരളത്തിലെ ക്ഷീരകർഷകർ നേരിടുന്ന പ്രധാന വെല്ലുവിളികളായ ഉയർന്ന തീറ്റച്ചെലവ്, കന്നുകാലികളുടെ ആരോഗ്യപ്രശ്നങ്ങൾ, കുറഞ്ഞ പാൽ ഉൽപ്പാദനം, പാൽ ഗുണനിലവാരത്തിലെ കുറവ്, പ്രജനനത്തിലെ അപാകതകൾ, ഫാം മാലിന്യസംസ്കരണ പ്രശ്നങ്ങൾ എന്നിവയെ ശാസ്ത്രീയമായി നേരിടുന്നതിനും ഫാമിന്റെ മൊത്തത്തിലുള്ള കാര്യക്ഷമത മെച്ചപ്പെടുത്തുന്നതിനും പരിശീലനം സഹായകരമാകും.
കാലിവളർത്തൽ:
സംരംഭകത്വ സാധ്യതകൾ, കന്നുകാലികൾക്കുള്ള ശാസ്ത്രീയ തീറ്റക്രമവും പരിപാലനവും, ശുദ്ധമായ പാൽ ഉൽപ്പാദനത്തിന്റെ പ്രായോഗിക വശങ്ങളും ആധുനിക കറവരീതികളും, പ്രജനനവും പ്രത്യുൽപ്പാദന പരിപാലനവും, തീറ്റപ്പുൽ കൃഷിയും സംരക്ഷണവും, രോഗപ്രതിരോധം- പ്രഥമശുശ്രൂഷയും ജൈവസുരക്ഷയും, പരിസ്ഥിതി സൗഹൃദ മാലിന്യ സംസ്കരണം എന്നിവയാണ് പരിശീലനപരിപാടിയിൽ കൈകാര്യം ചെയ്യുന്ന പ്രധാന വിഷയങ്ങൾ.
3 പ്രവൃത്തി ദിവസം നീളുന്ന പരിശീലനത്തിൽ 20 പേർക്കാണ് പ്രവേശനം, പ്രായപരിധിയില്ല. താമസം, ഭക്ഷണം എന്നിവ ഉൾപ്പടെ 3000 രൂപയാണ് ഒരാൾക്ക് പരിശീലന ചിലവ്. അപേക്ഷിക്കാനുള്ള അവസാന തീയതി സെപ്റ്റംബർ 14.
താല്പര്യമുള്ളവർ താഴെ കൊടുത്തിരിക്കുന്ന ഫോൺ നമ്പറിൽ ബന്ധപെടുക
(Dr. സീന T.X: 9495539063, Dr. വിദ്യ V.K.9633888658, [email protected])
