27/04/2026
ദ്രവരൂപത്തിലെ ടോണിക്
(Liquid Organic Fertilizer):
****************************
പലതരം ദ്രാവക രൂപത്തിലുള്ള ജൈവവളങ്ങൾ ലഭ്യമാണെങ്കിലും, അവയെല്ലാം ഒരേപോലെയല്ല. അവയുടെ ഉത്പാദനരീതി, ഘടന, ഉപയോഗം എന്നിവയിൽ കാര്യമായ വ്യത്യാസങ്ങളുണ്ട്.
ഇവയെ പ്രധാനമായും രണ്ട് വിഭാഗങ്ങളായി തിരിക്കാം:
വീട്ടിൽ ഉണ്ടാക്കാവുന്നവ:
****************************
ജീവാമൃതം, ഫിഷ് അമിനോ ആസിഡ്, എഗ്ഗ് അമിനോ ആസിഡ്, വെർമിവാഷ് എന്നിവ ഈ വിഭാഗത്തിൽപ്പെടുന്നു. ഇവയുടെ പ്രധാന പ്രത്യേകത, കർഷകർക്ക് സ്വന്തമായി, വളരെ കുറഞ്ഞ ചെലവിൽ ലഭ്യമായ വസ്തുക്കൾ ഉപയോഗിച്ച് ഇവ തയ്യാറാക്കാൻ സാധിക്കും എന്നതാണ്.
വാണിജ്യ ഉൽപ്പന്നങ്ങൾ:
**************************
ഹ്യൂമിക് ആസിഡ്, ഫുൾവിക് ആസിഡ്, സീവീഡ് എക്സ്ട്രാക്റ്റ്, ബയോ എൻപികെ തുടങ്ങിയവ ഈ വിഭാഗത്തിൽ വരുന്നു. ഇവയെ വ്യാവസായികാടിസ്ഥാനത്തിൽ, സങ്കീർണ്ണമായ പ്രക്രിയകളിലൂടെയാണ് നിർമ്മിക്കുന്നത്. അതുകൊണ്ട് തന്നെ ഇവ വിപണിയിൽ നിന്ന് വാങ്ങേണ്ടിവരും.
ഹ്യൂമിക് ആസിഡ് (Humic Acid):
**********************************
മണ്ണിലെ ജൈവവസ്തുക്കൾ വിഘടിച്ച് ഉണ്ടാകുന്ന ഒരു പ്രകൃതിദത്ത സംയുക്തമാണ് ഹ്യൂമിക് ആസിഡ്. ഇത് ചെടികളുടെ വളർച്ചയെ ത്വരിതപ്പെടുത്തുകയും ഇത് മണ്ണിലെ സൂക്ഷ്മാണുക്കളുടെ പ്രവർത്തനം വർദ്ധിപ്പിക്കാനും, ചെടികൾക്ക് പോഷകങ്ങൾ എളുപ്പത്തിൽ വലിച്ചെടുക്കാനും സഹായിക്കുന്നു. കൂടാതെ, മണ്ണിന്റെ ഘടന മെച്ചപ്പെടുത്താനും, ജലാംശം നിലനിർത്താനും ഇത് ഉപകരിക്കുന്നു.
ഒരു ലിറ്റർ വെള്ളത്തിൽ 1-2 മില്ലിലിറ്റർ (ദ്രാവകരൂപത്തിൽ) അല്ലെങ്കിൽ 2-5 ഗ്രാം (പൊടി രൂപത്തിൽ) ഹ്യൂമിക് ആസിഡ് ചേർത്ത് നേർപ്പിച്ച് ചെടിയുടെ ചുവട്ടിൽ ഉപയോഗിക്കാം. ഇലകളിൽ തളിക്കുന്നതിന് ഒരു ലിറ്റർ വെള്ളത്തിൽ 2-3 മില്ലിലിറ്റർ (ദ്രാവകരൂപത്തിൽ) അല്ലെങ്കിൽ 0.5-1 ഗ്രാം (പൊടി രൂപത്തിൽ) ഹ്യൂമിക് ആസിഡ് ചേർത്ത് നേർപ്പിച്ച ലായനി ഉപയോഗിക്കാം. രാവിലെ അല്ലെങ്കിൽ വൈകുന്നേരം വെയിൽ ഇല്ലാത്ത സമയങ്ങളിൽ ഇലകളിൽ തളിക്കുന്നത് ഉചിതമാണ്.
ഫുൾവിക് ആസിഡ് (Fulvic Acid):
***********************************
ഹ്യൂമിക് ആസിഡിന്റെ ഒരു ഭാഗമാണ് ഫുൾവിക് ആസിഡ്. ഹ്യൂമിക് ആസിഡിനേക്കാൾ ചെറിയ തന്മാത്രകളാണ് ഇതിലുള്ളത്. ഇത് ചെടികൾക്ക് പോഷകങ്ങൾ വലിച്ചെടുക്കാൻ വളരെ എളുപ്പമാണ്. മണ്ണിലെ മറ്റ് പോഷകങ്ങളുമായി ഇത് ചേരുമ്പോൾ അവയെ ചെടികൾക്ക് എളുപ്പത്തിൽ ലഭ്യമാക്കുന്നു.
ഒരു ലിറ്റർ വെള്ളത്തിൽ 5-6 ഗ്രാം എന്ന അളവിൽ കലക്കി ചെടികളുടെ ചുവട്ടിൽ ഒഴിക്കാൻ ഉപയോഗിക്കാം. ചെടികളുടെ ഇലകളിൽ തളിക്കുന്നതിന്, 10-20 മില്ലിഗ്രാം ഒരു ലിറ്റർ വെള്ളത്തിൽ എന്ന അളവിൽ നേർപ്പിച്ചു തളിക്കുക. രാവിലെ അല്ലെങ്കിൽ വൈകുന്നേരങ്ങളിൽ മാത്രം തളിക്കാൻ ശ്രമിക്കുക. വെയിലുള്ള സമയങ്ങളിൽ തളിക്കുന്നത് ഇലകൾക്ക് ദോഷകരമാവാം.
സീവീഡ് എക്സ്ട്രാക്റ്റ് (Seaweed Extract):
********************************************
കടൽച്ചെടികളിൽ (seaweed) നിന്ന് വേർതിരിച്ചെടുക്കുന്നതാണ് സീവീഡ് എക്സ്ട്രാക്റ്റ്. ഇതിൽ ചെടികളുടെ വളർച്ചയെ ത്വരിതപ്പെടുത്തുന്ന ഹോർമോണുകൾ, വിറ്റാമിനുകൾ, അമിനോ ആസിഡുകൾ, ധാതുക്കൾ എന്നിവ ധാരാളമായി അടങ്ങിയിരിക്കുന്നു. ഇത് ചെടികളുടെ വേരുപടലം വികസിപ്പിക്കാനും, പൂവിടാനും, കായ്കൾ ഉണ്ടാകാനു, രോഗപ്രതിരോധശേഷി വർദ്ധിപ്പിക്കാനും സഹായിക്കും.
1 ലിറ്റർ വെള്ളത്തിൽ 5 ml മുതൽ 10 ml വരെ എന്ന അളവിൽ ചെടിയുടെ ചുവട്ടിൽ ഒഴിച്ചുകൊടുക്കുക. ഇലകളിൽ നേരിട്ട് തളിക്കാനായി 1 ലിറ്റർ വെള്ളത്തിൽ 1.5 ml മുതൽ 3 ml വരെയാണ് ഉപയോഗിക്കുന്നത്. ഓരോ 2 മുതൽ 5 ആഴ്ച കൂടുമ്പോഴും ഇത് ഉപയോഗിക്കുന്നത് ചെടികളുടെ വളർച്ചയ്ക്ക് ഉത്തമമാണ്.
ബയോ എൻപികെ (Bio NPK):
********************************
നൈട്രജൻ, ഫോസ്ഫറസ്, പൊട്ടാസ്യം എന്നിവ സമന്വയിപ്പിച്ചുകൊണ്ടുള്ള ജൈവ ലായനികളും ഇന്ന് ലഭ്യമാണ്. ഇത് വെള്ളത്തിൽ ലയിപ്പിച്ച് നൽകുന്നത് ചെടികൾക്ക് ആവശ്യമായ മൂന്ന് പ്രധാന പോഷകങ്ങൾ ഒരേ സമയം നൽകാൻ സഹായിക്കുന്നു.
ചെടിക്ക് നേരിട്ട് മണ്ണിൽ ഒഴിക്കാൻ: 1 ലിറ്റർ വെള്ളത്തിൽ 10 മുതൽ 20 മില്ലിലിറ്റർ വരെ ബയോ എൻപികെ എന്ന കണക്കിൽ നേർപ്പിച്ച്, ചെടിയുടെ ചുവട്ടിൽ ഒഴിച്ചുകൊടുക്കാവുന്നതാണ്. തൈകൾ നടുന്നതിന് മുൻപ്, അവയുടെ വേരുകൾ 1 ലിറ്റർ വെള്ളത്തിൽ 10 മില്ലിലിറ്റർ ബയോ എൻപികെ കലർത്തിയ ലായനിയിൽ 10-20 മിനിറ്റ് മുക്കിവെക്കുന്നത് വളരെ നല്ലതാണ്. ഇലകളിൽ തളിക്കാൻ 1 ലിറ്റർ വെള്ളത്തിൽ 2 മുതൽ 5 മില്ലിലിറ്റർ വരെ നേർപ്പിച്ച് ഇലകളിൽ തളിക്കാവുന്നതാണ്. 15-20 ദിവസത്തെ ഇടവേളകളിൽ തളിക്കുന്നതാണ് ഉചിതം.
വാണിജ്യ അടിസ്ഥാനത്തിൽ ഉത്പാദിപ്പിക്കുന്ന ഇവയെല്ലാം ദ്രാവക രൂപത്തിലുള്ള ജൈവവളങ്ങളായി ഉപയോഗിക്കാമെങ്കിലും, ഇവയുടെ പ്രവർത്തനരീതി വ്യത്യസ്തമാണ്. പക്ഷെ ഇവ എല്ലാം തന്നെ മണ്ണിന്റെ ഘടനയും ചെടികളുടെ വളർച്ചാ ഹോർമോണുകളും ലക്ഷ്യമിട്ട് പ്രവർത്തിച്ചു ചെടിയുടെ മൊത്തത്തിലുള്ള ആരോഗ്യത്തെ ഉത്തേജിപ്പിക്കുന്നു. അതോടൊപ്പം മണ്ണിലുള്ള പോഷകങ്ങളെ ചെടികൾക്ക് എളുപ്പത്തിൽ വലിച്ചെടുക്കാൻ കഴിയുന്ന രൂപത്തിലാക്കി മാറ്റുന്നു. രാസവളങ്ങൾക്ക് ഒരു മികച്ച പകരക്കാരനായി ഇവയെ ഉപയോഗിക്കുന്നതിലൂടെ മണ്ണിന്റെ ആരോഗ്യം നിലനിർത്താനും, വിളവ് വർദ്ധിപ്പിക്കാനും കർഷകർക്ക് സാധിക്കും…….
