19/07/2025
*ಬಂಜಾರ ಸಾಹಿತ್ಯ ಪರಿಷತ್ತು, ವಿಜಯಪುರ ಜಿಲ್ಲಾ ಘಟಕ🚩🏳️*
ಲಕಣ್ಯಾರ ಮಳಾವೊ ಕವಿಗೋಷ್ಠಿ -11
👉🏻 ದಾಡ್ ದಕಾಣ್ಣಿ: ಜೂನ್ 2025
👉🏼 ದಾಡೋ: ದಿತ್ವಾರ್
👉🏽 ತಾರಿಖ್: 12/07/2025 ರಿಂದ 18/07/2025
👉🏾 ವಿಷಯ:- ಗುರು ಶಿಷ್ಯಾರ್ ಮೋಲ್
🪷🪷🪷🪷🪷🪷🪷🪷🪷🪷
*ಗುರು ಶಿಷ್ಯಾರ ಮೋಲ್* ಬಂಡಾ ಕಜೊ ನಾಮೇರ ದೀ ತಾಂಡಾ ರಚ, ಏಕ್ ಮೋಟೊ ತಾಂಡೊ ಅನ್ ಏಕ್ ನಾಣಕ್ಯಾ ತಾಂಡೊ ರಚ್. ಓ ತಾಂಡೆರ ವಚ್ ಏಕ್ ಸೇವಾಭಾಯಾರೊ ಮಠ ರಚ. ಓ ಮಠ ದೋಯಿ ತಾಂಡೇರ್ ಆಸ್ತಿ ರಚ್. ಮೋಟೊ ತಾಂಡೆರೊ ಸೇಲು ಕಜೊ ಮನಕ್ಯಾ ಮಠಾರ ಭಗತ(ಸಾಧು) ರಚ್. ಘಣೊ ಆಚೊ ರಚ್, ತಾಂಡೂಮ ಜಡ್ ಜಾಪತ, ರೋಗ ರೂಜಿನೆನ ದವಾ ದಚ, ಮೂಡ ನಂಬಿಕೆನ ಹಟಾವಚ,ಗೋರೂರ ಚಾಲ್ ಚಲನೇಪರ ಚಾಲಚ ಚಲಾವಚ. ದೋಯಿ ತಾಂಡೇನ ಭಗವಾನ ಬಣಮಲಚ. ದೋಯಿ ತಾಂಡೆನ ಏಕ್ ಮತರೇತಿ ಚಲಾವಚ ಪಣ ದೋಯಿ ತಾಂಡೆರ ಮೋಟಪನ ಕರೆವಾಳೂರ ಮನಸ್ಸ್ ಠಿಕ್ ರೇನಿ, ಏಕ್ ತಾಂಡೇವಾಳುನ ದೇಕತೊ ಅಜ್ಜೆಕ ತಾಂಡೇವಾಳುನ ಆoಗ್ ಆಯೇನಿ. ಸಾಪ್ ಮುಂಗಲಿನಾಯಿ ಮನಸ್ಥಿತಿ ಬಣಾಮಲಚ. ಕಾಕತೊ ಓ ಮಠಾರ ಆಂಗೆರೊ ಗುರು(ಸೇಲು ಭಗತೇರ ಶಿಷ್ಯ) ಹಮಾರ ಮೋಟೊ ತಾಂಡೆರೊಜ ರೇನು ಹಮಾರ ನಾಣಕ್ಯಾ ತಾಂಡೆರೋಜ ರೇಣು ಕಜೊಜ ದೋಯಿ ತಾಂಡೇರ ಮನಸ್ಸ್ ಅಗಲೆರ ಕಾರಣಜ ಛ. ಮೋಟೊ ತಾಂಡೇರ ರಂಗ ರಂಗಿ ಕನ್ ಪ್ರೇಮಿ ರಚ್, ರಂಗಿ ತಾಂಡೆರ ನಾಯೆಕೆರ ಬೇಟಿ ರಚ್, ರಂಗ ಗರಿಬೇರೊ ಬೇಟಾರಚ. ಈ ರಂಗ್ ನಾಯಕೆರ ಘರೇಮ ಜೀತ್ ರಚ್. ನಾಯೆಕೆರ ಬೇಟಿ ಏರ್ ಆಚೊ ಚಾಲ್ ಚಲನ್ ದೇಕನ ಅನ್ ಏರ್ ಗೀದೆನ ಫಿದಾ ವೇನ ರಂಗೇರ ಪರ ಮನಸ್ಸ್ ಮೇಲನ ಪ್ರೇಮೆರ ಜಾಳೆಮ ಪಟಕಾನಾಕಚ. ಏನೂರ ದೋಯಿರ ಪ್ರೇಮೆರ ಫಲ ಏಕ್ ಬೇಟಾ ವಚ. ಘರೇಮ ಮಾಲಮ ವೇಗಿಕತೊ ದೋಯಿನ ಮಾರನಾಕಚ. ಕಾ ಕತೊ ಮೋಟೊ ಘರಿಯಾಣೆರ ಬೇಟಿ, ಘರೆಮ ಜಿತ್ ಛಜೆರ ಜೋಡಿ ಪ್ರೇಮ ಕಿದಿಚ ಅನ್ ವಾಯಾರ ಬೇಟಾ ಆಂಗ್ ಪೈದಾಕಿದಿ ಚ ಕನ್ ಲೋಕ ಮಾನ್ ಕಾಡನಾಕಚ. ಬಾಪ್ ತಾಂಡೆರೊ ನಾಯಕಚ ಮಾನ್ ಜಾವಚ. ಜೇರ್ ವಾಸು ದೋಯಿನ ಮಾರನಾಕಚ ಕನ್ ಚಮಕನ, ಬೇಟಾನ ನದಿಮ ಏಕ್ ಹಡಗ ಬಣಾನ ಛೋಡನಾಕಚ. ತೆಲ್ತೊ ತೆಲ್ತೊ ನಾಣಕ್ಯಾ ತಾಂಡೆ ಸಾವು ಜಾವಚ. ದಾಡಿ ಛೆಳಿ ಚರಾಯೆನ ಜಾವಜೊ ರತನೆನ ಲಾಬಚ. ವೋನ 5 ವರಸ ಪೊಸಚ. ಲಾರತಿ. ಮಠಾರ ಗುರುಕುಲ ಸಾಲಿಮ ಘಾಲಚ. ದಾಡೇತಿ ದಾಡ ಮೋಟೊ ವೇತೊ ಜಾವಚ. ಶಿಷ್ಯ ವೇನು ಕತೊ ಥಡಸೇಕ ಪರೀಕ್ಷೆಮ ಫಾಸ್ ವೇನು. ಈ ಛೋರಾ ಸೇಜ್ ಪರೀಕ್ಷೆಮ ಫಾಸ್ ವಚ. ತೋಬಿ ಹಮಾರ ತಾಂಡೆರ ಬೇಟಾನ ಜ ಶಿಷ್ಯ ಕರನು, ಹಮಾರ ತಾಂಡೆರ ಬೇಟಾನ ಶಿಷ್ಯ ಕರನು ಕೆನ್ ಲಡಾಯಿ ಮಾರಚ ದೋಯಿ ತಾಂಡೇವಾಳ. ರಂಗ ರಂಗೀರ ದೋಯಿ ಪ್ರೇಮ ದೇಕನ ದೋಯಿರ ವಾಯಾ ಕರಾನಾಕಚ ಪಣ ವಾಯಾರ ಅಂಗ್ ಪೈದಾ ವೇಜೊ ರಾಜ್ ಬೇಟಾರ ವಿಷಯ ಕೇನಿ ಕಳಾಯೆನಿ. ರಂಗ್ ರಂಗಿನ ಕುಣಸಿಕೊ ಏಕ್ ಮಾರಾಮಾರಿ ಜೇಡ್ಡೆಮ ಮರಜಾವಚ. ಮರೆರ ಆಂಗ್ ರಾಜ್ ಛೋರಾರ ಬಾರೇಮ ಕಳಾಜಾವಚ.ರಾಜ್ ಛೋರಾ ಹಮಾರ ಪೇಟೆಮ ಹುಯೋಚ, ವಾಯಾರ ಆಂಗ್ ಹುಯೋನ, ನದಿಮ ಮ ತೆಲಾಯಾಯೆತೆ, ಹನು ಹನು ಗಲತ ಕಾಮ್ ಹಮಾತಿ ವೇಗಿಚ, ಹಮನುನ ಮಾಫಿಕರೊ, ಬೇಟಾನ ಪರದೇಶಿ ಕರನಾಕೆ ಹಮೂನ ಮಾಫಿ ಕರೊ ಕೆನ ಜೀವ ಛೋಡನಾಕಚ. ದೋಯಿ ತಾಂಡೇವಾಳ ಆಶ್ಚರ್ಯ ವೇನ್ ಏಕೆನೆಕ ಮುಂಡೊ ದೇಕುಕರಚ. ಜನ್ನಾ ದೋಯಿ ತಾಂಡೆವಾಳುನ ಭೇಳನ ಏಕ್ ನಿರ್ಧಾರ ಕರಚ ಸೇಲು ಭಗತ. ರಾಜ್ ಛೋರಾ ಮೋಟೊ ತಾಂಡೇಮ ಜಲ್ಮಲಿದೊ ಜೊ ಹಾವ, ನಾನಕ್ಯಾ ತಾಂಡೇಮ ವೋರ ಪಾಲ ಪೋಷಣ ವೆಜೊ ಹಾವ. ತೊ ಮೋಟೊ ತಾಂಡೆರೊ ಬೇಟಾಬಿ ಹಾವ, ನಾನಕ್ಯಾ ತಾಂಡೆರೊ ಬೇಟಾಬೀ ಹಾವ. ಈ ದೋಯಿ ತಾಂಡೆರೊ ಬೇಟಾ ಹಾವ. ಭಗವಾನ ಹನು ಭೇಳೋಚ ದಕಾವಚ, ಗುರುಕುಲೇಮ ಬೀ ಸೇತಿ ಸಾಣೋಚ, ಮಾರೊ ಶಿಷ್ಯ ವೇರ್ ಸೇ ಲಕ್ಷಣ ಬೀ ಛ, ಜೇರವಾಸು, ಈ ಬೇಟಾಜ ಮಾರೊ ಶೀಷ್ಯ ವೇದ ಕನ್. ದೋಯಿ ತಾಂಡೇವಾಳುನ ರಾಜಿ ಕರಾನ, ಈ ಬೇಟಾ ದೋಯಿ ತಾಂಡೆರೊ ಹಾವ. ಕನ್ ಏಕ್ ಮತರೇರ ಝುoಡಿ ಬಂಧಾನ ಸೇಜ್ ಭಾಯಿ ಬಂಧು,ಸಾಗಾಸೆಣೊ ಪ್ರೇಮೇತಿ ಎಕೆನೆಕ ಸಾಥ್ ದೇತೆ ಜೀವಡಾ ಕರನು ಕನ್ ಸಿಕ್ವಾಡಿ ದೇನೊ. ದೋಯಿ ತಾಂಡೇವಾಳ ಹಷಿ ಖುಷಿತಿ ಮಾನ್ಲಿದೆ. ರಾಜ್ ಬೇಟಾನ್ ಶಿಷ್ಯ ಕೇನ್ ಸ್ವಿಕಾರ ಕರನ. ಆಚೊ ವಿಚಾರ, ಆಚೊ ಭಗತ ಬನಾಯೊ. ಆಂಗ್ ಸೇಲು ಗುರುನಾಯಿಜ್ ರಾಜ್ ಶಿಷ್ಯಾಬೀ ದೋಯಿ ತಾಂಡೆನ ಆಚೊ ಶಿಕ್ವಾಡಿ ದಿನೊ, ಮೂಡ ನಂಬಿಕೆ ಹಟಾಯೆ, ರೋಗ ದೂರ ಕೀದೊ, ಈ ದುನಿಯಾಮ ಹಾವಹಾವ ಕೇರಾಯೊ. ದೋಯಿ ತಾಂಡೆನ ಗುರುನಾಯಿ(ಸೇಲು ಭಗತೆನಾಯಿ) ಭಗವಾನ ಬಣೊ. ಗೋರ್ ಧರ್ಮೇರ ವಾಟೇನ ಚಾಲೊ, ಚಲಾಯೊ. ಗುರು ಶಿಷ್ಯಾರ ಮೋಲ್ ಏ ಬಂಡಾ ತಾಂಡೆವುನ ಆರಸಿ ಬಣಿ. ಸೇ ಹಷಿಖುಷಿತಿ ಜೀವಡಾ ಕರರೇ...... 🔶🔶🔶🔶🔶
✍️ *ಸಂತೋಷ ಟಿ ರಾಠೋಡ.* ಕೇರುಟಗಿ ತಾಂಡ ವಿಜಯಪುರ ಜಿಲ್ಲಾ.
