13/05/2026
Nýir eigendur taka við Fincafresh
Kæru vinir.
Eftir tæplega fjögur ár af blóð, svita, tárum og mjög, mjög, mjög mörgum ávöxtum höfum við Bessi og Bor ákveðið að segja staðar numið og afhenda öðrum keflið. Það sem byrjaði sem lítið samfélagsverkefni um að bjóða nágrönnum okkar og nærsveitungum ferska árstíðabundna ávexti hefur hefur heldur betur undið upp á sig og erum við með hundruði vikulega viðskiptavina nær alls staðar af á landinu í dag.
Við erum stoltir af því sem við afrekuðum og bjuggum til. Fincafresh er fallegt samfélag einstaklinga og fyrirtækja sem vilja aðeins það besta.
Á tímamótum sem þessum lítum við glaðir um öxl. Þetta hefur verið í senn krefjandi en einstaklega skemmtilegur – og sérstaklega bragðgóður – tími! En allt tekur senn enda, og okkur hlakkar til að vera nýjum eigendum innan handar næstu vikur og mánuði.
Okkur langar að kynna ykkur fyrir nýjum eigendum Fincafresh. Hjónin Elís Orri og Sigrún tóku við keflinu frá og með síðustu mánaðamótum. Markmið þeirra er einfalt – að gera góða upplifun enn betri. Við höfum mikla trú á þeim og þeirra hugmyndum, þau koma inn af fítonskrafti og við erum spenntir fyrir því sem koma skal. Áfram verður verslað við sömu smábændur og reksturinn breytist því ekki neitt – en reynt verður að bæta upplifun okkar viðskiptavina og fjölga öðrum spennandi valkostum til viðbótar við ávextina.
Við þökkum kærlega fyrir viðskiptin, vináttuna og samfylgdina sl. ár og hlökkum til að styðja við Fincafresh áfram – en núna í nýju hlutverk sem dyggir viðskiptavinir!
Bessi og Bor
