17/04/2026
Nýr drykkur frá ungum frumkvöðlum
Silvía Sigþórsdóttir, Ísak Leó Freysson, Emilía Þóra Ólafsdóttir og Katrín Ósk Sigurðardóttirhafa sett fyrsta íslenska koffínbætta trefjadrykkinn á markað í samstarfi við Ölgerðina Egil Skallagrímsson. Hugmyndin kviknaði í áfanganum frumkvöðlafræði í Verzlunarskóla Íslands.
Silvía, Ísak, Emilía og Katrín kynntu hugmyndina fyrir Ölgerðinni í fyrra, á meðan þau voru ennþá nemar í Verzló. Drykkurinn, sem hlaut nafnið eazy, var framleiddur fyrir vörumessu í Smáralind á vegum JA Iceland. Í kjölfarið var ákveðið að setja eazy á almennan markað og fæst drykkurinn nú í Krónunni.
„Við vildum að drykkurinn yrði eins náttúrulegur og hægt er og þess vegna inniheldur eazy ekki hefðbundna gervisætu en stevíu og hrásykur,“ segir Katrín. „Okkur fannst einnig mikilvægt að drykkurinn hefði fleira sem er gott fyrir þig og þess vegna inniheldur eazy trefjar, D-vítamín og sink.“ Eazy er með jarðarberja- og límónubragði og inniheldur 80 mg af koffíni og 5 g af trefjum auk vítamína.
Silvía, Ísak, Emilía og Katrín sáu um allt ferlið frá nafngift til markaðssetningar og hönnuðu einnig umbúðirnar með hjálp auglýsingastofunnar ENNEMM. „Við erum með mjög sterkar skoðanir á útlitinu og höfum fengið frjálsar hendur til þess að gera þetta eftir okkar höfði sem við teljum að höfði vel til markhópsins sem er ungt fólk,“ segir Ísak.
„Við hvetjum öll til að drífa sig út í Krónuna og næla sér í dós af fyrsta trefjabætta koffíndrykknum á Íslandi!“ segir Silvía. Hún þakkar Krónunni fyrir samstarfið. Emilía bætir við:„Við erum líka ótrúlega þakklát fyrir að Ölgerðin hafi tekið svona vel í hugmyndina okkar og að fá tækifæri til að leyfa neytendum að smakka eazy.“
Guðni Þór Sigurjónsson, yfirmaður viðskiptaþróunar hjá Ölgerðinni, segir það frábært að fá flottar hugmyndir frá ungu og öflugu fólki. „Við leggjum mikið upp úr nýsköpun og það hefur verið virkilega gaman að vinna með eazy teyminu.“
