15/06/2026
នេះជាវិធីធ្វើ សម្លស្ងោរម្រះញាត់សាច់ជ្រូកចិញ្ច្រាំ ឱ្យមានរសជាតិឆ្ងាញ់ មិនសូវល្វីង និងមានទឹកស៊ុបថ្លាឈ្ងុយឆ្ងាញ់
គ្រឿងផ្សំ
ម្រះ៖ ២-៣ ផ្លែ (ជ្រើសរើសផ្លែណាដែលមានពណ៌បៃតងខ្ចី និងមានភ្នែកធំៗ ព្រោះវាមិនសូវល្វីងខ្លាំង)
សាច់ជ្រូក៖ សាច់ជ្រូកចិញ្ច្រាំ (លាយខ្លាញ់បន្តិចដើម្បីកុំឱ្យសាច់ស្ងួត) និងឆ្អឹងជំនីជ្រូក (សម្រាប់រំងាស់ធ្វើទឹកស៊ុប)
គ្រឿងលាយសាច់៖ ស្លឹកខ្ទឹមហាន់ល្អិត, ខ្ទឹមសបុក, ទឹកត្រី, ស្ករស, ម្សៅស៊ុប, និងម្រេចម៉ត់
គ្រឿងផ្សំទឹកស៊ុប៖ អំបិល, ស្ករស, ទឹកត្រី, ម្សៅស៊ុប, ខ្ទឹមស, និងគល់ជីវ៉ាន់ស៊ុយ
គ្រឿងតុបតែង៖ ស្លឹកវ៉ាន់ស៊ុយ និងម្រេចម៉ត់
របៀបធ្វើ
ជំហានទី ១៖
កាត់ម្រះជាកង់ៗ (ប្រវែងប្រហែល ៣-៤ សង់ទីម៉ែត្រ) រួចប្រើស្លាបព្រាខ្វៀលយកគ្រាប់ និងសរសៃពណ៌សខាងក្នុងចេញឱ្យស្អាត។
គន្លឹះកាត់បន្ថយជាតិល្វីង៖ យកម្រះដែលខ្វៀលរួចទៅត្រាំក្នុងទឹកអំបិលប្រហែល ១៥-២០ នាទី រួចលាងទឹកស្អាតចេញ ហើយស្រង់ទុកឱ្យស្រស់ទឹក។
ជំហានទី ២៖ ការលាយសាច់ញាត់
យកសាច់ជ្រូកចិញ្ច្រាំមកលាយជាមួយ ខ្ទឹមសបុក, ស្លឹកខ្ទឹម, ទឹកត្រី, ស្ករស, ម្សៅស៊ុប និងម្រេចម៉ត់។ ច្របល់ចូលគ្នាឱ្យសព្វ និងស្អិតល្អ។
យកសាច់ដែលលាយរួច មកញាត់ចូលក្នុងកង់ម្រះនីមួយៗឱ្យណែនល្អ (កុំឱ្យប៉ោងពេក ព្រោះពេលឆ្អិនសាច់នឹងរីកបន្តិច)។
ជំហានទី ៣៖
ដាំទឹកមួយឆ្នាំង ដាក់ឆ្អឹងជំនីជ្រូក, គល់វ៉ាន់ស៊ុយ និងដំខ្ទឹមសបង់ចូល 2»3កំពិស ដើម្បីរំងាស់យកទឹកស៊ុបផ្អែម។ (ពេលទឹកពុះ ត្រូវដួសពពុះចេញឱ្យអស់ដើម្បីឱ្យទឹកស៊ុបថ្លាល្អ)។
នៅពេលឆ្អឹងជំនីជ្រូកចាប់ផ្តើមផុយ ត្រូវដាក់ម្រះដែលញាត់សាច់រួចចូលទៅក្នុងឆ្នាំង។
គន្លឹះសំខាន់៖ ពេលដាក់ម្រះចូលហើយ ហាមគ្របឆ្នាំង និងប្រើភ្លើងល្មម (មិនត្រូវប្រើភ្លើងខ្លាំងពេកទេ) ព្រោះការគ្របឆ្នាំងនាំឱ្យម្រះប្តូរពណ៌ទៅជាក្រម៉ៅ និងធ្វើឱ្យទឹកស៊ុបមានជាតិល្វីងខ្លាំង។
រំងាស់រហូតដល់ម្រះឆ្អិនផុយល្មមតាមការចូលចិត្ត រួចភ្លក់ និងផ្សំរសជាតិបន្ថែមដោយ អំបិល, ទឹកត្រី, ស្ករស និងម្សៅស៊ុប
ពេលញ៉ាំ ត្រូវដួសសម្លដាក់ចាន រួចរ៉ោយស្លឹកជីវ៉ាន់ស៊ុយ និងម្រេចម៉ត់ពីលើជាការស្រេច
