23/01/2025
මේ දවස්වල වැස්ස නිසා පොලිටනල් වගාකරුවන්ට ඇතිවෙන ගැටලු කිහිපයක් තියෙනවා.
බෝග සෞඛ්යය පවත්වා ගැනීමට, රෝග වළක්වා ගැනීමට සහ ප්රශස්ත වර්ධනය සහතික කිරීමට පොලිටනල් වගාකරුවන් වැසි දිනවලදී විශේෂ සැලකිල්ලක් දැක්විය යුතුයි.
1. වාතාශ්රය කළමනාකරණය
අධික වර්ෂාව පවතින කාලවලදී වගා ගෘහය තුළ දිලීර සහ බැක්ටීරියා රෝග කාරක වැඩිවෙන්න පුළුවන්. ගෘහය තුළ තෙතමනය සහ සාපේක්ෂ ආර්ද්රතාවය ඉහළ යාම තමයි එයට හේතුව. මේ තත්ත්වය මඟහරවා ගන්න වාතනය දියුණු කරන පංකා (Air circulation fans) පාවිච්චි කරන්න පුළුවන්. ආරක්ෂිත ගෘහයක වගාවක් කරන ඔබ නිසි ප්රමිතියකින් යුත් උෂ්ණත්වමානයක්, ආද්රතාමානයක් හෝ තෙත් හා වියළි බල්බ උෂ්ණත්වමානයක් භාවිතා කිරීම ඉතා වැදගත්වන්නේ ඒ නිසයි.
2. ජලාපවහනය සහ ගංවතුර වැළැක්වීම
ඔබේ වගා ගෘහය තුළට පිටතින් ජලය ගලා ඒම හෝ එක් රැස් වීම මුළුමනින්ම නතර කළ යුතුයි. ඇතැම් වගා කරුවන් ආරක්ෂිත ගෘහය තුළ පොළොව මුළුමනින්ම ආවරණය කිරීමට පොලිතින් වසුන් (Poly mulch) භාවිතා කරනවා. ඒ හරහා ජලය ගමන් කරන්නේ නෑ. යම් විදිහකින් එවැනි තත්ත්වයකදී ජලය එක්රැස් වුනොත් එය ඉවත් කිරීමට ඔබට නොහැකි වෙනවා වගේම, එය දිලීර, බැක්ටීරියා ආසාදන වලට සුදුසු පරිසරයක් නිර්මාණය කරනවා. එවැනි තත්ත්වයන් මඟහරවා ගන්න නම් ඔබ භාවිතා කරන්න ඕන වියන ලද බිම් ආවරණයක්. එහි සවිවර සිදුරු තුළින් ජලය නොරැඳී පොළවට කාන්දු වෙනවා.
පොලිටනලය වටා ජලය බැස යාම සඳහා විධිමත් කාණු පද්ධතියක් සකස් කිරීමත්, ටනලය සඳහා ආවරණ බැම්මක් ශක්තිමත්ව බැඳීමත් එළිමහනේ ජලය පොලිටනලය තුළට ඇතුළුවීම වළකනවා.
ඒ වගේම නිසි ප්රමිතියකට අනුව සකස් කරන ලද වැහිපීළි පද්ධතියකින්ද ජලයෙන් විය හැකි බාධාවන් අවුරණවා.
3. උස් පාත්ති යෙදීම
ඔබේ වගාව කරන්නේ පිහිටි පොළොවේ පසේම සකස් කරන ලද පාත්ති වල නම්, එම පාත්ති උස්ව සකස් කිරීම වැදගත් වෙනවා. ජලවහනය දියුණු කිරීමට එය උපකාරි වෙනවා. ඒ තුළින් මුල් කුණුවීම, පාමුල කුණුවීමේ රෝග තත්ත්ව වළකනවා.
4. පොහොර කළමනාකරණය
වර්ෂාව පවතින කාලවලදී පොහොර යෙදීමේ ශීඝ්රතාවය අවම කරන්න පුළුවන්. වැසි සහිත දිනවලදී බෝග වල උත්ස්වේදන චූෂණය අවම වෙනවා. ඒ නිසා වගා මාධ්යයෙන් බෝගයට ශාක පෝෂක උරාගැනීම අවම වෙනවා. ඒ නිසා පොහොර යොදන වාර දෙකක් අතර පරතරය වැඩිකරන්න ඔබට පුළුවන්.
වැසි දිනවල අධික ආර්ද්රතාවය පවතින විට පත්ර මත යොදන දියර පොහොරවල කාර්යක්ෂමතාව අඩු කරන අතර රෝග අවදානම වැඩි කරනවා.විශේෂයෙන් සමතුලිතව පොහොර යෙදීම බිංදු ජලසම්පාදන පද්ධතියක් හරහා පමණක් කළ යුතු වෙනවා. අඩු හිරු එළිය තත්ව යටතේ නයිට්රජන් වැඩි පොහොර යෙදීම් අඩු කළ යුතුයි.
5. රෝග හා පලිබෝධ වැළැක්වීම
නිතිපතා පරීක්ෂා කිරීම් තුළින් බොහෝ පළිබෝධ හානි අවම කරගන්න පුළුවන්. විශේෂයෙන් වැසි සහිත කාලවලදී කෝණාකාර පත්ර ලප, යටි පුස්, පිටිපුස් හෝ බෝට්රිටිස් වැනි දිලීර රෝග පැතිරීම සුලබයි. ආරක්ෂිත උපක්රමයක් ලෙස පුළුල් පරාසයක ක්රියාකරන කැප්ටාන්, තිරාම් වැනි දිලීරනාශකයක් හෝ තඹ අඩංගු රසායනික දිලීරනාශකයක් භාවිතා කරන්න පුළුවන්. බෝඩෝ මිශ්රණයත් මේ සඳහා භාවිතා කළ හැකියි.
වැසි කාලවලදී රෝග පැතිරීම පහසුවෙන් සිදුවන නිසා සැලකිය යුතු හානියක් වුන බෝග හෝ බෝග අවශේෂ කඩිනමින් වගා ගහයෙන් ඉවත් කිරීම ඉතා වැදගත්. එමඟින් රෝග හා පලිබෝධ හානි පැතිරීම සීමා කෙරෙනවා.
6. වැසි කාලවලදී වළාකුලින් බර අහස නිසා ඇතිවෙන අඩු ආලෝක තත්ත්වය හෝ අඩු උෂ්ණත්වය නිසා බෝගවල පරාගනයේ දෝෂ ඇතිවෙන්න පුළුවන්. ඒ නිසා ඵලදාව අඩුවීම, ඵලවල විකෘති ඇතිවීම සිදුවෙන්න පුළුවන්. ඒ තත්ත්වය තාවකාලික නිසා, ඒවා මඟහරවා ගන්න ඒ වෙනුවෙන් පලිබෝධනාශක හෝ වෙනත් දියර පොහොර ඉසීමෙන් ප්රතිඵලයක් ලබාගන්න බෑ. එය ඔබ කරන අනවශ්ය වියදමක් පමණයි.
7. ව්යූහාත්මක නඩත්තුව
ඔබේ වගා ගෘහය කොයිතරම් ඉහළ ප්රමිතියකින් සකස් කළ එකක් වුනත්, කාලයත් එක්ක එහි ව්යූහයේ, ආවරණ වල වෙනස්කම් ඇතිවෙලා තියෙන්න පුළුවන්. වැසිජලය වගාවට කාන්දුවීම මේ නිසා ඇතිවෙන්න පුළුවන්. වැසි සහිත අවස්ථා වලදී එවැනි කාන්දුවීම් පහසුවෙන් හඳුනාගන්න පුළුවන්. ඒවා කඩිනමින් අලුත්වැඩියා කරන්න පියවර ගන්න.
යම් විදිහකින් ආරක්ෂිත ගෘහයේ සැකිල්ලේ සවිශක්තිය පිළිබඳ ඔබතුළ සැකයක් තියෙනවනම්, අවධානමක් සහිත ස්ථාන ශක්තිමත් කිරීම කළ යුතුයි. විශේෂයෙන් වැසි තත්ත්වයන් සමඟ ඇතිවිය හැකි තද සුළං තත්ත්වයන්ට ඔරොත්තු දෙන ඔබේ වගා ගෘහය සකස් කරගැනීම ඉතා වැදගත්.
9. ක්රමවත් ජල සම්පාදනය
වැසි සහිත කාලවලදී ඔබ ආරක්ෂිත ගෘහ තුළ බෝග වගාව සඳහා බිංදු ජලසම්පාදනය පමණක් කළ යුතුයි. ඒ වගේම මතුපිට අපධාවයක් ඇතිනොවන පරිදි අවශ්ය ප්රමාණයට පමණක් ජලසම්පාදනය කිරීමට වගබලාගත යුතුවෙනවා. වගා ගෘහයේ පොළොව මතුපිට වියළිව තබාගැනීම ඔබේ වගාවේ සනීපාරක්ෂාවට උපකාරී වෙනවා.
10. ගෘහය වටා වල්පැළ පාලනය
වැසි කාලයත් එක්ක වගා ගෘහය වටා වල්පැළ වර්ධනය වී තිබෙන්නට පුළුවන්. වල්පැළ ඔබේ වගාවට හානිකරන රෝග හා පලිබෝධ වලට ධාරක වෙනවා. ඒ නිසා වගා ගෘහය වටා වල්පැළ පාලනයට සුදුසු පියවර හැකි ඉක්මනින් අරගන්න.
මෙම පිළිවෙත් ක්රියාත්මක කිරීමෙන් ආරක්ෂිත ගෘහ තුළ බෝග වගාකරන ඔබට සෞඛ්ය සම්පන්නව, නීරෝගී වගාවක් පවත්වා ගන්න පුළුවන් වෙනවා වගේම වැසි සහිත කාලගුණික තත්ත්වයන් තුළ පාඩු අවම කර ගන්නත් පුළුවන් වෙනවා.
ඔබේ වගාවේ සාර්ථකත්වය වෙනුවෙන් ඔබ හා අත්වැල් බැඳගන්නේ ඔබේ වගාවේ ළබැඳි තාක්ෂණික හවුල්කරු ලෙසිනි.
