20/08/2025
අප අද අපේ රට දියුණු විය යුතු යැයි සිතනවා නම් ඒ සඳහා වන පළමු අවම කොන්දේසිය වන්නේ හැකිතාක්දුරට දේශීය නිෂ්පාදන පරිභෝජනය පුරුදු වීම බවත් එමගින් පමණක් අපට මෙරට නිර්මාණය වන නව නිෂ්පාදන ආරක්ෂා කිරීමටත් ප්රවර්ධනය කිරීමටත් හැකියාව ලැබෙන බවත් කර්මාන්ත අමාත්ය විමල් වීරවංශ මහතා පෙන්වා දෙයි.
'නෙල්ලි කෝලා' නිෂ්පාදකයා වන පානදුර 'මා ප්රොඩක්ට්' පුද්ගලික සමාගමේ නව නිෂ්පාදන ජනගත කිරීම ඊයේ (11) සිදු කෙරුණු අතර එහිදී අමාත්යවරයා මේ බව පැවසීය.
මෙහිදී ගොරකා ආශ්රිත කෝලා පානයක් වන 'ගරක් - කෝලා' සහ තල් ආශ්රිත කෝලා පානයක් වන 'තල් - කෝලා' යන නව නිෂ්පාදන ජනගත කිරීම සිදුවිය.
මෙම නව නිෂ්පාදන ජනගත කිරීමට අමතරව 'maa Product' ආයතනය 'ගෞරව උත්තමාචාර ප්රණාම උළෙලක්' ද සංවිධානය කර තිබූ අතර එහිදී 'කර්මාන්ත අමාත්ය විමල් වීරවංශ මහතා දේශීය කර්මාන්ත ප්රවර්ධනයට ගන්නා පියවරයන් අගයමින්' විශේෂ සම්මානයකින් පිදුම් ලැබීය. එසේම ආතර් වී. දියෙස් ශ්රීමතාණන් අගයමින් සම්මාන පිදීමක් සිදු වූ අතර එය එතුමන්ගේ මී මුණුපුරු වෛද්ය එරංග පතිරණ මහතා වෙත ප්රදානය කෙරිණි.
ප්රවීණ සූපවේදී ආචාර්ය පබිලිස් සිල්වා, ප්රවීණ චිත්ර ශිල්පී බන්දුල හරිශ්චන්ද්ර, ප්රවීණ හස්ත කර්මාන්ත නිර්මාණ ශිල්පී ලයනල් පීරිස්, ප්රවීණ නිර්මාණවේදී ජ්යෙෂ්ඨ මහාචාර්ය ලයනල් බෙන්තරගේ යන මහත්වරු ද මෙහිදී සම්මානයට පාත්ර වූහ.
"maa Product ආයතනයේ දේශීය නිෂ්පාදන කෙරෙහි උනන්දුවෙන් කටයුතු කරන එම ආයතනයේ සභාපති මුදිත සමනක්කොඩි මහතා ද අමාත්යවරයාගේ ඇගයීමට ලක් විය.
මෙම අවස්ථාවට වැවිලි කර්මාන්ත අමාත්ය රමේෂ් පතිරණ, රාජ්ය අමාත්ය ජයන්ත සමරවීර, යන මහත්වරුන් ඇතුළු පිරිසක් එක්ව සිටියහ.
