05/02/2026
❝နတ်ပြည်မှာမရနိုင်တဲ့ကုသိုလ်❞
လူ့ဘုံမှာ လူလာဖြစ်ရတာ
အရမ်းကံကောင်းပါတယ်။
လူ့ဘုံမှာ
ကမ္မဋ္ဌာန်းလေးဆယ်လုံး ရလို့ပါ။
#နတ်ပြည်မှာဆို . . .
#အသုဘကမ္မဋ္ဌာန်း(၁၀) ပါး ရယ် ,
#ကာယဂတာ သတိ ကမ္မဋ္ဌာန်း ရယ်
#အာဟာရပဋိကူလသညာ ကမ္မဋ္ဌာန်း ရယ် . .
အားလုံး(၁၂) ပါး မရနိုင်ပါဘူး။
#နတ်ပြည်မှာ
အသုဘအလောင်းကောင် ဆိုတာ မရှိပါဘူး။
သေရင် မီးငြိမ်းသလို ခန္ဓာကိုယ် ပျောက်သွားတာပါ။ အလောင်းကောင်မရှိတော့
အသုဘ ကမ္မဋ္ဌာန်း ပွားလို့ မရနိုင်ပါဘူး။
ကာယဂတာသတိကမ္မဋ္ဌာန်း ဆိုတာက . . .
ဆံပင် , မွှေးညှင်း , လက်သည်း ,
သွား , အရေ . . စသည်တွေကို
စက်ဆုပ်ဖွယ်ဖြစ်အောင် ဆင်ခြင်ပြီး ပွားရတာပါ။
#နတ်ပြည်မှာ
ဆံပင် , မွှေးညှင်းတွေ ရှိပေမယ့်
သူတို့ ဆံပင် , မွှေးညှင်းတွေဟာ
သိပ်လှ , သိပ် တင့်တယ်နေတော့
စက်ဆုပ်ရွံရှာဖွယ် ဖြစ်အောင်
ပွားဖို့ မလွယ်ပါဘူး။
ဒါကြောင့်
ကာယဂတာသတိ ကမ္မဋ္ဌာန်း မရတာပါ။
အာဟာရပဋိကူလသညာ ကမ္မဋ္ဌာန်း ဆိုတာ . .
အာဟာရတွေကို
စက်ဆုပ်ရွံရှာဖွယ်ဖြစ်အောင် ဆင်ခြင်တာပါ။
ဒီအစာတွေဟာ
အစာရှိရာကိုလည်း သွားရတယ်။
အစား ရဖို့ရာလည်း ရှာရတယ် . .
စသည်ဖြင့် ( ၁၀ ) နည်းနဲ့ ဆင်ခြင်ရတာပါ။
( ဆင်ခြေပုံ (၁၀) နည်းကိုတော့
ဝိသုဒ္ဓိမဂ် မြန်မာပြန်မှာ ကြည့်ပါ )
နတ်ပြည်မှာ အစာအာဟာရ ရှိပေမယ့်
သူတို့ အာဟာရ တွေဟာ နတ်သြဇာ
အဆီအနှစ် အာဟာရတွေ ဖြစ်နေလို့ ,
သိပ်ကောင်းနေလို့ စက်ဆုပ်ရွံရှာဖွယ်လို့
ဆင်ခြင်လို့ မရပါဘူး။
ဒါကြောင့် နတ်ပြည်မှာ
အာဟာရပဋိကူလသညာ
ကမ္မဋ္ဌာန်း မရတာပါ။
ရူပဘုံမှာကျတော့
အထက်ကပြောခဲ့တဲ့ (၁၂)ပါး ရယ် ,
အာနာပါနကမ္မဋ္ဌာန်းရယ် မရပါဘူး။
အာနာပါန ဘာဖြစ်လို့ မရတာလဲ . .
ရူပဘုံမှာ အသက်မရှူလို့ပါတဲ့။
ဘာပဲပြောပြော သူများဘုံတွေနဲ့စာရင်
ကိုယ့်ဘုံက ကမ္မဋ္ဌာန်းလေးဆယ်လုံး
ရနေတာ ဆိုတော့ တော်တော်လေးကို
ကံကောင်းနေပါတယ်။
ဒါပေမယ့် လူ့ဘုံမှာ
ကမ္မဋ္ဌာန်းလေးဆယ်လုံး ရှိနေပေမယ့်
ကိုယ်က လုံးဝ မထိကြည့်ဘဲ ဘယ်တော့မှ
မပြီးဆုံးနိုင်တဲ့ လောကီအာရုံတွေ နောက်ပဲ
တစ်ကောက်ကောက် လိုက်နေမယ် ဆိုရင်တော့
လူ့ဘုံမှာ လူလာဖြစ်တာ
" ကံကောင်းတယ် " လို့ မဆိုသာဘူးနော်။
(ရဝေနွယ်-အင်းမ)🙏🙏
