21/07/2025
သတိမထားမိတတ်သော သားအိမ်ကင်ဆာ၏ လက္ခဏာ (၆) မျိုး
ယူကေနိုင်ငံတွင် နှစ်စဉ် မိန်းကလေး ၇,၄၀၀ ခန့် သားအိမ်ကင်ဆာဖြစ်ပွားနေပြီး ထိုအထဲမှ ၅ ဦးလျှင် ၁ ဦးသာ အစောပိုင်းအဆင့်တွင် ရောဂါကို သိရှိကြောင်း စစ်တမ်းများက ဖော်ပြသည်။ ဤရောဂါကို အချိန်မီသိရှိနိုင်ရန် သင့်ခန္ဓာကိုယ်မှ တိတ်တဆိတ်အချက်ပြလက္ခဏာများကို သတိပြုမိဖို့ အရေးကြီးပါသည်။
၁။ အစာစားပြီးချိန် အလွန်အမင်းဗိုက်ပြည့်နေသလို ခံစားရခြင်း
- အစာနည်းနည်းစားပြီးတာနဲ့ ဗိုက်ပြည့်သွားသလို ခံစားရပါက ဝမ်းဗိုက်အတွင်း အရည်များစုပုံနေခြင်း (သို့) သားအိမ်ကင်ဆာ၏ လက္ခဏာဖြစ်နိုင်သည်။
- အခြားရောဂါလက္ခဏာများနှင့်အတူ ကြာရှည်စွာခံစားရပါက ဆရာဝန်နှင့်ပြသပါ။
၂။ ဝမ်းဗိုက်အောက်ပိုင်း (သို့) တင်ပဆုံတွင် နာကျင်မှု/မအီမသာဖြစ်ခြင်း
- ရာသီလာစဉ်ကိုက်ခဲသလိုမျိုး နာကျင်မှု (သို့) ပုံစံခြားနားသော အောင့်ခြင်းမျိုးကို ခံစားရနိုင်သည်။
- နာကျင်မှုနှင့်အတူ ဗိုက်ပူခြင်းလည်း ဖြစ်နိုင်သောကြောင့် မပေါ့ဆသင့်ပါ။
၃။ ဗိုက်ပူခြင်း (အကြောင်းရင်းမရှိဘဲ)
- သားအိမ်ကင်ဆာ၏ အဖြစ်အများဆုံး လက္ခဏာတစ်ခုဖြစ်သည်။
- ရာသီလာချိန်တွင် ပိုဆိုးတတ်ပြီး ရောဂါအခြေအနေဆိုးလာပါက ဝမ်းဗိုက်တွင် အရည်များစုပုံလာနိုင်သည်။
၄။ ဓမ္မတာလာချိန် ပုံမှန်မဟုတ်ခြင်း
- ပုံမှန်မဟုတ်ဘဲ သွေးဆင်းခြင်း (သို့) သွေးစက်ကျခြင်း
- ရာသီပြတ်ပြီးသူများတွင် သွေးပြန်ဆင်းခြင်း
- ပုံမှန်မဟုတ်သော မိန်းမကိုယ်မှ အရည်ဆင်းခြင်း
၅။ ဆီးသွားသည့် အလေ့အထပြောင်းလဲခြင်း
- ဆီးခဏခဏသွားချင်ခြင်း
- ဆီးအိမ်တွင် ဖိအားခံစားရခြင်း (သို့) နာကျင်ခြင်း
- ဆီးမထိန်းနိုင်ခြင်း
၆။ ဝမ်းချုပ်ခြင်း/ဝမ်းလျှောခြင်း
- အူများပေါ်ဖိအားများလာခြင်းကြောင့် အစာခြေပြဿနာများ
- နာတာရှည်ပင်ပန်းနွမ်းနယ်ခြင်း၊ ခါးနာခြင်း၊ ကိုယ်အလေးချိန် အလိုလိုပြောင်းခြင်းများလည်း ဖြစ်နိုင်သည်။
အရေးကြီးသောအချက် :
ဤလက္ခဏာတစ်မျိုးတည်းကြောင့် စိုးရိမ်စရာမလိုသော်လည်း ပုံမှန်မဟုတ်သော လက္ခဏာများကို ရက်ရှည်လများ ခံစားနေရပါက ဆရာဝန်နှင့် အမြန်ဆုံးပြသင့်ပါသည်။ သင့်ခန္ဓာကိုယ်ကို ပုံမှန်စစ်ဆေးခြင်းဖြင့် အစောပိုင်းအဆင့်တွင် ရောဂါကို ထိထိရောက်ရောက် ကုသနိုင်ပါသည်။
