12/02/2026
ကဲ့ စားသောက်ကုန် Only ဘဲ ရပါတော့ မယ် ဆို တော့ ဝိုင်းမော် မှာ ဘဲ လာဝယ် ကြတော့
စစ်ကော်မရှင်တပ်က ဗလမင်းထင်တံတားတွင် လူသုံးကုန်တင်သွင်းမှုပိတ်ပင်ထားသဖြင့် ဒေသခံများအခက်ကြုံ၊ ဖမ်းထားသည့်ကားများ ရွေးယူရန် အာဏာပိုင်းများ ငွေညစ်နေ
မြစ်ကြီးနား - ဖေဖော်ဝါရီ ၁၂၊ ၂၀၂၆။
စစ်ကော်မရှင်တပ်က တရုတ်နိုင်ငံမှတင်သွင်းသည့် လူသုံးကုန်ပစ္စည်းများကို စစ်ဆေးဖမ်းဆီးနေသောကြောင့် ဒေသခံကုန်သည်များ အခက်အခဲကြုံတွေ့နေရကြောင်းသိရသည်။
မြစ်ကြီးနားမြို့၊ ဗလမင်းထင်တံတားရှိ စစ်ကော်မရှင် စစ်သား၊ ရဲနှင့် အကောက်ခွန်ဦးစီးဌာနမှ ဝန်ထမ်းများက ဖေဖော်ဝါရီလဆန်းပိုင်းမှစတင်ကာ လူသုံးကုန်ပစ္စည်းများကို သယ်ယူခွင့်ပိတ်ထားသည်ဟု အထည်ဆိုင်ပိုင်ရှင်တစ်ဦးက The 74 Media ကိုပြောသည်။
“ကုန်ပစ္စည်းတင်ထားပြီးတော့ လိုင်စင်မဲ့ကားဆိုရင် ပိုပြီးဖြတ်လို့မရဘူး၊ အင်္ကျီတစ်ထုတ်တောင် သယ်လို့မရဘူး၊ စားသောက်ကုန်တော့ရတယ်။ လူသုံးပစ္စည်းတော့ မရဘူး၊ ပိုက်ဆံပေးရင်လည်းမရဘူး၊ ဆိုင်မှာက နွေအစဆိုတာ့ ပစ္စည်းသယ်ယူလို့မရတော့ ရောင်းစရာမရှိ။ လူအပြောင်းအရွေ့ရှိလို့နေမှာ ရဲတွေနဲ့တော့ အဆင်ပြေတယ်၊ စစ်သားတွေနဲ့က ပြောဆိုလို့ကိုမရဘူး၊ ကြမ်းတမ်းလိုက်တာ ပညာမတတ်လို့နေမှာ” ဟုပြောသည်။
ဗလမင်းထင်တံတားရှိ စစ်ကော်မရှင် စစ်ဆေးရေးဂိတ်က စားသောက်ကုန်မှအပ အိမ်ဆောက်ပစ္စည်း၊ အဝတ်အထည်နှင့် လူသုံးကုန်များကို ကန့်သတ်စစ်ဆေး ဖမ်းဆီးနေခြင်းဖြစ်သည်။
ပြီးခဲ့သည့် ဖေဖော်ဝါရီ ၂ ရက်နေ့က ဝိုင်းမော်မြို့နယ်အတွင်း တိုက်ပွဲဖြစ်ပွားချိန် ငှက်ပျောခြံအနီးရှိ ပြည်သူ့စစ်အဖွဲ့က ကုန်တင်ယာဉ် (၆၁) စီးကို ကုန်ပစ္စည်းများနှင့်အတူ ဖမ်းဆီးခဲ့ကြောင်း ကုန်သည်နှင့်နီးစပ်သူ အမျိုးသမီးက ပြောသည်။
“ငှက်ပျောခြံနားမှာ တိုက်ပွဲအရမ်းပြင်းထန်လာလို့ ကားသမားတွေက ကြောက်လို့ထွက်ပြေးတဲ့အချိန် ဖမ်းပေးလိုက်တယ်လို့ပြောတယ်။ နေရာတော့ အတိအကျမသိတော့ဘူး၊ ပြည်သူ့စစ်တွေရှိတဲ့နားမှာ ဖမ်းလိုက်တာတဲ့ အဲဒီဘက်ကို မောင်းသွားလိုက်တာကို၊ အဲဒီအမှုက နေပြည်တော်ဘက် ရောက်သွားပြီမိုလို့ အရမ်းခက်နေတယ်လို့ပြောတယ်။ အသိတစ်ယောက်ဆိုလည်း ကားခုနှစ်စီးလောက်ပါသွားတယ်တဲ့” ဟုပြောသည်။
ဖမ်းဆီးခံရသောကားများမှာ တရုတ်နယ်စပ်ကုန်သွယ်ရေးမြို့ဖြစ်သည့် ကံပိုက်တည်မြို့မှ မြစ်ကြီးနားမြို့ဘက်သို့ ကုန်ပစ္စည်းသယ်ဆာင်လာသည့် တွဲကား (၄၇) စီးနှင့် ဆယ့်နှစ်ဘီးကား (၁၄) စီး စုစုပေါင်း (၆၁) စီးဖြစ်ပြီး ပြီးခဲ့သည့် ဖေဖော်ဝါရီ ၇ ရက်နေ့တွင် ရဲတပ်ရင်း (၃၀) အတွင်းသို့ ပြောင်းရွှေ့ဖမ်းဆီးထားကြောင်းသိရသည်။
လက်ရှိအချိန်တွင် ဖမ်းဆီးခံထားရသောကားများကို အကောက်ခွန်ဌာနမှ မြို့နယ်မှူးက တစ်စီးလျှင် ငွေကျပ်သိန်းတစ်ထောင်ခန့်ဖြင့် လာရောက်ရွေးထုတ်ရန် ညှိနှိုင်းခဲ့သည်ဟု မြစ်ကြီးနားမြို့ခံ ကုန်သည်အမျိုးသားတစ်ဦးကပြောသည်။
“မြို့နယ်မှူးဦးသိန်းထွန်းဝင်းက တော်တော်ဆိုးတာပေါ့ အခုသူက ကား ၆၁ စီးဖမ်းထားတဲ့အထဲမှာ နိုင်ငံတော်ဘဏ္ဍာဆိုတဲ့ခေါင်းစဉ်နဲ့ ဒဏ်ကြေးပေးရမှာကို သိန်းတစ်ထောင့်ငါးရာ၊ နှစ်ထောင် အဲ့လိုတောင်းတယ် အကုန်သူစီမံနေတာပါ။ ရဲနဲ့ စစ်သားလည်းစားမှာပေါ့၊ ပါးစပ်စိုရုံလောက်ပဲရမယ်။ အချီကြီးငွေတောင်းစားတာက မြို့နယ်မှူးနဲ့ ကာစတန်အပေါင်းအပါပဲလေ။ ဝန်ကြီးချုပ်နဲ့ တိုင်းမှူးက နားလည်မှုနဲ့ ဖြတ်ခိုင်းပေးတာ အဲ့တာကို ကာစတန်က ကြားကနေ ညစ်စားတာ” ဟုပြောသည်။
ဗလမင်းထင်တံတားတွင် လူသုံးကုန်ပစ္စည်းများသယ်ယူခွင့်ပိတ်ပင်မှုကို လက်ရှိမြောက်ပိုင်းတိုင်းစစ်ဌာနချုပ် (မ.ပ.ခ) တိုင်းမှူး ဗိုလ်မှူးချုပ် အောင်ဇော်ထွေး၏ အထူးအမိန့်ဖြင့် ပိတ်ပင်ထားခြင်းဖြစ်သည်ဟု ဒေသခံလုပ်ငန်းရှင်များထံက သိရသည်။
သတင်း - Pan Soon
